Navigation

Inhaltsbereich

Incumbensa Thomann-Frank concernent la creaziun da las premissas per l'utilisaziun futura da la transfurmaziun tar ils interprendiders

Sessiun: 19.06.2020

Il lockdown mundial vegn a transfurmar en moda decisiva la vita economica sin l'entir mund. Questas midadas ston vegnir chapidas sco transfurmaziuns a vista mesauna. Las anteriuras branschas economicas tradiziunalas ston s'adattar a questa transfurmaziun. Novs models da fatschenta ston vegnir chapids sco midada da la chadaina da valurisaziun per ch'els possian exister er en l'avegnir. Quai vala en spezial er per il turissem, per ils mastergns da producziun e per l'industria. Igl ha num d'impunder nossas stgarsas resursas cun cleras finamiras per pudair etablir novas branschas economicas cun perspectivas per il futur. Per quai dovri il curaschi da prender cumià da branschas betg innovativas e d'investir en novas branschas.

Sch'ins ha il curaschi da rectifitgar las structuras, resultan – grazia a las resursas finanzialas e persunalas che vegnan a star a disposiziun – grondas schanzas per il chantun Grischun e per sias regiuns. Per pudair sa participar uschè svelt sco pussaivel a questas midadas e transfurmaziuns e per pudair profitar da quellas vegn la Regenza incumbensada:

a)     da nominar in cussegl economic che sa cumpona da represchentantas e represchentants economics innovativs da noss chantun (naginas analistas charas e nagins analists chars da la Bassa);

b)     da far in'analisa che mussa scenaris, co che l'economia vul e duai sa sviluppar en il chantun ed en sias regiuns integrond las interprendidras ed ils interprendiders relevants, quai resguardond las mesiras ch'èn gia vegnidas prendidas e che ston vegnir decleradas;

c)     da definir co che las cundiziuns generalas pon vegnir meglieradas;

d)     da fixar co ch'ins po stgaffir plazzas da lavur;

e)     da ponderar co ch'ins tegna quint da la persistenza (persistenza en il senn d'ina realisaziun ecologica, economica e sociala);

f)      da metter a disposiziun in program d'investiziuns per sustegnair la transfurmaziun;

g)     da promover la participaziun a programs naziunals;

h)     da crear – tras smart- e homeoffice – las premissas en las regiuns per las tendenzas socialas;

i)      d'analisar tge bains che pon vegnir producids en il chantun en l'avegnir.

Cuira, ils 19 da zercladur 2020

Thomann-Frank, Loepfe, Aebli, Berweger, Brunold, Buchli-Mannhart, Caluori, Crameri, Deplazes (Rabius), Föhn, Gasser, Hardegger, Jochum, Kienz, Natter, Niggli (Samedan), Paterlini, Ruckstuhl, Sax, Schwärzel, Ulber, Widmer-Spreiter (Cuira), Zanetti (Sent)

Resposta da la regenza

La transfurmaziun structurala è ina sfida, da la quala las interpresas ed il chantun s'occupan constantamain. Las interpresas èn dumandadas da concepir lur models da fatschenta uschia, che las pretensiuns futuras pon vegnir ademplidas. A medem temp èsi ina incumbensa centrala dal chantun da metter a disposiziun cundiziuns generalas attractivas per las interpresas, per che quellas possian sa sviluppar en moda cumpetitiva e per ch'i dettia novas plazzas da lavur. Per quest intent dovran las interpresas da tut las branschas economicas in ambient giuridic che las conceda ina libertad d'agir d'interpresa e che las permetta da transfurmar lur fatschenta e da la concepir tenor ils novs basegns da la clientella. 

La pandemia da COVID-19 vegn probablamain ad accelerar la midada structurala da l'economia. En quest connex ston ins er vesair las mesiras che la Regenza ha gia prendì per dumagnar las consequenzas economicas da la pandemia da COVID-19. Las differentas mesiras immediatas per mitigiar las consequenzas economicas da COVID-19 ch'il chantun ha prendì (p.ex. garanzias solidaricas chantunalas, fond per cas da direzza) han gì la finamira da mantegnair il chapital existent da l'economia publica en vista a la perdita da dumondas a curta vista e da garantir l'existenza da las interpresas e da lur plazzas da lavur. A media fin a lunga vista vegn il focus mess sin mesiras per ir enturn cun la midada structurala accelerada e sin mesiras per rin-forzar en general l'attractivitad da l'economia locala dal chantun. La finamira è quella da gidar a lunga vista ad augmentar la capacitad d'innovaziun e la resilienza da las interpresas sco er a diversifitgar la structura economica.

Tar ils puncts a e b: Per quest intent èn vegnidas incumbensadas il zercladur 2020 las organisaziuns da tetg da l'economia grischuna (incl. la Societad grischuna dals impressaris constructurs), il Forum economic dal Grischun sco er la Cuminanza d'in-teress per il turissem en il Grischun d'elavurar las basas strategicas necessarias per sviluppar mesiras d'impuls a favur da l'economia grischuna. Ulteriuras represchen-tantas ed ulteriurs represchentants da l'economia e da las interpresas pon vegnir integrads tenor basegn e tenor project. En il rom da questas lavurs è gia vegnida fatga in'analisa fundada d'eventuals scenaris. Questas lavurs vegnan adina puspè actualisadas tut tenor il svilup da la pandemia.

Tar ils puncts c, d ed e: Las cundiziuns generalas meglieradas e la creaziun da plaz-zas da lavur stattan en il center da las ponderaziuns che vegnan fatgas en ils pro-grams d'impuls menziunads. Las mesiras structuralas ch'èn vegnidas prendidas oravant tut a lunga vista, han la finamira d'augmentar l'attractivitad da l'economia locala dal chantun. La fundaziun dal Tecnoparc Grischun, che ha gia gì lieu, è mo in exempel per quai. L'orientaziun da las mesiras tenor las trais dimensiuns da la per-sistenza è ina norma essenziala per la Regenza per metter las prioritads strategicas.

Tar ils puncts f ed i: Cun ils instruments da promoziun che sa basan sin la Lescha davart il svilup economic sco er sin la Lescha davart la promoziun da la transfurma-ziun digitala, posseda il chantun las basas legalas necessarias per dar impuls finan-zials per che las interpresas investeschian en la transfurmaziun (digitala). Però las mesiras pon mo vegnir promovidas, sche las interpresas ed ils furniturs da presta-ziuns inizieschan projects correspundents. Il chantun surpiglia qua la rolla da dar sustegn.

Tar il punct g: La colliaziun cun las mesiras federalas e cun ils programs federals è garantida. Sco exempel sajan menziunads qua ils sistems d'innovaziun regiunals cun la stretga colliaziun cun Innosuisse ubain l'orientaziun da la strategia d'innovaziun chantunala a la rait da Switzerland Innovation. Interpresas interessadas cun projects che han bunas perspectivas survegnan in sustegn per s'integrar en raits e programs naziunals.

Tar il punct h: Cun il concept da promoziun «Bindel ultralad Grischun» ch'è vegnì deliberà da la Regenza il november 2018, è vegnida creada la premissa per ina avertura confurma als basegns ed è vegnì lantschà il svilup da furmas da lavur impurtantas per l'economia regiunala. 

Sa basond sin questas explicaziuns propona la Regenza al Cussegl grond da midar questa incumbensa sco suonda: 

Per respunder questas dumondas e per sviluppar eventualas soluziuns coordinescha la Regenza in barat tranter interprendidras ed interprendiders grischuns. Per quest intent duain vegnir evaluads e priorisads ils potenzials da las interpresas en conse-quenza da la pandemia dal coronavirus (p.ex. prolungaziun da la chadaina da crea-ziun da valur tras in insourcing intermanaschial) e duain vegnir examinadas eventua-las instituziuns responsablas adattadas.

7 da settember 2020