Sch'ins tschertga en in program da navigaziun en l'internet – cun deactivar la posi­ziun ed il cumportament da l'utilisadra u da l'utilisader – maletgs davart il «Grischun», chattan ins sut ils maletgs ils pli relevants tals dal traffic public, da bellas cuntradas, da natira intacta e da vitgs intacts, da monuments particulars u da highlights culina­rics. Plinavant èn l'unic Parc naziunal svizzer, ils trais parcs natirals regiunals sco regiuns da model dal svilup persistent sco er ils impurtants patrimonis natirals e cul­turals mundials da l'UNESCO ulteriurs indizis per la gronda impurtanza da la persi­stenza en il Grischun. Il Grischun vegn pia associà gia fermamain cun la persistenza. Quai vul dir ch'il Grischun sto tegnair quint mintga di en emprima lingia da las aspec­tativas sco destinaziun da vacanzas persistenta. Che la persistenza sa paja, è sa mussà durant la pandemia dal coronavirus cun las restricziuns da viadi: La dumonda per in turissem da stad natiral en las regiuns alpinas dal Grischun è surprendenta­main gronda, uschia ch'il potenzial è er correspundentamain grond. Cun la midada dal clima vegn quai a daventar anc pli impurtant.

La persistenza è in princip d'agir, nua che la duraivladad da l'utilisaziun da las resur­sas vegn garantida cun mantegnair l'abilitad da la regeneraziun natirala. Dapi la Con­ferenza davart l'ambient ed il svilup da l'Organisaziun da las Naziuns Unidas a Rio de Janeiro l'onn 1992 è in aspect central quel da mantegnair l'equiliber tranter las pre­tensiuns da l'economia, da la societad e da l'ecologia. Dapi il cumenzament da l'onn 2021 dispona il chantun d'in instrument per giuditgar la persistenza da projects. Quel vegn applitgà en dependenza da la cumplexitad, da la purtada da las consequenzas territorialas e temporalas, da la populaziun pertutgada, dals custs e dals eventuals conflicts d'interess e duai servir a las manadras ed als manaders da projects per optimar quels en il senn da la persistenza. Ultra da las prescripziuns davart il giudica­ment da la persistenza entaifer l'administraziun èn ils parcs natirals regiunals obli­gads – sur lur cunvegnas da prestaziun – da porscher a las vischnancas in instru­ment per giuditgar la persistenza, ch'è adattà a lur basegns, e da furnir uschia ina plivalur per il svilup persistent. Sco motor che promova il svilup persistent po vegnir resguardà il punct central «Green Deal» en il program da la Regenza 2021–2021. L'incumbensa Wilhelm concernent in «Green Deal» per il Grischun, ch'è vegnida acceptada dal parlament en la sessiun da zercladur 2019, cuvra cun il plan d'acziun pretendì per reducir las emissiuns da gas cun effect da serra in'emprima ed impur­tanta part d'in «Green Deal» cumplessiv en il senn dal program da la Regenza. In rapport intermediar cun in credit d'impegn per in'emprima etappa vegn preschentà al Cussegl grond en la sessiun d'october 2021. Sco axas d'acziun centralas vegn il plan d'acziun a cuntegnair la midada ad energias regenerablas, il traffic public, il tracta­ment persistent da resursas materialas ed il rinforzament da l'economia indigena. Tenor la Regenza tutga tar in «Green Deal» cumplessiv dentant er il tractament da las resursas u da las basas da viver ch'èn essenzialas en spezial er per il turissem, numnadamain ina natira e cuntrada intacta sco er il patrimoni cultural. Ina gronda sensibilisaziun per la protecziun da la cuntrada ha ina lunga tradiziun en il Grischun ed è ina raschun, per la quala il Grischun vegn associà fermamain cun la persisten­za. La cuntrada sto vegnir tractada vinavant cun quità. La promoziun da la biodiversi­tad è in ulteriur punct central da svilup dal program da la Regenza 2021–2024.

Tar la dumonda 1: Gea. Quai na po dentant betg mo esser per effects da reclama, mabain per viver ina tenuta grischuna da la persistenza e per render visibla quella seriusamain vers anen e vers anora.

Tar la dumonda 2: Na. In sistem da monitoring che po vegnir duvrà per la communi­caziun en il turissem sto sa referir oravant tut a stentas consequentas a favur da la persistenza en la destinaziun turistica ed en ils manaschis d'alloschament, sco ch'ellas èn er visiblas per ils giasts. Projects per la persistenza sin plaun chantunal pon medemamain vegnir duvrads cumplementarmain. La Regenza è pronta da met­ter a disposiziun infurmaziuns respectivas als purtaders d'in sistem da monitoring u d'in marketing turistic. Igl è e resta dentant l'incumbensa da las singulas destinaziuns turisticas da s'occupar da differents aspects da la persistenza e da sviluppar sco er da communitgar purschidas turisticas persistentas. La persistenza en il turissem ba­segna ina discussiun tematica fundada ed è en la responsabladad commerziala da singulas acturas e da singuls acturs turistics.

Tar la dumonda 3: Gea. En il sectur da la persistenza ha il chantun Grischun gia in tschert caracter exemplaric. Igl è impurtant da defender quel e da sustegnair la per­sistenza er per augmentar l'attractivitad. Quai vul dentant er dir che las organisaziuns turisticas sco er singulas acturas e singuls acturs turistics en il Grischun s'occupian sistematicamain d'aventuras turisticas che cumpiglian recreaziun, moviment, culina­ri­ca, cultura, natira e cuntrada sco er qualitad ecologica e che furneschan ina contribuziun per posiziunar il Grischun sco regiun da vacanzas persistenta.

10 da zercladur 2021