Navigation

Inhaltsbereich

Dumonda Favre Accola concernent l'amplificaziun da la lingia dal Partenz da la Viafier retica

Sessiun: 18.02.2021

Il traject Landquart – Claustra da la Viafier retica è il traject-tschep per trais destinaziuns:

•        Landquart – Claustra – Tavau (-Filisur)

•        Landquart – Claustra – Scuol

•        Landquart – Claustra – San Murezzan

Tranter Landquart e Schiers curseschan anc mintga ura trens da la viafier S.

Il grad da construcziun da questa lingia frequentada fermamain na correspunda gia daditg betg pli a las pretensiuns per ina purschida d'urari svelta, concentrada ed uschia attractiva en il Partenz. Pervia dals lungs trajects cun in binari datti sin questa lingia ultra da quai fitg blers retards.

En il studi «Zu(g)kunft Graubünden» ch'è vegnì fatg l'onn 2001 per incumbensa da l'anteriur Post spezialisà per il traffic public e da l'Uffizi per il svilup dal territori èn vegnidas enumeradas en il chapitel «6. Mesiras per accelerar e per augmentar la prestaziun da la rait da la Viafier retica» las suandantas propostas per la lingia dal Partenz:

«La finamira sto esser in traject cun dus binaris tranter Landquart e Claustra. Sco finamiras d'etappa duain vegnir accelerads ils suandants projects da construcziun:

1. lingia cun dus binaris senza interrupziun da la staziun da Landquart sur Malans – Chlus (fin avant il tunnel), emprima prioritad ha il traject Malans Viafier retica fin al tunnel Chlus;

2. construcziun d'in nov trassé a Grüsch (per lung da la via da sviament da Grüsch) per il traffic da trens rapids senza fermadas a Grüsch;

3. construcziun d'in nov trassé per ils trajects Fideris – Küblis e Küblis – Claustra;

4. amplificaziun da la staziun da Schiers (perruns accessibels senza traversar ils binaris), lingia cun dus binaris en direcziun da Grüsch fin a la punt da la Viafier retica sur la via da sviament dal Partenz.

Cun questas propostas da construcziun po d'ina vart vegnir augmentada la prestaziun e po da l'autra vart vegnir reducì fermamain il temp da viadi.»

Dapi lura èn in pèr chaussas vegnidas realisadas resp. èn en planisaziun (concept dal territori Partenz / Tavau 2020), bler però anc betg.

La lingia dal Partenz da la Viafier retica vegn a vegnir duvrada supplementarmain anc pli fitg en vista a la lingia da colliaziun da viafier en discussiun Scuol (– Val Müstair) – Mals. Oravant tut è necessaria ina clera acceleraziun per trens rapids.

La Regenza vegn dumandada:

  1. Tge tenuta ha la Regenza envers la pretensiun d'amplifitgar il traject Landquart – Küblis cumplettamain a dus binaris? Cun tge custs fissi da far quint?
  2. Quant lunsch èn progredids ils projects d'in sviament da Grüsch per trens rapids per lung da la via da sviament? Tge documents e tge calculaziuns dals custs existan concretamain?
  3. È la Regenza er da l'avis che la lingia existenta sto vegnir mantegnida, er sch'ina nova lingia vegn construida a Grüsch, e quai per ch'il center dal vitg da Grüsch restia accessibel uschè bain sco pussaivel (incl. ina fermada supplementara a Grüsch ost per trens locals)?
  4. Quant lunsch è progredì il project per la construcziun dal traject nov Fideris – Dalvazza che vegn planisà sco project cumbinà cun la via naziunala A 28?
  5. È la Regenza er da l'avis che tut ils trajects novs ston vegnir construids da bel principi cun dus binaris? Quant gronda è la differenza dal custs per ina lingia cun dus binaris envers ina lingia cun in binari, che sto posteriuramain tuttina vegnir engrondida ad ina lingia cun dus binaris? Quant temp po vegnir spargnà sin la lingia Landquart – Tavau grazia a questas mesiras d'amplificaziun?
  6. Resguarda la Regenza il project da generaziuns da spustar la staziun da Tavau Vitg er sco ina mesira d'infrastructura impurtanta per cuntanscher in meglierament signifitgant da la purschida da l'axa dal Partenz?

Tavau, ils 18 da favrer 2021

Favre Accola, Bettinaglio, Gort, Atanes, Bigliel, Brandenburger, Cahenzli, Caviezel (Cuira), Censi, Degiacomi, Della Cà, Derungs, Dürler, Engler, Felix, Flütsch, Gartmann-Albin, Hardegger, Hartmann-Conrad, Hefti, Holzinger-Loretz, Horrer, Hug, Jenny, Kienz, Koch, Lamprecht, Müller (Favugn), Müller (Susch), Niggli (Samedan), Niggli-Mathis (Grüsch), Perl, Preisig, Rettich, Rutishauser, Salis, Schwärzel, von Ballmoos, Weber, Widmer (Favugn), Wilhelm, Pajic, Renkel, Spadarotto

Resposta da la regenza

Dapi sia avertura l'onn 1889 è il traject da la Viafier retica (VR) Landquart – Claustra vegnì renovà permanentamain e trassà per part da nov cun tunnels. Ultra da quai èn vegnidas renovadas numerusas staziuns, construidas las inslas da dus binaris las pli impurtantas en las regiuns da Landquart, da Schiers, da Furna, da Küblis e da Claustra ed eliminads passadis da viafier a nivel. Cun il nov tunnel da viafier concludì a Fideris sco er cun las renovaziuns a Landquart ed a Saas vegn augmentada vinavant la valur dal traject, uschia ch'el po ademplir anc meglier sia funcziun sco apportader en direcziun da Tavau, da Scuol e da San Murezzan.

Tar la dumonda 1: Tenor il conclus federal dals 19 da zercladur 2019 davart il proxim pass d'engrondiment da las viafiers (STEP 2030/35) èn previs ulteriurs engrondiments er en il Partenz: ultra da la staziun da Landquart (perrun cuminaivel VFF/VR, engrondiment dals stabiliments per il traffic da rauba) en spezial l'acceleraziun en la regiun da Fideris che smesa il temp da viadi ed augmenta la capacitad dal traject. La prolungaziun da la lingia cun binaris dubels Landquart – Malans en direcziun dal tunnel da la Clus vegn gia construida. La construcziun da la prolungaziun da la lingia cun binaris dubels da Claustra Plaz fin a la staziun prolungada da Claustra Vitg vegn cumenzada bainbaud. Sch'i vegniss anc realisà in sviament (da viafier) da Grüsch, avess la part la pli gronda da la lingia Landquart – Küblis dus binaris; en il sectur dals lieus da cruschada dal sistem fissan alura disponiblas lungas inslas da dus binaris che permettan in andament speditiv dal manaschi.

Tar la dumonda 2: En il Plan directiv chantunal "Traffic" (PDChant-T) èn previs sut il numer d'object 28.TB.01 ulteriurs trajects a dus binaris tranter Landquart e Claustra per augmentar la prestaziun. In element da quai pudess esser in sviament da Grüsch. Quest – sco er auters projects d'infrastructura – stuessan però l'emprim vegnir integrads en il proxim pass d'engrondiment da las viafiers STEP 2040/45. Davart ils custs na pon mumentanamain vegnir fatgas naginas indicaziuns.

Tar la dumonda 3: La concepziun d'in sviament da Grüsch che sto anc vegnir fixada cun in u cun dus binaris resp. l'eventuala construcziun d'ina nova staziun per render accessibel il territori industrial Grüsch/pendiculara Danusa vegn ad influenzar essenzialmain la dumonda, sch'il traject existent duai restar vinavant en funcziun.

Tar la dumonda 4: Grazia al nov trassé concludì en la regiun da Fideris cun il tunnel da viafier Fideris – Dalvazza resp. cun barattar il trassé cun la via chantunala e naziunala resultan avantatgs per tuts dus purtaders da traffic. Actualmain vegni lavurà vi d'in project d'exposiziun.

Tar la dumonda 5: Sch'i vegn construì da bel principi ina lingia cun dus binaris, sch'in traject nov vegn construì, sto vegnir examinà en il cas singul. En spezial ston vegnir cumparegliadas ina cun l'autra las consequenzas per las finanzas e per las concessiuns sco er il niz per il manaschi. Il gudogn da temp da viadi tranter Landquart e Tavau na dependa betg mo da las mesiras prendidas per engrondir l'infrastructura, mabain essenzialmain er da la politica da fermada dals trens e dal material rullant che vegn duvrà.

Tar la dumonda 6: Il project per spustar la staziun da Tavau Vitg inclusiv la construcziun d'ina nova staziun da bus è ina mesira d'infrastructura impurtanta che permetta da colliar meglier ils differents meds da traffic (viafier, bus, funiculara, traffic individual, traffic da pedunas e peduns e da velos) e che ademplescha a medem temp las pretensiuns da la Lescha davart l'egualitad da persunas cun impediments. Ultra da quai pon cun quest concept general vegnir schliads problems architectonics urbanistics. La Regenza sustegna il project en il rom da sias pussaivladads.

3 da matg 2021