Cuntegn da la pagina

Dumonda Geisseler concernent il transferiment dal traffic da rauba da la via sin la viafier

sessiun: 12.02.2020

Per il Grischun sco «chantun da transit» è il transferiment dal traffic da rauba da la via sin la viafier d'ina impurtanza centrala. D'ina vart è il transport cun la viafier pli effizient areguard l'energia e schanegia pia er meglier l'ambient ch'il transport cun camiuns. Da l'autra vart reducescha il transferiment da rauba sin la viafier er il volumen da traffic sin las vias dal Grischun che arrivan gia per part a lur cunfins pervia dal traffic individual, per exempel sin la ruta dal San Bernardin.

Per promover il transferiment dal traffic da rauba da la via sin la viafier ha la Confederaziun concludì il november 2019 novas mesiras. Er il chantun Grischun promova il transferiment da rauba da la via sin la viafier. La Viafier retica (VR) intensivescha er sias stentas en quest reguard. Per exempel è creschì il volumen da rauba che la VR ha transportà u è vegnida extendida la rait dal traffic da rauba da la VR.

E tuttina ha il transferiment dal traffic da rauba da la via sin la viafier anc fitg bler potenzial en il Grischun. Sut quest aspect supplitgeschan las sutsegnadras ed ils sutsegnaders la Regenza da respunder las suandantas dumondas:

1.     È er la Regenza dal medem avis sco las sutsegnadras ed ils sutsegnaders ch'il transferiment dal traffic da rauba da la via sin la viafier è da gronda impurtanza per il chantun Grischun e ch'il Grischun ha anc bler potenzial da svilup en quest reguard?

2.     Planisescha la Regenza da promover en il futur pli fitg il transferiment dal traffic da rauba da la via sin la viafier (analogamain a la Confederaziun)? Per exempel cun la finanziaziun (parziala) da projects concrets da la VR?

3.     È la Regenza pronta da manar in dialog cun la VR per far sforzs da realisar projects actuals che gidan a promover il transferiment dal traffic da rauba da la via sin la viafier?

4.     En il rom da l'incumbensa Wilhelm concernent in Green Deal per il Grischun: nizzegiar la protecziun dal clima sco schanza è la Regenza vegnida incumbensada da preschentar in plan d'acziun cumplessiv «Green Deal per il Grischun» che cuntegna mesiras concretas ed efficazias a favur da la protecziun dal clima. Ha la Regenza l'intenziun d'integrar en il plan d'acziun er la promoziun dal transferiment dal traffic da rauba da la via sin la viafier?

Cuira, ils 12 da favrer 2020

Geisseler, Tanner, Wilhelm, Atanes, Berther, Buchli-Mannhart, Cahenzli-Philipp, Caluori, Cantieni, Cavegn, Crameri, Epp, Fasani, Flütsch (Spleia), Gartmann-Albin, Gasser, Hefti, Hofmann, Kunfermann, Loepfe, Natter, Noi-Togni, Perl, Preisig, Rettich, Rüegg, Rutishauser, Sax, Schneider, Schutz, Widmer-Spreiter (Cuira), Zanetti (Sent), Spadarotto, Stieger

Resposta da la regenza

Il martgà dal traffic da rauba en il Grischun è caracterisà d'ina vasta rait d'abitadis sco er da manaschis industrials e commerzials. Ils lieus da producziun ils pli gronds e las destinaziuns las pli grondas sa chattan en la Val dal Rain grischuna ed en las valladas pli grondas da Tavau, da l'Engiadin'ota, dal Partenz, da Glion e da Tusaun. L'infrastructura ordaifer la Val dal Rain grischuna è caracterisada fitg ferm dal territori alpin sco er da tunnels e da pass. Ultra da las Viafiers federalas svizras (VFF), da Railcare e da la Viafier Matterhorn-Gottard (VMG) è en emprima lingia la Viafier retica (VR) responsabla per il transport da rauba cun la viafier en il Grischun. Il traject da la Viafier retica da Cuira a Domat è construì a trais binaris, uschia ch'ils trens da martganzia a binaris normals pon circular fin a Favugn (terminal Heineken/Railcare) resp. fin a las Ovras da Domat ed a l'anteriur areal Stallinger.

Per incumbensa da l'Uffizi d'energia e da traffic (UEnTr) ha la Viafier retica elavurà l'onn 2018 in concept per il traffic da rauba, che s'occupa tranter auter da la dumon­da, co che la part dal transport da rauba cun la viafier po vegnir augmentada entaifer il Grischun. Plinavant han il Cussegl d'administraziun e la direcziun da la Viafier reti­ca approvà in plan da gestiun "Viafier grischuna da rauba 2022" per meglierar la ren­tabilitad. Differentas mesiras èn vegnidas examinadas areguard lur realisabladad ed areguard lur efficacitad, ed èn vegnidas priorisadas correspundentamain. Intginas da talas mesiras èn gia vegnidas realisadas, autras èn anc en planisaziun. Ils ultims onns è vegnì investì principalmain en l'amplificaziun dals centers da transtgargiada da martganzia. Actualmain vegnan examinadas investiziuns per modernisar il parc da vehichels e da vaguns da rauba, per augmentar l'effizienza. 

Tar la dumonda 1: La Regenza è da l'avis ch'i saja impurtant da sustegnair il trans­feriment dal traffic da rauba da la via sin la viafier. Il transport da rauba en il Grischun ha lieu oz primarmain sin la via. Quai è per gronda part traffic sin trajects curts, che po vegnir liquidà mo cun grondas difficultads senza binaris da colliaziun tar il speditur e tar il retschavider ubain senza utilisaziun dal traffic cumbinà. Las tonnaschas resp. las tonnas kilometricas mussan dapi 10 onns in regress tar la Viafier retica, en spe­zial ils transports da material da construcziun èn sa reducids. La situaziun actuala mussa cleramain ch'i dovra stentas supplementaras per augmentar il transport da rauba cun la Viafier retica. Ulteriur potenzial da clientella per transports da rauba cun la viafier è avant maun, ina gruppa en mira impurtanta è il commerzi en detagl. En il rom da la strategia dals proprietaris spetga la Regenza che la Viafier retica furne­schia ina contribuziun per transferir il traffic da rauba sin la viafier, e ch'ella augmen­tia correspundentamain la productivitad.

Tar la dumonda 2: Actualmain promovan la Confederaziun ed il chantun – ultra d'in­demnisar annualmain ils custs da gestiun betg cuvrids dal transport da rauba cun la Viafier retica da ca. 6 milliuns francs – cunzunt la renovaziun da binaris da colliaziun. I vala d'examinar in sustegn finanzial per ulteriurs projects en l'avegnir, sco per exempel il traffic cumbinà betg accumpagnà (TCA), locomotivas ibridas da manevrar u vaguns da rauba innovativs. En il rom da la revisiun da la Lescha davart il traffic public pon vegnir stgaffidas las basas giuridicas necessarias per promover il transport da rauba cun la Viafier retica. 

Tar la dumonda 3: Il departament cumpetent ed il UEnTr han in barat regular cun la Viafier retica davart il tema dal traffic da rauba. La Regenza ha ina tenuta positiva envers il giavisch d'in sustegn pli ferm per projects dal traffic da rauba, per franar il regress da las quotas dal martgà en il transport da rauba cun la viafier. 

Tar la dumonda 4: Tenor las retschertgas fatgas sin basa da l'incumbensa da project "Grean Deal" è il sectur dal traffic responsabel per 42 pertschient da las emissiuns da gas cun effect da serra. Correspundentamain impurtantas èn las mesiras che vegnan prendidas en quest sectur per cuntanscher las finamiras dal clima. Il transferiment dal traffic da rauba da la via sin la viafier permetta da cuntanscher ina reducziun im­purtanta da las emissiuns da CO2. Grean Deal porscha la pussaivladad d'impunder meds finanzials supplementars per promover il transport da rauba cun la viafier. Pervia da quai vegni examinà d'integrar mesiras per transferir il traffic da rauba da la via sin la viafier en il project "Green Deal".

29 d'avrigl 2020