En il sectur dals tests ha il chantun Grischun surpiglià ina rolla da piunier en Svizra. Cun testar en moda intensiva er persunas asintomaticas duain vegnir tegnidas sut controlla las infecziuns er senza lockdown, fin ch'ina gronda part da la populaziun è vaccinada.
Il cumenzament da favrer èn vegnids lantschads ils tests en ils manaschis sco part d'ina strategia da test cumplessiva. Fin ussa han numerus manaschis cun plirs dieschmilli collavuraturas e collavuraturs consentì da sa participar als tests u gia cumenzà a far ils tests.
Ils manaschis prendan sin sai ina tscherta lavur pertutgant il marketing intern per augmentar la prontezza per ils tests sco er pertutgant la logistica. Quai cun la finamira d'interrumper a temp las chadainas da transmissiun per proteger las collavuraturas ed ils collavuraturs e la clientella, però er en l'interess da la generalitad.
Ultra da quai surpiglian ils manaschis ina part dals custs dad actualmain 8.50 francs per test. En vista a las expensas per realisar ils concepts da protecziun, ch'èn insumma grondas, è quai per tscherts manaschis anc adina in impediment considerabel per sa participar als tests.
Per concepir la strategia dals tests en ils manaschis, ch'è gia fitg buna, en ina moda anc pli efficazia a favur da la protecziun da la populaziun incumbenseschan las sutsegnadras ed ils sutsegnaders:
- Il chantun duai surpigliar cumplettamain ils custs dals tests en ils manaschis (eventualmain ensemen cun la Confederaziun).
- Las participaziuns als custs ch'ils manaschis han eventualmain gia pajà, ston vegnir restituidas a tals.
- Ils tests ch'èn gia vegnids fatgs duain vegnir pajads anticipadamain als manaschis ch'èn actualmain participads, fin ch'il Cussegl grond ha prendì ina decisiun.
Tavau, ils 18 da favrer 2021
Hohl, Koch, Bettinaglio, Berweger, Brunold, Caluori, Cantieni, Caviezel (Cuira), Censi, Clalüna, Collenberg, Danuser, Degiacomi, Della Cà, Derungs, Dürler, Ellemunter, Engler, Epp, Felix, Gartmann-Albin, Giacomelli, Gort, Gugelmann, Hardegger, Hartmann-Conrad, Hefti, Holzinger-Loretz, Jochum, Kasper, Kohler, Kunz (Fläsch), Lamprecht, Loepfe, Loi, Maissen, Mittner, Müller (Favugn), Müller (Susch), Natter, Niggli (Samedan), Papa, Perl, Pfäffli, Rettich, Rüegg, Salis, Schutz, Stiffler, Tanner, Thomann-Frank, Thür-Suter, von Ballmoos, Weidmann, Wellig, Widmer-Spreiter (Cuira), Wilhelm, Altmann, Decurtins-Jermann, Heini, Pajic, Tomaschett (Cuira)