Navigation

Inhaltsbereich

Dumonda da la fracziun da la PPS concernent la reducziun da CO2 grazia al cumbat cunter food waste – Per in meglier clima en il Grischun

Sessiun: 19.06.2020

En media va mintga terza victualia a perder u vegn sfarlattada davent dal champ fin ch'ella è sin maisa. Quai èn 330 kg per persuna per onn. Ma noss nutriment ed en spezial er noss sguaz da victualias ha vastas consequenzas per il clima e per l'ambient. Il sfarlattim da mangiativas chaschuna uschè blers donns da l'ambient sco la mesadad da tut ils autos – e gist uschè bler dioxid carbonic sco il traffic aviatic.

Nus savain oz che tgi che bitta davent 1 kg maila sguazza var 820 liters aua.

Food waste datti sin tut ils stgalims da la producziun da victualias. Per exempel en l'agricultura, perquai che las victualias n'èn betg adattadas per la vendita pervia da las pretensiuns da norma. En il restaurant ed en las cantinas, sche las restanzas sin ils plats u sin il buffet vegnan dismessas, u en chasadas, sche nus na bavain per exempel betg pli l'ultim sierv en la buttiglia.

Perquai che food waste ha ina gronda influenza sin noss ambient, èsi en l'interess da la politica d'elavurar in plan d'acziun per smesar il food waste en Svizra fin l'onn 2030. Gia oz datti bleras iniziativas e blers projects che s'engaschan exactamain per questa finamira. Per exempel il restaurant 4reasons durant il WEF u l'iniziativa Save Our Food Davos, che rimna tar ils detaglists regularmain victualias ch'èn danvanz e reparta quellas a persunas basegnusas.

Las sutsegnadras ed ils sutsegnaders dumondan la Regenza:

  1. È la problematica da food waste en il Grischun sco chantun turistic cun ina ferma gastronomia ed hotellaria pli marcanta ch'en auters chantuns?
  2. Quantas tonnas food waste resultan en l'agricultura grischuna pervia da pretensiuns da norma absurdas?
  3. Co vul il chantun Grischun cumbatter cunter food waste e pia promover directamain la reducziun da CO2 sco er rinforzar l'agricultura regiunala?
  4. Nua vesa il chantun pussaivladads concretas per sustegnair e per sviluppar vinavant iniziativas localas (mesiras da promoziun)?

Cuira, ils 19 da zercladur 2020

Favre Accola, Koch, Hug, Brandenburger, Della Cà, Dürler, Gort, Salis, Weber, Renkel

Resposta da la regenza

Victualias che vegnan producidas, ma betg consumadas, genereschan emissiuns da CO2 nunnecessarias. La grevezza e las emissiuns da CO2 che food waste chaschuna per l'ambient, dependan fermamain da la derivanza e dal transport da las victualias sco er dal tip dals ruments biogens. En Svizra resultan mintga onn var 2,8 milliuns tonnas food waste. En tut la Svizra deriva la gronda part dal food waste da las chasadas (28 %) e da l'elavuraziun da victualias (35 %). Las parts che derivan da la gastronomia (7 %), dal commerzi a l'engrossa ed en detagl (10 %) sco er da l'agricultura (20 %) èn bler pli pitschnas.

Tar la dumonda 1: Cunquai ch'i dat en il Grischun dapli manaschis da gastronomia e d'hotellaria en relaziun cun il dumber d'abitantas ed abitants ch'en auters chantuns, dastgass la part da food waste esser sur la media svizra. Deplorablamain mancan cifras exactas. Sch'ins resguarda las cifras svizras sco mesira, nua ch'il food waste che deriva da la gastronomia e da l'hotellaria è quatter giadas pli bass che quel che deriva da las chasadas (196 000 tonnas envers stgars 784 000 tonnas per onn), dastgass l'impur­tan­za da questa branscha dentant esser plitgunsch pitschna. Tuttina na dastga la grevezza per l'ambient dal food waste che deriva da la gastronomia betg vegnir sutstimada. Per la producziun da las victualias a la fin da la chadaina da valurisaziun vegnan numnada­main duvradas bleras resursas e producidas bleras emissiuns. La pli gronda part dals ruments alimentars or da la gastronomia ed or da l'hotellaria vegn dentant reutilisada materialmain u energeticamain. Cumpareglià cun quella è la part che vegn duvrada per far donaziuns da victualias u per producir pavel d'animals percunter fitg pitschna. In'ulteriura pitschna part vegn utilisada termicamain. Or da l'optica da l'ambient e dal CO2 èn la donaziun e la pavlada pli raschunaivlas che la reutilisaziun materiala ed ener­getica.

Tar la dumonda 2: Davart la part dal food waste che deriva da l'agricultura grischuna na datti naginas datas. Igl è vegnida fatga ina stimaziun approximativa a maun da la re­tschertga da datas da l'Uffizi federal d'ambient (UFAM) e da l'evaluaziun chantunala da las surfatschas da culturas spezialas ch'èn fitg pitschnas en cumparegliaziun cun la Svizra bassa. Sin fundament da questas basas da datas derivan pauc dapli che 1000 tonnas food waste or da la producziun primara. La part che resulta pervia da preten­siuns da norma vegn stimada a circa 20 %. En cumparegliaziun cun auters secturs è la part or da l'agricultura grischuna pia pitschna. Circa trais quarts da las perditas or da l'agricultura grischuna vegnan restituids al terren ed in quart pavlà. Las pretensiuns da norma da l'agricultura vegnan determinadas decisivamain da las normas vertentas dal commerzi en detagl, che dependan sezzas da las pretensiuns da las consumentas e dals consuments envers la frestgadad ed envers l'apparientscha dals products.

Tar la dumonda 3: La Regenza sustegna mesiras per reducir food waste, perquai che quel chaschuna en ina moda che na dastga betg vegnir sutstimada grevezzas per l'am­bient e pia er emissiuns da CO2. Mesiras per reducir food waste vegnan perquai examinadas er en il rom dal plan d'acziun "Green Deal". Food waste fa plinavant part da las mesiras dal punct central da svilup "Agricultura grischuna neutrala al clima" en il Program da la Regenza 2021–2024. Perquai che mesiras efficazias per reducir food waste concernan l'entira chadaina da la producziun fin al consum da victualias. Centralas èn mesiras da sensibilisaziun e da furmaziun, cunquai ch'il cumportament da las consumentas e dals consuments ha ina gronda impurtanza per cumbatter cunter food waste. L'effect il pli grond vegn cuntanschì cun prender mesiras là, nua che food waste resulta, numnadamain en las chasadas ed en l'elavuraziun da victualias. Gia oz sustegnan posts da servetsch campagnas da sensibilisaziun sco "Save Food – Fight Waste" u "Tischlein deck dich". Ultra da quai collavura l'Uniun purila svizra cun l'inizia­tiva "too good to go". Plinavant promova il chantun – en il rom dal punct central da svi­lup "Meglierar la valurisaziun da l'agricultura en ina cuntrada cultivada intacta" – ils pro­ducts regiunals e las chadainas da rauba e da valurisaziun regiunalas. En quest connex è la commerzialisaziun directa in tema impurtant. En la commerzialisaziun directa na datti numnadamain naginas pretensiuns da norma envers ils products areguard lur grondezza ed areguard lur apparientscha sco en il commerzi en detagl. Quai reduce­scha considerablamain la perdita che resulta, sch'ils standards da commerzialisaziun u da qualitad na vegnan betg ademplids.

Tar la dumonda 4: (Guardar er resposta a la dumonda 3.) Iniziativas localas vegnan sustegnidas gia oz dals posts da servetsch chantunals en il rom da las pussaivladads legalas e finanzialas. En connex cun las mesiras per reducir food waste han spezial­main chadainas da producziun regiunalas e vias curtas da la rauba in grond effect. En il plan d'acziun "Green Deal" vegnan proponidas ultra da mesiras da sensibilisaziun e da furmaziun er mesiras accumpagnantas per pudair sustegnair iniziativas localas cun meds finanzials supplementars.

14 d'avust 2020