Ils mulins politics molan plaun. Quai n'è betg insatge nov ed è la consequenza da noss sistem politic democratic. La situaziun enturn il coronavirus ha er bittà la politica grischuna tut in tranter l'auter. Il manaschi parlamentar è stà salda per mais.
En talas situaziuns u en situaziuns sumegliantas stuess il Cussegl grond però pudair ademplir uschè svelt sco pussaivel sias cumpetenzas sco organ che represchenta il pievel e ch'è responsabel per la legislaziun e daventar abel d'agir.
I po er capitar che fatschentas na pon betg vegnir spustadas, mabain ston vegnir tractadas immediatamain. Per accelerar il process politic en situaziuns urgentas pudess per exempel vegnir stgaffida la pussaivladad d'ina incumbensa urgenta. Il Cussegl grond enconuscha fin ussa la decleraziun d'urgenza per dumondas ch'è fixada en l'art. 66 da l'Urden da gestiun dal Cussegl grond (UGCG). Auters parlaments chantunals lavuran supplementarmain cun intervenziuns urgentas (analogamain a l'incumbensa), uschia tranter auter ils chantuns Argovia (art. 74 GO), Vallais (art. 126 RGR), Turgovia (art. 20 GOGR), Berna (art. 68 al. 3 GRG) u Son Gagl (108 GeschKR).
Per pudair eruir la mesira skizzada qua survart u ulteriuras mesiras per accelerar fatschentas urgentas dal Cussegl grond sco er per accelerar sia abilitad d'agir uschè svelt sco pussaivel en situaziuns excepziunalas duai vegnir installada ina cumissiun ad hoc che suttametta al Cussegl grond propostas correspundentas.
Las sutsegnadras ed ils sutsegnaders incumbenseschan pervia da quai il Cussegl grond cun in conclus direct tenor l'art. 72 UGCG, d'installar ina cumissiun ad hoc che examinescha mesiras e suttametta al Cussegl grond midadas da la legislaziun per garantir l'abilitad d'agir dal Cussegl grond en temps da crisa u sch'in privel resulta dal retard.
Cuira, ils 19 da zercladur 2020
Müller (Favugn), Rettich, Preisig, Baselgia-Brunner, Cahenzli-Philipp, Degiacomi, Deplazes (Cuira), Gartmann-Albin, Hofmann, Horrer, Noi-Togni, Perl, Rutishauser, Schwärzel, Thöny, Wilhelm, Pajic, Spadarotto