Navigation

Inhaltsbereich

Dumonda Favre Accola concernent il tunnel dal Wolfgang da la Viafier retica

Sessiun: 21.04.2021

En las finamiras d'amplificaziun da la Viafier retica a lunga vista figurescha dapi passa 20 onns in tunnel dal Wolfgang tranter Claustra-Selfranga e Tavau-Stilli. Ils custs vegnan stimads a passa 380 milliuns francs. Las relaziuns da pendenza fissan su­me­gliantas sco sin il traject stip tranter Küblis e Claustra (40 promils). Motivà vegn il tunnel cun in gudogn da temp da viadi da ca. 8 minutas. Il temp da viadi da Landquart a Tavau pudess vegnir scursanì a sut 60 minutas.

En il plan sectorial Traffic da la Confederaziun, part Infrastructura da la viafier, figurescha quest tunnel dal Wolfgang gia sco element fix, senza ch'igl avess gì lieu en il chantun Grischun x insacura ina discussiun publica davart ils avantatgs e dischavantatgs da quest tunnel, ch'è bain fitg char.

Davart ils detagls tecnics: Il tunnel Selfranga – Tavau-Stilli duai avair ina lunghezza da 7,1 km. Previs è in tunnel ad in binari cun dus lieus da cruschada da mintgamai 500 m lunghezza a dus binaris, e quai circa suenter in terz e suenter dus terzs dal tunnel. Sco gallaria da segirezza è planisada ina gallaria parallela da fugia e da salvament d'ina lunghezza da 7,16 km. Mintga 500 m èn previsas colliaziuns traversalas tranter il tunnel principal e la gallaria da segirezza. Ils custs per il sistem da tunnels eran vegnids stimads l'onn 2010 a 377 milliuns francs.

Tenor las indicaziuns da las projectadras e dals projectaders duai il tunnel dal Wolfgang esser in element essenzial per in'acceleraziun persistenta dal traject Landquart – Tavau. En quest connex duai vegnir scursanì en emprima lingia il temp da viadi da la Viafier retica da Landquart a Tavau a sut 60 minutas. Uschia pudess il «temp da sistem» tranter Claustra e Tavau vegnir reducì a 15 minutas e la stabilitad da l'urari pudess vegnir meglierada (viadi actual tranter Claustra e Tavau Vitg: 23 minutas). Cun il tunnel dal Wolfgang da ca. 7 km lunghezza tranter la staziun per transportar autos Claustra-Selfranga e Tavau-Stilli duain pudair vegnir ademplidas questas pretensiuns. Il nov tunnel duai muntar cun 40 promils da Claustra-Selfranga fin al portal Tavau.

En vista als gronds custs ed al niz fitg pitschen dal tunnel dal Wolfgang sa tschentan las suandantas dumondas:

  1. Co giuditgescha la Regenza oz la relaziun tranter ils custs ed il niz dal tunnel dal Wolfgang?
  2. Co giuditgescha la Regenza la perdita d'in viadi cun tren tras ina cuntrada interessanta tranter Claustra e Tavau envers il pitschen gudogn da temp da var 8 minutas?
  3. Tge reducziuns dal temp da viadi pon vegnir cuntanschidas sin il traject Landquart – Claustra tras ils projects planisads, vul dir il sviament da Grüsch ed il traject nov Fideris – Dalvazza?
  4. Tge gudogn da temp da viadi resultass tras binaris dubels sin l'entir traject da Landquart a Küblis?
  5. N'è la Regenza betg er da l'avis ch'i fiss meglier d'investir ils custs da 380 milliuns francs, stimads l'onn 2010 per il tunnel dal Wolfgang, per cumplettar sche pussaivel l'entir traject Landquart – Claustra resp. Landquart – Küblis cun binaris dubels?
  6. È la Regenza en discussiun cun la Viafier retica e cun la Confederaziun per allontanar il tunnel dal Wolfgang, ch'è actual­main inscrit en il plan sectorial, or da la finamira a lunga vista da la Viafier retica e per inscriver percunter binaris dubels sin l'entir traject da Landquart a Küblis?

Tavau, ils 21 d'avrigl 2021

Favre Accola, Wilhelm, von Ballmoos, Berweger, Bettinaglio, Brandenburger, Brunold, Buchli-Mannhart, Cahenzli-Philipp, Caviezel (Cuira), Della Cà, Derungs, Dürler, Felix, Gartmann-Albin, Gort, Grass, Hardegger, Hartmann-Conrad, Hefti, Holzinger-Loretz, Hug, Koch, Müller (Susch), Niggli-Mathis (Grüsch), Preisig, Rettich, Salis, Schutz, Tanner, Weber, Costa, Pajic, Renkel

Resposta da la regenza

En il Plan directiv chantunal Traffic ed en il Plan sectorial Traffic da la Confederaziun (part Program e part Infrastructura da la viafier) figureschan numerus projects ch'èn en differents stadis da planisaziun. La premissa per ina realisaziun è dentant l'inte­graziun d'in tal project en in pass da cumplettaziun dal Program da svilup strategic da l'infrastructura da viafier da la Confederaziun (PC PROSSIV). L'onn 2013 resp. 2019 ha il Parlament federal concludì il PC 2025/30 resp. il PC 2035/40. Il tunnel dal Wolf­gang da la Viafier retica n'è betg cuntegnì en quests PC ed è plinavant menziunà en il Plan sectorial Traffic, part Infrastructura da la viafier (SIS), mo sco "preorientaziun".

Actualmain han lieu las emprimas lavurs per il proxim pass da cumplettaziun 2040/45. Previsiblamain vegn la regiun da planisaziun Ost, a la quala il chantun Grischun appartegna, ad inoltrar il december 2022 a l'Uffizi federal da traffic (UFT) in concept da purschida en chaussa. Las propostas da las regiuns da planisaziun resp. dals chantuns represchentads en talas vegnan valitadas definitivamain tras la Con­fe­deraziun.

Il nov tunnel da viafier Fideris – Dalvazza ch'è gia concludì sco er ulteriuras renova­ziuns currentas en il territori da Landquart e dal Partenz permettan da reducir il temp da viadi a Tavau, a Scuol ed a San Murezzan e da meglierar la stabilitad/punctua­li­tad dal manaschi da viafier.

Tar la dumonda 1: Per il tunnel dal Wolfgang sa tschenta effectivamain la dumonda da la relaziun tranter ils custs ed il niz, perquai ch'el generescha in niz supplementar mo per Tavau, na creescha dentant nagina plivalur per l'ulteriura rait da la Viafier retica. Quai cuntrari a las investiziuns en il Partenz. Pervia dal nov concept da trens accuplabels resulta plinavant il problem dals viadis consecutivs Claustra Plaz – Sel­franga. Quels èn delicats ord vista dal manaschi e chaschunassan temps da fermada pli lungs a Claustra Plaz per ina da las duas parts dal tren. Ord ina vista cumplessiva giuditgescha la Regenza perquai la relaziun tranter ils custs ed il niz dal tunnel dal Wolfgang sco disfavuraivla ed – areguard las consequenzas per il manaschi – sco problematica.

Tar la dumonda 2: La perdita d'in viadi cun tren tras ina cuntrada interessanta tranter Claustra e Tavau sto segiramain vegnir valitada en moda negativa ord vista turistica. Questa dumonda po dentant vegnir chapida mo sco part d'ina consideraziun cum­plessiva en il rom d'in project concret che sa chatta en la procedura da permissiun, e po vegnir resguardada e valitada pir en quest context.

Tar la dumonda 3: Il gudogn da temp da viadi tranter Landquart e Claustra na de­pen­da betg mo da las mesiras prendidas per renovar l'infrastructura, mabain essen­zial­main er da la politica da fermada dals trens, dal material rullant che vegn duvrà sco er da las prescripziuns da manaschi futuras. Il sviament da Grüsch n'è dal rest betg cuntegnì en il SIS u en il PC PROSSIV 2025 resp. 2035.

Tar la dumonda 4: Il gudogn da temp da viadi tranter Landquart e Küblis na dependa betg mo da las mesiras prendidas per renovar l'infrastructura, mabain essenzialmain er da la politica da fermada dals trens, dal material rullant che vegn duvrà sco er da las prescripziuns da manaschi futuras.

Tar la dumonda 5: Renovaziuns en il Partenz han da natira ennà in niz bler pli grond, perquai che betg mo Tavau, mabain er l'Engiadina Bassa e l'Engiadin'Ota sco er las colliaziuns infraregiunalas impurtantas Partenz – Landquart – Cuira pon profitar da las mesiras infrastructuralas. En il center stattan en quest connex actualmain in svia­ment da Grüsch, trajects supplementars a dus binaris en il territori da Jenaz e da Saas sco er la gulivaziun d'intginas stortas tranter Saas e Claustra Vitg.

Tar la dumonda 6: La Viafier retica è en contact permanent cun il chantun sco er cun l'Uffizi federal da traffic, ch'è responsabel per l'infrastructura da viafier. Il SIS vegn normalmain adattà mintga dus onns da l'Uffizi federal da traffic e da l'Uffizi federal da svilup dal territori ed alura deliberà dal Cussegl federal. Schebain igl è necessari d'in­scriver en il SIS ils trajects mancants ch'èn relativamain curts, per cuntanscher in tra­ject nuninterrut a dus binaris tranter Landquart e Küblis, dependa da las surfatschas e dals territoris da protecziun ch'èn tangads en il cas singul. 

10 da zercladur 2021