Per resumar poi vegnir constatà che la realisaziun da las recumandaziuns d'agir proponidas è avanzada fermamain. Differentas recumandaziuns èn er gia vegnidas realisadas. L'elavuraziun autocritica da las recumandaziuns d'agir è d'ina impurtanza centrala per la Regenza. Controllas correspundentas da la realisaziun èn vegnidas installadas.

Tar la dumonda 1:

Per scolar e per sensibilisar tut las collavuraturas e tut ils collavuraturs dal chantun Grischun per las reglas da recusaziun en proceduras è vegnì sviluppà en la cumpe­tenza da l'Uffizi da persunal in codex da cumportament cumplessiv ch'è vegnì pre­schentà a la Regenza sco sboz. Il tema da la recusaziun duai plinavant vegnir inte­grà en las scolaziuns per tut las novas collavuraturas e tut ils novs collavuraturs dal chantun sco er per tut las novas persunas superiuras. L'Uffizi chantunal dal ser­vetsch social ha medemamain surpiglià la recumandaziun da sensibilisar las colla­vuraturas ed ils collavuraturs areguard la recusaziun. Directivas per ir enturn cun conflicts d'interess èn vegnidas elavuradas ed integradas en il sistem per il manage­ment da la qualitad. Ultra da quai vegn il tema da l'uffizi accessoric e da l'engascha­ment voluntar en organisaziuns tematisà regularmain e reflectà areguard conflicts d'interess pussaivels. Il proceder vegn cumprovà cun documents standardisads. Tar la Polizia chantunala è la scolaziun areguard las reglas da recusaziun in tema gia en l'instrucziun da basa da las polizistas e dals polizists. Plinavant è l'obligaziun da do­cumentaziun vegnida precisada tar la Polizia chantunala. Per motivs da la cumpletta­dad vegn ussa er explitgà en moda transparenta, pertge che la polizia n'exequescha eventualmain gist betg acziuns en in cas. La documentaziun da l'agir polizial vegn garantida tras il sistem da rapportaziun ABI resp. tras il nov myABI. En tut la Svizra lavuran 19 corps da polizia cun quest sistem da rapportaziun. La tecnica da docu­mentaziun e l'intent da la documentaziun vegnan tematisads, scolads e controllads cuntinuadamain. L'utilisaziun e la controlla da la documentaziun restan incumbensas da scolaziun centralas. Plinavant ha la Polizia chantunala extendì ils rapports dal cader da las partiziuns. Quels vegnan er duvrads per scolaziuns supplementaras dal cader, per exempel per barattar vicendaivlamain infurmaziuns davart cas currents. Uschia èn vegnids meglierads la communicaziun interna ed il transfer da savida.

Per ils medis uffizials è vegnida instradada ed è planisada ina furmaziun supplemen­tara davart il tema dal "plazzament per motivs da provediment". Ultra da quai vegnan revedids las directivas ed il manual en chaussa. L'Uffizi da sanadad è actualmain dumandà fermamain en connex cun la superaziun da la pandemia dal coronavirus. Las lavurs correspundentas per realisar las mesiras èn perquai vegnidas suspendi­das ad interim.

Las Autoritads per la protecziun d'uffants e da creschids (APUC) han gia realisà la recumandaziun che tut ils andaments e tut las infurmaziuns stoppian vegnir docu­mentadas gia avant che la procedura vegnia averta. Per quest intent ha ella relaschà ina directiva e scolà correspundentamain sias collavuraturas e ses collavuraturs.

L'optimaziun da la communicaziun en scrit è in process permanent che vegn cuntinuà.

Tar la dumonda 2:

Sin basa da las finamiras strategicas dal Departament da giustia, segirezza e sana­dad (DGSS) ha la Polizia chantunala cumenzà avant passa dus onns cun l'examina­ziun da las prestaziuns e da las incumbensas sco er da l'organisaziun da las struc­turas. La finamira da questa examinaziun è stà quella da qualifitgar la Polizia chantu­nala per dumagnar las grondas sfidas actualas e futuras cun in'organisaziun adat­ta­da, moderna e flexibla. En l'emprima fasa è vegnida controllada e fixada da nov la structura da commando, en spezial en il sectur da las substituziuns e da la gestiun publica effizienta. En ina segunda fasa è vegnida analisada e concepida da nov l'or­ganisaziun da commando areguard las prestaziuns che ston vegnir furnidas, are­guard ils andaments, areguard las cumpetenzas ed areguard las responsabladads.

En la scolaziun è vegnida meglierada la regulaziun da la scolaziun ed è vegnì intro­ducì in controlling da la scolaziun incl. controlla da l'efficacitad. En tut las scolaziuns da direcziun da la Polizia chantunala sa tracti da las dumondas da manar acziuns per dumagnar eveniments e da manar il persunal en il mintgadi. Quai èn duas diffe­rentas furmas ed incumbensas directivas ch'èn tuttas duas pretensiusas. La scola­ziun da direcziun da las uffizieras e dals uffiziers da polizia incl. las uffizieras ed ils uffiziers da pichet dal commando è vegnida optimada. Latiers tutga tranter auter in program d'introducziun da plirs mais per scheffas e schefs da regiun futurs u per uffizieras ed uffiziers da polizia futurs avant l'entrada en uffizi. Supplementarmain èn vegnids fatgs coachings sin il stgalim da las uffizieras e dals uffiziers sco er da las scheffas e dals schefs da servetsch. Per augmentar la qualitad en la direcziun è il dumber da 14 collavuraturas e collavuraturs per manadra u manader vegnì reducì a maximalmain 5 fin 7 collavuraturas e collavuraturs. Questa nova organisaziun da commando (reorganisaziun e rinforzament da la Polizia chantunala sin plaun dal commando) ed il project current "Ulteriur svilup da la structura dals posts" contri­bueschan supplementarmain ad optimar ils process e las acziuns.

Tar la dumonda 3:

Sco quai ch'igl è fixà en l'art. 5 al. 1 da la Constituziun dal chantun Grischun (DG 110.100) ed en l'art. 5 al. 1 da la Constituziun federala da la Confederaziun svizra (CS 101), è il dretg la basa ed il limit da l'activitad dal stadi. Resguardond quest princip examinescha la Regenza las recumandaziuns e deducescha da quellas sias acziuns. Quest proceder vala da princip.

Sche questa dumonda tematisescha la circumstanza, che las recumandaziuns dal rapport da la CPI renvieschan a la "basa giuridica mancanta per liar persunas en il context d'escortas per auters posts da servetsch", stoi vegnir menziunà ch'i vegnan anc fatgs scleriments en chaussa, perquai che la situaziun giuridica n'è betg clera. La problematica è dentant identifitgada.

1. da mars 2021