Cuntegn da la pagina

Dumonda Bigliel concernent la strategia da digitalisaziun en la furmaziun: mesirabladad e controlla da success en il rom dal Plan d'instrucziun 21

sessiun: 12.02.2020

Ils 15 da mars 2016 ha la Regenza grischuna approvà il Plan d'instrucziun 21 GR inclusiv las tavlas da lecziuns. Il nov plan d'instrucziun è entrà en vigur l'onn da scola 2018/19 per las scolinas, per las scolas primaras sco er per las 1. e 2. classas dal stgalim secundar I. L'onn da scola 2019/20 vegn el realisà sin basa da directivas correspundentas en la 3. classa dal stgalim secundar I.

Il Plan d'instrucziun 21 fixescha las finamiras per l'instrucziun sin tut ils stgalims da la scola populara ed è in instrument da planisaziun per las persunas d'instrucziun, per las scolas e per las autoritads da furmaziun. Ultra da quai cuntegna il Plan d'instrucziun 21 ils plans d'instrucziun per ils moduls «medias ed informatica» ed «orientaziun professiunala». Quests moduls cuntegnan incumbensas interdisciplinaras da la scola e garanteschan in svilup sistematic da las cumpetenzas per ina part centrala da questas incumbensas.

Cun il nov plan d'instrucziun survegn la digitalisaziun dapli paisa. En il modul «medias ed informatica» sa tracti per l'ina da tematisar e da reflectar il diever da las medias ordaifer la scola. Per l'autra duain las scolaras ed ils scolars vegnir preparads – cun cumpetenzas d'applicaziun e cun enconuschientschas fundamentalas d'informatica – per il mund professiunal. Tenor la Conferenza da las directuras e dals directurs da l'educaziun publica dals chantuns da la Svizra da l'ost e dal Principadi da Liechtenstein CDEP-ost sajan quellas numnadamain ozendi «necessarias praticamain en mintga professiun».

Il modul «medias ed informatica» vegn integrà en il Plan d'instrucziun 21 sco suonda:

●    En il ciclus I che cumpiglia ils emprims 4 onns inclusiv la scolina, na vegnan ils champs da cumpetenza medias ed informatica betg instruids sco rom autonom, mabain integrads en auters roms. Las finamiras da l'emprim ciclus èn per exempel, che las scolaras ed ils scolars emprendian d'utilisar medias en moda creativa ed adattada al stgalim e ch'els hajan in barat davart lur atgnas experientschas cun las medias.

●    En ils ciclus II (3.–6. onn da scola) e III (stgalim secundar I) recumonda il Plan d'instrucziun 21 che las scolaras ed ils scolars frequentian almain 2 uras per emna «medias ed informatica» per pudair elavurar sistematicamain temas fundamentals centrals. Il Grischun n'ademplescha betg la pretensiun da la CDEP. I vegnan purschidas main uras ch'il dumber recumandà. Quai resorta da la lavur da perscrutaziun da l'Universitad da Friburg, ch'è vegnida publitgada il fanadur 2018 cun il titel «Realisaziun da la furmaziun mediala e digitala en ils chantuns».

En ses program da la Regenza per ils onns 2021 fin 2024 ha la Regenza grischuna formulà la finamira da rinforzar il Grischun sco lieu da furmaziun e da perscrutaziun. Tras quai duai il Grischun vegnir posiziunà sco chantun da muntogna innovativ e digital. «L'infrastructura digitala e la furmaziun da la populaziun en il sectur da la digitalisaziun furman perquai ina basa fitg impurtanta per il svilup dal chantun», èsi formulà en il program da la Regenza.

Sut quest aspect vulan las sutsegnadras ed ils sutsegnaders savair da la Regenza:

1.     Il svilup sistematic e la promoziun da cumpetenzas digitalas è correct ed impurtant, damai che umans giuvens ston pudair sa mover e sa cumprovar en il mund digital il pli tard sin il stgalim secundar II e suenter (emprendissadi, scola chantunala, studi). Correspundentamain èsi indispensabel da sviluppar las cumpetenzas digitalas durant il temp da la scola populara. Areguard il Plan d'instrucziun 21 ed areguard la finamira che la Regenza vul cuntanscher da preparar il lieu da furmaziun e da perscrutaziun per l'avegnir digital, sa tschenta la dumonda: Cun tge metodica e tenor tge criteris ed indicaturs vegn il chantun Grischun a mesirar il success da la scola populara en connex cun il svilup e cun la promoziun da las cumpetenzas digitalas? Quai tut savend che l'Inspecturat da scola ha fatg dacurt ina inventarisaziun davart la realisaziun tenor las reglas dal Plan d'instrucziun 21. En quella è bain vegnì tematisà l'equipament da las scolas cun infrastructura dad ICT, ma betg in instrument per mesirar il success dal modul «medias ed informatica».

2.     Tenor il Plan da finanzas 2021 fin 2024 metta la Regenza a disposiziun mintga onn en media 38,6 milliuns francs per la scola populara. Quants da quests meds finanzials vegnan previsiblamain duvrads per la digitalisaziun resp. per cuntanscher las finamiras tenor il program da la Regenza?

Grazia fitg per las respostas a nossas dumondas.

Cuira, ils 12 da favrer 2020

Bigliel, Cantieni, Gugelmann, Berther, Danuser, Epp, Gasser, Giacomelli, Hefti, Hitz-Rusch, Holzinger-Loretz, Kohler, Kunfermann, Kuoni, Lamprecht, Loepfe, Mittner, Pfäffli, Preisig, Rettich, Ruckstuhl, Stiffler, von Ballmoos, Waidacher, Widmer-Spreiter (Cuira), Zanetti (Sent)

Resposta da la regenza

Il Plan d'instrucziun 21 GR ch'è vegnì approvà da la Regenza l'onn 2016 furma, cun il plan d'instrucziun dal modul "medias ed informatica", la basa per la realisaziun da quest nov rom en la scola populara. En connex cun l'adattaziun dal plan d'instrucziun è il chantun Grischun s'orientà vi da las recumandaziuns e vi dal rapport spezial cor­respundent per la tavla da lecziuns da la Conferenza dals directurs chantunals da l'educaziun publica dals chantuns germanofons (CDEP-T; schliada si per la fin da l'onn 2018). En la 5. e 6. classa primara sco er en la 1. e 3. classa dal stgalim secun­dar I da las scolas grischunas vegn instruida mintgamai ina lecziun per onn "medias ed informatica". Ultra da quai vegn "medias ed informatica" integrà ed applitgà en tut ils champs e roms a partir da la scolina. La recumandaziun da la CDEP-T, tenor la quala i ston vegnir previsas structuras da temp da mintgamai duas lecziuns per onn en il segund e terz ciclus per scolar las cumpetenzas dal modul "medias ed informa­tica", è vegnida resguardada.

Tar la dumonda 1: Tenor l'art. 91 da la Lescha davart las scolas popularas dal chan­tun Grischun (Lescha da scola; DG 421.000) e l'art. 72 da l'Ordinaziun tar la Lescha da scola (Ordinaziun da scola; DG 421.010) ha l'Inspecturat da scola tranter auter l'incumbensa da controllar, sch'ils purtaders da scola realiseschan ed observan las prescripziuns chantunalas ed ils standards da qualitad sco er d'evaluar periodica­main las scolas popularas. Tenor il "Rapport davart la realisaziun dal Plan d'instruc­ziun 21 Grischun", dal qual la Regenza ha prendì enconuschientscha il mars 2016, accumpogna l'Inspecturat da scola il process da realisaziun cun communicaziun, cun cussegliaziun professiunala e cun surveglianza formala.

L'instrucziun orientada a las cumpetenzas vegn controllada a partir da l'onn da scola 2021/22 en il rom da la procedura chantunala standardisada che sa numna giudica­ment e promoziun da la scola. En il center stattan en quest connex l'examinaziun dal nov rom sco er l'applicaziun en tut ils champs e roms. Actualmain elavura l'Inspectu­rat da scola – en ina gruppa da lavur interchantunala en collavuraziun cun l'Universi­tad da Turitg – criteris ed indicaturs concrets.

Questa evaluaziun da las scolas popularas metta il focus sin la qualitad da l'instruc­ziun e sin il diever da medias en tut ils roms e sin tut ils stgalims da scola. I na vegn betg "mesirà", quant bain che las scolaras ed ils scolars san utilisar medias digitalas.

L'inventarisaziun davart la realisaziun dal Plan d'instrucziun 21 GR, che vegn men­ziunada en la dumonda, tracta la realisaziun dal Plan d'instrucziun tenor las reglas. Ella cuntegna d'ina vart enconuschientschas da las structuras regularas davart la surveglianza formala e davart la cussegliaziun professiunala, da l'autra vart resultats d'ina emprima retschertga sistematica, tranter auter davart l'infrastructura d'informa­tica. En quest connex èsi sa mussà che las scolas grischunas èn posiziunadas bain areguard ils terms impurtants formulads (avust 2019 ed avust 2021), quai er en la cumparegliaziun interchantunala. En vista a la realisaziun dal Plan d'instrucziun dovri tuttina anc scolaziuns e furmaziuns supplementaras per bleras persunas d'instruc­ziun, quai che chaschuna custs e lavur supplementara considerabla.

Suenter la fasa d'introducziun da 3 onns a partir da l'onn da scola 2021/22 vegn con­trollada l'instrucziun orientada a las cumpetenzas.

Tar la dumonda 2: Ils 38,6 milliuns francs che vegnan mess a disposiziun en media per onn per las scolas popularas tenor il Plan da finanzas 2021 fin 2024 correspun­dan a las contribuziuns chantunalas annualas als purtaders da scola. Quests meds finanzials vegnan pajads sco pauschalas, sco pauschalas supplementaras e sco contribuziuns a las vischnancas e cuvran uschia ina part dals custs per las scolas popularas. La finanziaziun da l'infrastructura da medias e d'informatica è chaussa dals purtaders da scola. Per quest intent na paja il chantun naginas contribuziuns spezialas.

Actualmain n'èsi anc betg fixà, quants meds finanzials dal nov credit d'impegn per promover la transfurmaziun digitala che van a favur da la scola populara.

23 d'avrigl 2020