Navigation

Inhaltsbereich

Dumonda Rutishauser concernent COVID-19 cun accent sin las chasas da persunas attempadas e da tgira

Sessiun: 19.06.2020

En las chasas da persunas attempadas e da tgira dal Grischun han, sco er en auters chantuns e pajais, surproporziunalmain bleras abitantas e blers abitants survegnì COVID-19 ed èn per part morts vidlonder. Las cifras da Grischun èn stadas qua schizunt levamain sur la media svizra.

En quest connex vegn la Regenza supplitgada da respunder las suandantas dumondas:

  1. Tge chasas da persunas attempadas e da tgira chantunalas èn stadas pertutgadas da malsognas COVID-19?
  2. Ha la Regenza l'intenziun d'eruir ils motivs da la gronda derasaziun malgrà las mesiras restrictivas? E co vegn ella a proceder en quest cas?
  3. Ha la Regenza l'intenziun d'examinar e d'adattar il plan chantunal da pandemia per impedir en il futur ina stgarsezza da las resursas tant tar il material da protecziun sco er tar il persunal?
  4. Prevesa la Regenza er d'examinar ed eventualmain d'adattar il plan da plazzas da las chasas da persunas attempadas e da tgira areguard las qualificaziuns avant maun per garantir en il futur che avunda cumpetenza professiunala existia per in'eventuala crisa sumeglianta?
  5. Tira la Regenza en consideraziun da decretar in concept da protecziun che vala per tut las instituziuns resguardond in management dal virus specific?

Cuira, ils 19 da zercladur 2020

Rutishauser, Clalüna, Deplazes (Rabius), Baselgia-Brunner, Brandenburger, Cahenzli-Philipp, Caluori, Cantieni, Cavegn, Degiacomi, Deplazes (Cuira), Dürler, Gasser, Grass, Hofmann, Hohl, Horrer, Kohler, Loepfe, Müller (Susch), Müller (Favugn), Papa, Perl, Preisig, Rettich, Ruckstuhl, Tanner, Thöny, Tomaschett-Berther (Trun), von Ballmoos, Widmer-Spreiter (Cuira), Wilhelm, Pajic

Resposta da la regenza

En las chasas da persunas attempadas e da tgira grischunas n'hai betg dà surpro-porziunalmain blers cas d'infecziun e mortoris. La Regenza respunda las dumondas concretas sco suonda:

Tar la dumonda 1: Las datas accessiblas publicamain sin la pagina d'internet dal chantun infurmeschan davart il dumber total d'infecziuns sco er da mortoris per re­giun. Per ils 27 d'avust 2020 hai dà 82 infecziuns cun COVID-19 sco er 28 mortoris d'abitantas e d'abitants infectads cun COVID-19 en las chasas da persunas attem­pa­das e da tgira dal chantun Grischun. Ina specificaziun pli detagliada sco per exempel la classificaziun dumandada qua tenor infecziuns en chasas da persunas attempa­das e da tgira n'è betg pussaivla per motivs da la protecziun da datas.

Tar la dumonda 2: Ils motivs per la derasaziun al cumenzament èn evidents: a l'en­tschatta da la pandemia mancava dapertut la savida co ch'ins sto – ord vista me­di­cinala – ir enturn cun in virus nov e la smanatscha n'è per part betg vegnida prendida seriusa avunda. Suenter l'introducziun da las mesiras restrictivas ed en spezial suen­ter la realisaziun consequenta da reglas d'igiena, d'isolaziun e da quarantina èn las novas infecziuns sa reducidas en general fitg svelt. Las chasas da persunas attem­padas e da tgira en il Grischun han realisà consequentamain e cun success las pre­scripziuns ch'èn vegnidas adattadas e meglieradas permanentamain.

Tar la dumonda 3: Las lavurs per analisar e per elavurar posteriuramain l'uschenum­nada "emprima unda" da la pandemia COVID-19 èn gia vegnidas prendidas per mauns il matg 2020 sa basond sin las enconuschientschas ch'èn vegnidas nudadas d'in cuntin. Per dumagnar la lavur che resulta en connex cun COVID-19 (dumondas medicinalas specificas, contact tracing, post d'annunzia per arrivs da l'exteriur, ser­vetsch giuridic, communicaziun) ha la Regenza ultra da quai installà l'avust 2020 ina partiziun COVID-19 tar l'Uffizi da sanadad. Quella vegn ad ademplir sia incumbensas per entant fin la fin da l'onn 2020 en la dimensiun da la lavur necessaria. Concernent la planisaziun en cas d'ina pandemia ha la Regenza incumbensà l'Uffizi da sanadad da repassar totalmain il plan da pandemia. Ch'i pudess dar er en il futur stretgas tar las resursas en cas d'ina pandemia da questa dimensiun, na sa lascha probablamain betg impedir. Las instituziuns èn vegnidas incumbensadas gia tenor il plan da pan­demia vertent e vegnan er ad esser incumbensadas tenor il plan da pandemia futur da tegnair sin reserva il material da protecziun necessari en ina dimensiun suffizienta e d'economisar questa reserva correspundentamain.

Tar la dumonda 4: Cun las premissas actualas sa chatta il plan directiv da plazzas gia sin il stgalim 2 da la scala da la qualitad da tgira (stgalim da qualitad da la tgira: 0 = tgira privlusa, 1 = tgira segira, 2 = tgira adequata, 3 = tgira optimala). Cun questas premissas è la cumpetenza professiunala avant maun en tut las chasas da persunas attempadas e da tgira. L'adempliment da las premissas persunalas (plan directiv da plazzas) vegn ultra da quai controllà da l'Uffizi da sanadad mintga quartal per garan­tir ch'igl è pussaivel da dumagnar ina pandemia sin basa da la qualitad da las struc­turas avant maun. Correspundentamain n'è in'adattaziun dal plan da plazzas betg necessari en ils egls da la Regenza.

Tar la dumonda 5: In concept da protecziun che vala per tut las instituziuns na para betg dad esser raschunaivel, perquai ch'in concept da protecziun po sviluppar ses effect mo, sch'el è adattà a las relaziuns individualas da l'instituziun singula. Pervia da quai èn las chasas da persunas attempadas e da tgira vegnidas supplitgadas da la Regenza ils 26 da matg 2020 da repassar lur concept da protecziun individual resguardond las enconuschientschas las pli actualas e la smanatscha specifica tras COVID-19 per lur instituziun. Tut las chasas da persunas attempadas e da tgira en il chantun Grischun han inoltrà sin quai lur concept da protecziun repassà a l'Uffizi da sanadad. En il rom da controllas casualas èn vegnidas communitgadas eventualas contestaziuns a las chasas da persunas attempadas e da tgira.

7 da settember 2020