Cuntegn da la pagina

Dumonda Wilhelm concernent l'avegnir dal Bernina Express a Tavau

sessiun: 12.02.2020

Il Bernina Express circulescha oz sin il traject da Cuira sur Tusaun, ma er sin il traject tras il Partenz sur Tavau e Filisur, fin a Tirano. Sco ils viadis istorics da la Viafier retica tras la Zügenschlucht tutga il Bernina Express oz tar las attractivitads da Tavau sco lieu da turissem. Quai serva en spezial er a promover il turissem da stad, ch'è ina finamira dal chantun, e gida a mantegnair plazzas da lavur attractivas. Suenter ch'il spurtegl da la staziun da Tavau Vitg è vegnì serrà e suenter che Tavau è vegnì stritgà sco destinaziun dal Glacier Express, ha quai ina tscherta impurtanza per la staziun finala istorica da l'emprima lingia da viafier en il Grischun.

Tenor rapports betg confermads duai ussa il Bernina Express circular questa stad per l'ultima giada si Tavau. Uschia na svaniss betg mo la destinaziun Tavau/Claustra, mabain l'entira regiun Partenz/Tavau da la charta dal Bernina Express.

En vista a quests fatgs tschentan las sutsegnadras ed ils sutsegnaders las suandantas dumondas:

1.     Sa la Regenza, sche e pertge che Tavau duai vegnir stritgà sco destinaziun dal Bernina Express u sche e pertge che la frequenza per Tavau duai vegnir reducida?

2.     Tge consequenzas ha in'eventuala stritgada per il dumber da plazzas da lavur e per lur attractivitad a Tavau sco lieu da la Viafier retica?

3.     Tge tenuta ha la Regenza envers la dumonda da stritgar Tavau sco destinaziun dal Bernina Express?

4.     Èn vegnidas examinadas alternativas envers in'eventuala stritgada? È la Regenza s'engaschada per talas?

5.     Tge ulteriuras perspectivas per il futur existan per Tavau sco lieu da la Viafier retica?

Cuira, ils 12 da favrer 2020

Wilhelm, von Ballmoos, Bettinaglio, Atanes, Baselgia-Brunner, Berther, Brandenburger, Cahenzli-Philipp, Caluori, Cantieni, Caviezel (Cuira), Censi, Degiacomi, Della Cà, Deplazes (Cuira), Derungs, Dürler, Ellemunter, Epp, Flütsch (Spleia), Gartmann-Albin, Gasser, Gort, Hartmann-Conrad, Hofmann, Horrer, Jenny, Müller (Susch), Müller (Favugn), Niggli-Mathis (Grüsch), Noi-Togni, Perl, Preisig, Rettich, Rutishauser, Schutz, Tanner, Weber, Spadarotto, Stieger

Resposta da la regenza

Grazia a la dumonda allegraivla e creschenta dal martgà Italia arriva il Bernina Express als cunfins da sias capacitads. Per pudair dumagnar questa dumonda en moda duraivla circulescha ina da las quatter cumposiziuns da tren da nov da Tirano fin Cuira ed enavos fin Tirano. Cumpareglià cun las autras lingias dal Bernina Ex­press ha il Bernina Express da Tavau fin Tirano, dapi sia introducziun, l'occupaziun lunschor la pli bassa. Malgrà numerusas mesiras n'ha l'occupaziun betg pudì vegnir meglierada. Pervia da quai scroda la purschida actuala cun la colliaziun directa sur Tavau a partir da la stagiun da stad 2021. 

Tar la dumonda 1: A la Regenza èsi enconuschent ch'il rom pauc dumandà dal Ber­nina Express tras il Partenz duai vegnir stritgà en l'urari 2021. Tras l'introducziun dal concept da purschida Retica 30 survegn Tavau in tact da mes'ura integral per Land­quart, Turitg e Son Gagl. La purschida bler pli spessa (tact da mes'ura) na permetta betg pli da trassar in Bernina Express supplementar sin l'infrastructura che dispona quasi dapertut d'in binari simpel. Cuntrari ad oz na pon ils chars dal Bernina Express betg pli vegnir pendids vi dals trens da tact, perquai ch'i vegnan introducids – cun Retica 30 – novs trens ad autotracziun Capricorn cun accuplament automatic che duain pussibilitar a Claustra in accuplament da las lingias per Tavau, Scuol e San Murezzan. Per motivs tecnics na pon quests trens ad autotracziun betg vegnir pen­dids vi dals chars existents dal Bernina Express.

Tar la dumonda 2: Tras la stritgada dal Bernina Express na datti naginas conse­quenzas negativas per las plazzas da lavur a Tavau e per Tavau sco lieu da la Viafier retica.

Tar la dumonda 3: Per la Regenza èn ils motivs preschentads da la Viafier retica cha­paivels. Ella renconuscha ils avantatgs menziunads dal nov concept da purschida Retica 30. Tut en tut vegn uschia meglierada cleramain la cuntanschibladad da Tavau. Cun ils trens che circuleschan tenor urari da Tavau a Filisur cun ina cumposiziun istorica dals onns 1920 ha la Viafier retica cuntanschì in ulteriur augment da l'attrac­tivitad da la regiun.

Tar la dumonda 4: Il Bernina Express pudess circular er en l'avegnir sur Tavau, sch'i vegniss desistì d'introducir il concept da purschida Retica 30. Quai purtass dentant gronds dischavantatgs per Tavau (nagin tact da mes'ura per Landquart e Turitg, nagin material rullant nov) e n'è betg raschunaivel ord vista da la Regenza. 

Tar la dumonda 5: Ord vista da la Regenza fissi d'examinar da prolungar a vista mesauna tuttas duas lingias da mes'ura dal RegioExpress davent da Landquart sur Tavau Plaz fin Filisur. Pervia dals lungs temps da pausa a Tavau Plaz fiss ina tala prolungaziun pussaivla senza stuair duvrar ulteriur material rullant, ed ella avess trais gronds avantatgs:

(1)   Tavau na survegniss betg mo in tact da mes'ura en direcziun da Landquart, ma­bain er vers Filisur ed uschia per la lingia da l'Alvra sco er per la purschida futura dal "Mund d'aventuras Viaduct da la Landwasser".

(2)   Grazia a quest concept survegniss Tavau ina "Viafier S Tavau" da transit che serviss mintga mes'ura tut las staziuns da la vischnanca.

(3)   Perquai ch'il concept da mira da la Viafier retica prevesa ch'il Bernina Express ed il Glacier Express circuleschan a Filisur uschia, ch'els èn spustads exactamain per ina mes'ura envers ils interregios Cuira – San Murezzan, purtass questa pro­lungaziun fitg bunas colliaziuns per Tavau a Filisur, e quai cun tut ils Bernina Ex­press Cuira – Tirano ed a medem temp er cun tut ils Glacier Express San Murez­zan – Zermatt. Cumpareglià cun oz è quai ina clera meglieraziun da la situaziun.

23 d'avrigl 2020