Navigation

Inhaltsbereich

Incumbensa Widmer (Favugn) concernent la creaziun d'in concept chantunal general per mesiras preventivas cunter il littering en il chantun Grischun

Sessiun: 18.02.2021

Il chantun Grischun è in chantun turistic. Particularmain la stad 2020 ha il turissem gì grond success. L'autra vart dal success è però adina dapli littering (laschar enavos il rument) en consequenza da las bunas frequenzas. Quai chaschuna grondas consequenzas economicas (nettegiament sin donn e cust dal maun public), agriculas e visualas evidentas. Spezialmain en il turissem èsi decisiv che nus tegnian netta nossa natira, perquai che in dals motivs che vegnan numnads il pli savens per ina dimora en noss chantun è la natira intacta.

Ina buna pussaivladad per cumbatter cunter littering èn mesiras preventivas. Cun ina sensibilisaziun sistematica po oravant tut la populaziun indigena vegnir rendida attenta a quest tema. Betg sco ultim è la scola in lieu ideal per infurmar detagliadamain ils uffants ed ils giuvenils. Bleras vischnancas prendan questa via. In tractament chantunal concordant manca però en blers lieus – er en il chantun Grischun. Anzi, ozendi èn quai oravant tut uniuns, persunas privatas e parts interessadas che porschan maun per cumbatter cunter littering e che inizieschan mesiras preventivas. Uschia sensibilisescha per exempel la «Cuminanza d'interess per in ambient net (IGSU)» fundada da vart privata per quest tema cun in di da far urden (clean-up-day) che ha lieu mintga onn. Blers manaschis agriculs rendan er attent a quest problem cun atgnas ideas e cun campagnas naziunalas (https://www.landwirtschaft.ch/) per proteger lur animals cunter malsognas chaschunadas dal rument. En territoris turistics frequentads fermamain pudessan ins eventualmain er lavurar cun rangers che pudessan sensibilisar ed infurmar la glieud en moda e maniera simpatica en chaussa.

Ina segunda via per cumbatter cunter littering è quella da stgaffir ina basa legala. Er sch'in surpassament dals uschenumnads delinquents da rument è fitg difficil da cumprovar, pudessan multas tuttina cuntanscher in effect exemplaric. Plinavant datti ina tscherta controlla vicendaivla da tut las persunas che utiliseschan la natira. Gist là, nua che giasts da vacanzas e turists extrachantunals èn il public en mira, gidan mesiras da prevenziun main che tar la populaziun indigena. Grazia ad ina lescha da polizia communala han tschertas vischnancas svizras ozendi la pussaivladad da chastiar delinquents da rument. Ma er qua manca en il chantun Grischun in proceder coordinà.

In'execuziun chantunala cuminaivla fiss giavischabla per che tut las vischnancas possian applitgar la medema basa envers delinquents da rument. Reagì en moda positiva sin talas soluziuns unifitgadas ha la Regenza grischuna gia l'onn 2016 avant la debatta davart l'iniziativa parlamentara (Jacques Bourgeois) «Rinforzar las mesiras cunter il laschar enavos ruments (littering)» en il Cussegl naziunal e vesa il project sco «in pass impurtant per concluder ina regulaziun unitara e definitiva per l'entira Svizra davart il scumond da bittar davent e da laschar enavos ruments chasans». L'iniziativa è vegnida refusada mo per pauc ed il tema n'è betg vegnì priorisà vinavant en il chantun Grischun. En il «Plan da rument dal Grischun 2016» (Uffizi per la natira e l'ambient) vegni finalmain fixà il suandant davart il tema dal littering: «Il fenomen dal littering n'è tuttina betg primarmain in tema da rument, mabain in da la schubradad ed er da la segirezza en il spazi public. Littering è in problem social che occupa la gronda part da las burgaisas e dals burgais.»

Sut quest aspect vegn la Regenza incumbensada:

  1. d'elavurar in'analisa dal stadi actual en reguard a la problematica dal littering;
  2. da mussar mesiras pussaivlas concernent l'infurmaziun e concernent ina prevenziun pli ferma (tranter auter er cun integrar las scolas e las generaziuns pli veglias, cun cumparsas en las medias socialas e.u.v.);
  3. da proponer eventualas mesiras legislativas chantunalas che pussibilitassan da denunziar delinquents da rument;
  4. d'elavurar e da suttametter al Cussegl grond in concept chantunal general davart la prevenziun e davart la reducziun dal littering tras las persunas indigenas e tras ils giasts (tranter auter er cun resguardar soluziuns preventivas e legislativas d'auters chantuns).

Tavau, ils 18 da favrer 2021

Widmer (Favugn), Casty, Salis, Atanes, Berther, Brandenburger, Buchli-Mannhart, Clalüna, Crameri, Danuser, Della Cà, Dürler, Ellemunter, Epp, Florin-Caluori, Flütsch, Föhn, Gugelmann, Hefti, Horrer, Kohler, Lamprecht, Loepfe, Müller (Favugn), Müller (Susch), Niggli-Mathis (Grüsch), Preisig, Rettich, Ruckstuhl, Tanner, Ulber, Widmer-Spreiter (Cuira), Pajic, Spadarotto

Resposta da la regenza

En il chantun Grischun è il littering oravant tut in problem per la sanadad dals ani­mals sco er in problem estetic. Periclitads èn en spezial animals da niz ed – en ina dimensiun restrenschida – animals selvadis, sch'els maglian il rument bittà davent, daventan malsauns da quai e crappan pervia da quai. Ultra da quai pon ils excre­ments da chaun smerdar l'erva u arrivar en il pavel cun la consequenza ch'i dat in dumber pli grond d'aborts infectus chaschunads da parasits. L'ambient è pertutgà dal littering en spezial en quel senn che las substanzas dal rument na pon betg vegnir recicladas, perquai ch'el vegn bittà davent e chaschuna in dischurden en la cuntrada. Consequenzas ecologicas directas per il terren e per las auas na datti strusch u resultan mo punctualmain, uschia che quellas èn fitg limitadas. Da princip è il littering in tema che concerna la "schubradad" dal spazi public. Pervia da quai sto el vegnir prendì per mauns en emprima lingia or d'ina perspectiva "sociala".

Tar il punct 1: En il rom da la petiziun 3 da la sessiun dals giuvenils dal Grischun 2019 è gia vegnì giuditgà qualitativamain il stadi actual areguard il littering en il chantun. Da l'enquista ch'è vegnida fatga da quel temp tar las vischnancas grischu­nas pli grondas e d'in giudicament dals uffizis chantunals resorta ch'il littering sa mussa bain en tscherts lieus e durant tscherts temps, ma ch'el n'è per la gronda part da las autoritads interrogadas betg in problem acut che stuess vegnir prendì per mauns cun prioritad. Unicamain en l'agricultura datti in basegn d'agir pli grond per cumbatter cunter il littering, perquai che ruments sco dosas u stgaglias da vaider èn in privel per ils animals da niz, en spezial, sch'els pasculeschan sin pastgiras per lung da vias. Per part vegnan ils ruments manizzads da las maschinas da segar ed alura magliads dals animals da niz. Per pudair giuditgar meglier e pli detagliadamain il stadi actual dal problem dal littering en il chantun, èsi necessari ed util da far ulte­riurs scleriments.

Tar il punct 2: La sensibilisaziun da la populaziun concernent il consum da resursas e concernent la mentalitad da bittar davent po p.ex. vegnir fatga en las scolas. En quest connex ha la Regenza gia incumbensà l'Uffizi per la natira e l'ambient e la Scola auta da pedagogia dal Grischun (SAPGR) d'examinar pussaivladads adatta­das. Actualmain vegn elavurada ina skizza da project per installar in post spezialisà per l'educaziun ambientala en la SAPGR. Cun quest post e cun ina purschida da furmaziun supplementara respectiva per las persunas d'instrucziun poi vegnir tegnì quint en moda adequata da l'infurmaziun sistematica resp. da la prevenziun concer­nent la problematica dal littering. Ils resultats da l'enquista online planisada pon vegnir integrads.

Tar il punct 3: Sin plaun chantunal exista gia – cun l'art. 36h da la Lescha da polizia dal chantun Grischun (LPol; DG 613.000) en cumbinaziun cun l'art. 36a al. 1 lit. c da l'Ordinaziun da polizia (OPol; DG 613.100) – ina basa legala per chastiar il littering cun 100 francs en la procedura da multas disciplinaras. Sin fundament da l'art. 36k LPol è la persecuziun penala da princip chaussa da las vischnancas. Sche la proce­dura da multas disciplinaras na po betg vegnir applitgada, vegn applitgada la proce­dura penala ordinaria (art. 3 da la Lescha introductiva tar il Cudesch da procedura penala svizzer [LItCPP; DG 350.100]).

Tar il punct 4: Il basegn per in concept chantunal unitar per prevegnir al littering n'è – considerond il stadi actual da las enconuschientschas – betg avant maun. Il littering e sias consequenzas pon vegnir cumbattids efficaziamain sin trais axas d'agir: cun in'educaziun ambientala solida e bain fundada, cun realisar sistematicamain mesiras per proteger ils animals da niz e cun engaschar rangeras e rangers che patruglie­schan en territoris sensibels e che tschertgan il dialog cun las persunas che pudes­san eventualmain chaschunar in littering. Questas axas d'agir vegnan realisadas gia oz.

Sa basond sin questas explicaziuns propona la Regenza al Cussegl grond da midar questa incumbensa areguard il punct 1 sco suonda: far in'enquista online tar las vischnancas e tar las puras ed ils purs concernent la problematica dal littering, ed areguard il punct 2 sco suonda: mussar – en il rom dal project "Post spezialisà per l'educaziun ambientala SAPGR" – mesiras d'infurmaziun e da prevenziun concernent la problematica dal littering, e da la refusar areguard ils puncts 3 e 4.

23 d'avrigl 2021