Navigation

Inhaltsbereich

Sessiun: 09.12.2020

Sin basa da la dumonda dal deputà Gian Michael en l'ura da dumondas durant la sessiun da december 2020 inoltrescha la Cumissiun per giustia e segirezza la suandanta incumbensa da cumissiun. Las directivas da la refurma da las dretgiras 3 èn vegnidas concludidas dal Cussegl grond en la sessiun da zercladur 2019. En quest rom è previsa la reuniun da la Dretgira chantunala vertenta e da la Dretgira administrativa vertenta ad ina Dretgira superiura. La reuniun premetta ina sedia unida da las dretgiras da bel principi. Er suenter ils ultims eveniments en las dretgiras superiuras sto vegnir priorisada la refurma da las dretgiras. En quest connex incumbensescha la CGS la Regenza sco suonda:

  1. La Regenza conferma che la strategia d'immobiglias dal chantun Grischun n'ha nagina influenza sin la realisaziun temporala da la refurma da las dretgiras 3.
  2. La Regenza vegn a tractar las dumondas areguard las localitads da la nova Dretgira superiura cun prioritad sco er ordaifer ed independentamain da la strategia chantunala d'immobiglias.
  3. La Regenza mussa opziuns per metter a disposiziun a temp il vegl edifizi chantunal.

Tavau, ils 9 da december 2020

Derungs, Schutz, Cantieni, Casty, Flütsch, Müller (Favugn), Perl, Salis, Widmer (Favugn)

Resposta da la regenza

En sia sessiun da december 2009 ha il Cussegl grond prendì enconuschientscha da la strategia chantunala d'immobiglias che prevesa da stgaffir nov centers administra­tivs regiunals, ed acceptà cun gronda maioritad la varianta d'execuziun "sinergia" che vegn realisada en etappas a Cuira ("rapport davart la strategia d'immobiglias dal chantun – realisaziun da la strategia a Cuira" dals 22 da settember 2009, carnet nr. 6 / 2009-2010). En la sessiun d'october 2011 ha il Cussegl grond prendì enconuschientscha da la realisaziun dal center administrativ "sinergia" en duas etappas a Cuira ed approvà l'edifizi nov da l'emprima etappa per 69 milliuns francs (carnet nr. 5 / 2011-2012). Las dretgiras chantunalas superiuras èn vegnidas inte­gradas expressivamain en la strategia chantunala d'immobiglias per Cuira. Obser­vond lur dretg constituziunal d'autonomia han ellas approvà il zercladur 2011 ina decleraziun d'intenziun cuminaivla cun la Regenza. Quella prevesa da duvrar l'edifizi chantunal a la Grabenstrasse – suenter la realisaziun da la segunda etappa da "sinergia" e suenter la midada da chasa previsa da l'Uffizi chantunal da construcziun bassa – il pli baud a partir da l'onn 2023, suenter in temp da renovaziun da circa 2 onns, sco sedia per ina futura Dretgira superiura.

Pervia da differentas proceduras legalas sco er la finala pervia da la pandemia da COVID-19 ha l'emprima etappa da "sinergia" pudì vegnir retratga pir il settember 2020 cun in retard da circa 4 onns envers la planisaziun oriunda. Sche la strategia d'immobiglias planisada per Cuira vegniss cuntinuada senza midadas, pudess ina Dretgira superiura pia retrair l'edifizi chantunal il pli baud l'onn 2030. Quests retards chaschunan in conflict temporal cun la refurma currenta da las dretgiras, la quala cuntegna ina fusiun da las duas dretgiras chantunalas superiuras. Tenor l'urari actual èsi planisà da tractar la missiva correspundenta en il parlament il zercladur 2022. La perioda d'uffizi da las derschadras e dals derschaders ch'il Cussegl grond ha elegì durant la sessiun passada d'avust (per ina durada d'uffizi ordinaria) en la Dretgira chantunala ed en la Dretgira administrativa dura fin ils 31 da december 2024.

Durant ils ultims 10 onns han sis dals nov centers administrativs planisads en las regiuns pudì vegnir realisads definitivamain. Avant che cumenzar cun ils projects pendents da la strategia d'immobiglias, duai vegnir fatg in rapport al Cussegl grond davart il stadi da la strategia chantunala d'immobiglias. Sin fundament dals ultims conclus e da las ultimas discussiuns dal parlament en connex cun la refurma da las dretgiras mussa quest rapport er las opziuns d'agir per metter a disposiziun l'edifizi chantunal prioritarmain per ina Dretgira superiura. Ultra da quai duai il rapport pre­schentar ils svilups actuals vers furmas da lavur pli flexiblas (homeoffice, lavur mobila, desksharing e.u.v.) e lur consequenzas per la strategia d'immobiglias.

Tar ils puncts 1, 2 e 3: Tenor la decleraziun d'intenziun concludida tranter la Regenza e las dretgiras chantunalas superiuras e tenor ils conclus dal Cussegl grond èn las dretgiras integradas en la strategia chantunala d'immobiglias ch'è concepida a lunga vista. Ellas na pon betg vegnir statgadas da quella, sch'ellas dovran in edifizi ch'è en proprietad dal chantun. Cun la brev das 18 da schaner 2021 han ils (dus) presidents da la Dretgira chantunala e da la Dretgira administrativa confermà – en il rom da l'examinaziun dal basegn da spazi – ch'els veglian restar fidaivels a l'edifizi chantu­nal. A medem temp han els supplitgà la Regenza da pussibilitar – eventualmain cun ina midada da la strategia chantunala d'immobiglias – da retrair l'edifizi chantunal pli baud che l'onn 2030. Tenor las dretgiras na saja quai betg necessari da tschertgar soluziuns provisoricas u lieus alternativs.

En il rapport davart la strategia d'immobiglias che la Regenza ha annunzià vegn ella a preschentar – sin fundament dals ultims conclus e da las ultimas discussiuns dal Cussegl grond sco er per coordinar tut cun la refurma currenta da las dretgiras – propostas da variantas che prevesan d'occupar uschè svelt sco pussaivel l'edifizi chantunal cun ina Dretgira superiura e da divergiar da la strategia d'immobiglias ver­tenta. Tenor il stadi actual dals scleriments da l'Uffizi chantunal da construcziun auta dastgass ina retratga esser pussaivla il pli baud mez da l'onn 2025, pervia dals ter­mins da referendum che ston vegnir spetgads e pervia da las proceduras da planisa­ziun, d'approvaziun e da submissiun che pon vegnir effectuadas pir suenter.

Sa basond sin questas explicaziuns propona la Regenza al Cussegl grond da midar questa incumbensa sco suonda: La Regenza vegn incumbensada da preschentar al Cussegl grond – en il rom d'in rapport davart la strategia d'immobiglias – opziuns d'agir per occupar l'edifizi chantunal prioritarmain cun ina futura Dretgira superiura.

3 da mars 2021