Navigation

Inhaltsbereich

Incumbensa da la fracziun da la PS concernent il sustegn e l'integraziun da la giuventetgna durant la pandemia dal coronavirus (emprim sutsegnader Rettich)

Sessiun: 21.04.2021

La pandemia mundiala dal coronavirus pertutga senza dubi tut ils umans. Cunzunt las persunas pli veglias èn pertutgadas ferma­main, perquai ch'ellas han ina ristga da mort cleramain pli gronda. Per quest motiv èn ellas vegnidas e vegnan ellas – cun raschun – er vaccinadas sco emprimas.

Ils giuvenils na tutgan betg tar las gruppas da ristga dal coronavirus. Tuttina daventi pli e pli cler che la pandemia e sias circum­stanzas han consequenzas considerablas per la sanadad, per il bainesser e per il svilup da las persunas giuvnas. Las psicologas ed ils psicologs d'uffants e da giuvenils sa fan quitads. Ellas ed els èn occupads fermamain e mussan che desperaziun, malsognas psicosomaticas sco er intenziuns seriusas da commetter suicidi s'augmentan tar uffants e giuvenils sur 12 onns (NZZ am Sonntag, 11-04-2021). In ferm augment dal basegn da cussegliaziun mussa er l'evaluaziun da 147.ch che vegn purschì da la Pro Juventute e che stat a disposiziun gratuitamain ad uffants e giuvenils. (PRO JUVENTUTE CORONA-REPORT: Consequenzas da la pandemia dal coronavirus per uffants, per giuvenils e per famiglias en Svizra: https://www.projuventute.ch/sites/default/files/2021-02/Pro-Juventute-Corona-Report-DE.pdf destin tutga spezialmain quellas persunas ch'eran en situaziuns da vita difficilas gia avant la pandemia. Ellas n'han savens betg avunda resursas per dumagnar las grevezzas supplementaras ch'il coronavirus chaschuna. In'analisa che sa cumpona da pliras parts e ch'è vegnida fatga da la ZHAW davart il tema «La giuventetgna durant il temp da la pandemia dal coronavirus» (ZHAW: Jugend in Zeiten der Covid19-Pandemie, Ergebnisse einer Wiederholungsbefragung von Jugendlichen im Kanton Zürich https://digitalcollection.zhaw.ch/bitstream/11475/22094/3/2021_Baier-Kamenowski_Jugend-in-Zeiten-der-Covid19-Pandemie.pdf mussa en moda impressiunanta, co ch'il bainesser dals giuvenils è sa sviluppà. Ils problems emoziunals èn s'augmentads signifitgantamain, sch'ins cumpareglia las enquistas. Il stadi psichic dals giuvenils patescha, igl è da far quint cun in basegn da terapia pli grond e per part è in tal gia vegnì constatà.

Differentas partidas giuvnas (GISO, GVL, GPEV, Giuvens da l'Allianza dal Center) èn sa drizzadas cun in appel en chaussa al Cussegl federal. Il president da la Conferenza da las directuras e dals directurs chantunals da giustia e polizia (CDCGP), Fredy Fässler, ha sustegnì il fatg, che persunas giuvnas duajan vegnir integradas pli fitg en las proceduras da decisiun.

Per resumar sa mussi ch'igl exista in grond basegn d'agir, cumbain che la Svizra ha – en cumparegliaziun cun auters pajais – quasi adina tegnì avert las scolas e pia mantegnì dapli «normalitad».

En quest connex pretendan las sutsegnadras ed ils sutsegnaders che la problematica vegnia drizzada immediatamain en moda cumplessiva, e quai en barat cun las organisaziuns grischunas da giuvenils (p.ex. Jugend.gr, Jubla, Cevi) sco er cun repre­schentantas e represchentants da la giuventetgna sezza. I duain vegnir elavuradas mesiras che vegnan structuradas en mesiras a curta vista che sa laschan realisar svelt (p.ex. amplificaziun da las purschidas da cussegliaziun psicologica, participaziun dals giuvenils a las discussiuns politicas davart il coronavirus, agids finanzials per studentas e students) sco er en mesiras a vista mesauna e pli lunga (p.ex. segirar socialmain las famiglias, serrar sistematicamain las largias da furmaziun ch'èn resultadas tar las persunas pertutgadas, segirar plazzas da furmaziun, programs da barat). In focus spezial duai vegnir mess sin il sustegn da giuvenils/famiglias spezialmain dischavantagiads. Igl è numnadamain in fatg incontestà che la pandemia ha anc extendì il foss socio-economic tar ils giuvenils.

Tavau, ils 21 d'avrigl 2021

Rettich, Caviezel (Cuira), Degiacomi, Atanes, Baselgia-Brunner, Cahenzli-Philipp, Degiacomi, Gartmann-Albin, Hofmann, Horrer, Müller (Favugn), Perl, Preisig, Rutishauser, Schwärzel, Wilhelm, Pajic, Spadarotto, Stieger, Tomaschett (Cuira), van Kleef

Resposta da la regenza

Las mesiras per cumbatter il coronavirus han midà l'onn passà il mintgadi da l'entira societad. Las restricziuns da las libertads persunalas e las pussaivladads da partici­paziun èn ina sfida per tut ils umans en lur situaziun respectiva. Cun ina vasta stra­te­gia da test – che ha in caracter exemplaric en Svizra – s'engascha il chantun activa­main, per che l'entira populaziun possia returnar uschè svelt sco pussaivel a la nor­malitad.

La Regenza è stada conscienta da la situaziun dals uffants e dals giuvenils durant la pandemia dal coronavirus ed als ha pussibilità facilitaziuns, uschenavant ch'il dretg federal e la situaziun epidemiologica han permess quai. Ils uffants e giuvenils fin 16 onns èn stads exceptads da las restricziuns ch'èn vegnidas decretadas en il Gri­schun per ils 4 da december 2020. Las schluccadas a partir dal mars 2021 han tractà cun gronda prioritad ils basegns dals uffants e dals giuvenils ed han mess il focus sin lur mund da mintgadi, tras quai che las purschidas da sport e da cultura èn vegnidas avertas.

Tegnair avert las scolas per garantir schanzas da furmaziun uschè egualas sco pus­saivel e per resguardar ulteriurs aspects socials sco er la promoziun dal svilup è sta­da ina da las maximas supremas en il Grischun suenter l'emprima unda. La strategia da test dal Grischun ha integrà fitg baud las scolas per pussibilitar ina instrucziun cun uschè paucas restricziuns sco pussaivel. Ultra da purschidas da la cussegliaziun da geniturs, d'educaziun, da professiun, da studi e da carriera, che stattan da princip a disposiziun a tut la populaziun independentamain da la pandemia, han las scolas survegnì sustegn dals uffizis da furmaziun, per che l'incumbensa da furmaziun haja pudì vegnir ademplida malgrà la situaziun pretensiusa. Medemamain ha il Grischun – cumpareglià cun auters chantuns – renconuschì fitg baud las purschidas da la lavur averta cun giuvenils sco instituziuns socialas. Quai ha pussibilità als giuvenils da s'inscuntrar en preschientscha da persunas spezialisadas e da passentar temp cu­mi­naivel. Cun organisaziuns da giuvenils han singuls posts da l'administraziun gì regu­larmain in barat prezius, independentamain da la pandemia.

La discussiun davart las consequenzas da la pandemia per uffants e giuvenils, che vegn manada en la publicitad sco er en circuls spezialisads, ha lieu en il Grischun en furma d'in monitoring, tranter auter en la Cumissiun spezialisada per la protecziun d'uffants e per l'agid a la giuventetgna. Malgrà il pitschen dumber da cas tar ils uffizis spezialisads participads ha ella instradà gia la primavaira 2020 mesiras preventivas e rinforzà l'engaschament en la protecziun d'uffants e da giuvenils cunter violenza a chasa. Il tema central dals Dis d'acziun cunter violenza è stà «Violenza a chasa – uffants e giuvenils entamez»  (link:https://www.gr.ch/RM/medias/communicaziuns/MMStaka/2020/Seiten/2020112401.aspx(gr.ch).

Suenter in onn cun la pandemia datti adina dapli indizis che la «crisa da corona ha l'effect d'ina 'lenta focala', perquai ch'ella rinforza tendenzas existentas d'inegualitad e da grevezzas preliminaras. Las circumstanzas da vita specificas (p.ex. la situaziun famigliara, la situaziun d'abitar u la situaziun finanziala) paran dad esser en quest connex pli relevantas ch'ils facturs sociodemografics sco tals (sco la vegliadetgna u la schlattaina).» (Kessler, C. & Guggenbühl, L. [2021]. Auswirkungen der Corona-Pandemie auf gesundheitsbezogene Belastungen und Ressourcen der Bevölkerung. Ausgewählte Forschungsergebnisse 2020 für die Schweiz. Arbeitspapier 52. Berna e Losanna: Promoziun Sanadad Svizra).

Sin fundament da questas enconuschientschas vegn la Regenza a la conclusiun che las mesiras concretas, concludidas actualmain cun il «Program chantunal per con­sti­tuir e per sviluppar vinavant la politica d'uffants e da giuvenils tenor l'art. 26 LPUG», mettan gia ils dretgs accents, p.ex. cun projects da pilot per programs preventivs da visitas a chasa, cun rinforzar las pussaivladads simplas per infurmar e per cussegliar uffants e giuvenils, cun realisar las recumandaziuns da la Conferenza da las di­rec­tu­ras e dals directurs chantunals dals affars socials (CDAS) e da la Conferenza per la protecziun d'uffants e da creschids (COPUC) per collocar uffants e giuvenils ordaifer la famiglia ubain cun purschidas da prevenziun en cas da process da separaziun cun grondas dispitas, cun promover process da participaziun sin plaun communal sco er cun promover l'interdependenza da persunas spezialisadas e l'amplificaziun da lur savida. Plinavant examinescha la Regenza cuntinuadamain las consequenzas da la pandemia per l'entira populaziun e prenda – tut tenor il svilup da la pandemia – las mesiras necessarias.

Sa basond sin questas explicaziuns propona la Regenza al Cussegl grond da refusar questa incumbensa. 

28 da zercladur 2021