Navigation

Inhaltsbereich

Dumonda Rutishauser concernent il dumogn da la pandemia da corona en vista a las collavuraturas ed als collavuraturs da la tgira ed assistenza

Sessiun: 19.06.2020

Il chantun ha obligà tut las persunas che han ina scolaziun en il sectur da tgira e d'assistenza e che vivan en il Grischun, da sa registrar.

Tenor l'infurmaziun da l'Uffizi da sanadad han var milli persunas ademplì questa obligaziun. L'Uffizi da sanadad ha declerà ch'ina relaziun da lavur per persunas ch'eran sa messas a disposiziun, saja vegnida reglada tras il model d'in contract da lavur da la Federaziun grischuna "chasas ed ospitals" (FCO), quai che n'è però apparentamain betg stà il cas dapertut.

Las sutsegnadras ed ils sutsegnaders drizzan pervia da quai las suandantas dumondas a la Regenza:

  1. Quantas da las persunas spezialisadas registradas èn vegnidas engaschadas da las instituziuns?
  2. Tge prescripziuns ha la Regenza fatg a talas per quai?
  3. Co ha la Regenza garantì che questas persunas èn vegnidas incaricadas effectivamain mo en connex cun la pandemia?
  4. Era avunda material da protecziun avant maun per questas persunas sco er per las ulteriuras collavuraturas ed ils ulteriurs collavuraturs?
  5. Quantas persunas che lavuran en la tgira ed assistenza èn vegnidas dispensadas temporarmain – pervia da lur appar­te­gnien­tscha ad ina gruppa da ristga – da lur lavur cun in contact direct cun pazientas e pazients?

Cuira, ils 19 da zercladur 2020

Rutishauser, Widmer-Spreiter (Cuira), Gasser, Baselgia-Brunner, Brandenburger, Cahenzli-Philipp, Degiacomi, Deplazes (Cuira), Gartmann-Albin, Hofmann, Horrer, Müller (Favugn), Perl, Preisig, Rettich, Thöny, Wilhelm, Pajic

Resposta da la regenza

Tar la dumonda 1: Il scleriment tar las instituziuns ha mussà che quellas han enga­schà 68 persunas dal fatg registradas.

Tar la dumonda 2: Il Departament da giustia, segirezza e sanadad ha elavurà models da contracts per engaschar persunas dal fatg registradas e mess a disposiziun quels a las federaziuns da las instituziuns.

Tar la dumonda 3: Intervenziuns electivas eran da princip scumandadas en ils ospi­tals cun il resultat che l'occupaziun è sa reducida fermamain tant en il sectur sta­ziu­nar sco er ambulant. Correspundentamain poi vegnir partì dal fatg che persunal sup­plementar è vegnì engaschà mo en cas d'in basegn effectiv, quai vul dir, in basegn che n'ha betg pudì vegnir cuvrì cun l'effectiv da persunal existent (per exempel sin staziuns intensivas). Co che las persunas èn vegnidas occupadas en connex cun la pandemia, na po però betg vegnir giuditgà definitivamain dal chantun.

Tar la dumonda 4: Sin dumonda da las instituziuns dal sectur da sanadad han l'Uffizi da sanadad e l'Uffizi da militar e da protecziun civila mess a disposiziun ad ura ma­terial da protecziun en la quantitad giavischada, premess ch'il chantun l'aveva sin reserva.

Tar la dumonda 5: Dals scleriments tar las instituziuns èsi resultà che 167 persunas èn vegnidas dispensadas temporarmain – pervia da lur appartegnientscha ad ina gruppa da ristga – da lur lavur cun in contact direct cun pazientas e pazients.

20 d'avust 2020