Navigation

Inhaltsbereich

Dumonda da la fracziun da la PPS concernent l'integraziun dal tunnel dal Veraina en la rait da vias naziunalas cun l'intent da finanziar l'extensiun da la part per transportar autos cun daners da las vias

Sessiun: 18.02.2021

Il traject da via Landquart – Selfranga è ina part da la rait da vias naziunalas. Il tunnel da via Gotschna è vegnì construì da la Confederaziun cun meds finanzials da las vias naziunalas sco access al tunnel da via dal Veraina. I n'è betg chapaivel, pertge ch'il transport d'autos tras il tunnel dal Veraina n'è betg er ina part da la rait da vias naziunalas (dal rest er betg quel tras il tunnel da culminaziun dal Lötschberg, percunter bain las vias d'access dal nord e dal sid!).

Il transport d'autos tras il Veraina è senza dubi in model da success. Il success è uschè grond ch'i s'imponan extensiuns pli grondas da la capacitad durant ils proxims onns. Ultra da quai sto il material rullant vegnir renovà.

Pervia da quai s'impona ina midada dal sistem: il traject da via dal tunnel dal Veraina sto vegnir classifitgà sco part da la via naziunala. Uschia crodan las restructuraziuns ch'èn necessarias da vart da la via en il sectur da cumpetenza da la cassa stradala federala (stabiliments per chargiar ils vehichels, material rullant, extensiun da la capacitad en il tunnel).

La cumbinaziun da trens d'autos e da trens da persunas da la Viafier retica chaschuna problems adina pli gronds en il tunnel dal Veraina. Senza ulteriurs lieus da cruschada resp. da sviament vegn la capacitad dal tunnel dal Veraina adina a restar limitada. Il tunnel dal Veraina è in traject parzial impurtant da las lingias Landquart – Scuol e Landquart – San Murezzan.

Er en connex cun la colliaziun da viafier discutada da l'Engiadina Bassa en la part sura dal Vnuost èsi indispensabel d'engrondir la capacitad da la lingia dal Veraina. Pervia da quai s'impona ina clera separaziun en «transport d'autos» ed en «traffic da la Viafier retica». Il transport d'autos tras il Veraina sto vegnir integrà en la rait da vias naziunalas. Sch'il transport d'autos tras il Veraina daventass ina part da la rait da vias naziunalas, pudess el da princip er vegnir duvrà cun la vignetta d'autostrada, quai na sto dentant betg esser il cas.

Cun l'integraziun dal transport d'autos en la rait da vias naziunalas n'è betg colliada a medem temp la pretensiun ch'il transport d'autos duai esser gratuit. Tenor l'art. 82 al. 3 da la Constituziun federala po l'Assamblea federala permetter excepziuns da l'exemziun da taxas. Il transport d'autos tras il Veraina fiss senza dubi ina tala excepziun. Il transport tras il tunnel dal Veraina dastga en mintga cas custar insatge. L'autezza dals custs sto alura vegnir fixada cun la cassa stradala federala e betg mo unicamain cun il chantun Grischun. En quest connex èsi da resguardar che tariffas favuraivlas n'èn betg mo en il senn da la populaziun grischuna profitadra, mabain ch'ellas ston er vegnir considerada or da l'optica da la promoziun da l'economia (turissem).

Ultra da quai poi anc vegnir menziunà che la Confederaziun po surdar il transport d'autos (gestiun, extensiun) vinavant a la Viafier retica, er sch'il tunnel dal Veraina è classifitgà sco via naziunala, cf. art. 38 Cst.

Nus dumandain la Regenza:

  1. Tge posiziun ha la Regenza envers la surpigliada dal transport d'autos tras il tunnel dal Veraina en la rait da vias naziunalas? Tge avantatgs e tge dischavantatgs ha quai per il chantun Grischun, per la Viafier retica?
  2. Per tge import vegniss il quint annual dal chantun e quel da la Viafier retica a sa midar, sch'il tunnel dal Veraina vegniss integrà en la rait da vias naziunalas?
  3. È la Regenza pronta da tematisar e d'elavurar ina intervenziun correspundenta en in discurs cun las parlamentarias ed ils parlamentaris federals dal Grischun, eventualmain ensemen cun ils chantuns Berna e Vallais en la dumonda dal transport d'autos tras il Lötschberg?

Tavau, ils 18 da favrer 2021

Favre Accola, Salis, Della Cà, Brandenburger, Dürler, Gort, Hefti, Koch, Renkel

Resposta da la regenza

En cas dal tunnel dal Veraina sa tracti d'ina infrastructura da viafier che vegn finanziada en emprima lingia sur il fond per l'infrastructura da viafier (FIV), tant il mantegniment current sco er la renovaziun da l'infrastructura. La legislaziun federala davart l'utilisaziun da la taglia liada sin l'ieli mineral e d'auters meds destinads al traffic sin via ed al traffic aviatic (LUMin; CS 725.116.2) prevesa ultra da quai contribuziuns d'investiziun sco er da gestiun per il transport da vehichels a motor accumpagnads, uschia che quest transport po gia oz vegnir finanzià cun meds da la finanziaziun speziala dal traffic sin via. Il transport dad autos da la Viafier retica (VR) tras il tunnel dal Veraina vegn manà anc oz sin agen quint. Surchargià è il Veraina mo a tschertas fins d'emna da l'enviern. Cun ina grevezza supplementara pervia da la prolungaziun da la Viafier dal Vnuost na stoi betg vegnir fatg quint durant ils proxims 20 onns.

Tut ils stabiliments da chargiar autos e tut il material rullant duvrà en Svizra ston vegnir modernisads totalmain ils proxims onns. Cun il credit d'impegn da 60 milliuns francs che la Confederaziun aveva gia deliberà l'onn 2018 han pudì vegnir realisads ils projects da renovaziun prioritars tar ils stabiliments da chargiar autos e tar il material rullant duvrà. Da quels daners ha er la VR pudì profitar per il Veraina.

Tar la dumonda 1: L'integraziun d'in tunnel da viafier en la rait da vias naziunalas fiss in novum. En connex cun il Conclus federal davart la rait da vias naziunalas (NEB), ch'è en vigur dapi l'onn 2020, è la Confederaziun gia sa fatschentada cun questa dumonda ed ha definì il transport d'autos tras il Lötschberg sco part da l'infrastructura da viafier. L'inscripziun da novs trajects en la rait da vias naziunalas è chaussa da la Confederaziun. La Confederaziun (Uffizi federal da vias [UVIAS] ed Uffizi federal da traffic [UFT]) sa stenta da far ina cunfinaziun adattada da l'infrastructura da via e da l'infrastructura da viafier. Sco che la debatta menziunada qua survart davart il transport d'autos tras il Lötschberg ha mussà, na surpiglia il UVIAS da princip naginas infrastructuras per transportar autos. Perquai ch'il transport d'autos cun la viafier vegn gia oz finanzià sur la finanziaziun speziala dal traffic sin via, na resultassan per il chantun Grischun ni avantatgs ni dischavantatgs da la midada dal sistem.

Tar la dumonda 2: Sco declerà sut la dumonda 1 na sa tschenta betg la dumonda da midar ils quints annuals da la VR e dal chantun. Ina indemnisaziun dals custs da manaschi dal transport d'autos tras il Veraina che n'èn betg cuvrids en l'avegnir en consequenza d'ulteriuras investiziuns da renovaziun en il material rullant è chaussa da la Confederaziun. Pervia da quai na resulta er qua nagina midada en il quint da la VR sco er dal chantun.

Tar la dumonda 3: Sco che las explicaziuns qua survart mussan, avess ina intervenziun en reguard ad ina inscripziun dal tunnel dal Veraina en la rait da vias naziunalas mumentanamain pauc success. Quai tant dapli, perquai che sin plaun naziunal è ultra da quai pendent resp. sto anc vegnir tractà en il plenum il postulat dal cusseglier naziunal Bregy (nr. 19.3781) che tschenta la medema dumonda. Pervia da quai èsi recumandabel da spetgar en chaussa. Tut tenor il resultat da las debattas è la Regenza pronta da revegnir pli tard a questa tematica.

3 da matg 2021