Navigation

Inhaltsbereich

Sessiun: 21.04.2021

Da la pandemia mundiala dal coronavirus è pertutgada fermamain tut la populaziun, ma er l'economia. Cunzunt las restricziuns necessarias sco er la mancanza da perspectivas dattan da far.

Vinavant n'èsi betg cler quant ditg che questas restricziuns ston anc vegnir mantegnidas. Quai chaschuna puspè ina gronda malsegirezza. Quella po esser ina gronda ristga en spezial per persunas giuvnas.

Per ils giuvenils che han terminà la scola è il pass en il mund da lavur in mument impurtant da lur vita. Sche quel na gartegia betg sco giavischà, chaschuna quai savens ina frustraziun e stress tant per ils giuvenils sco er per lur geniturs.

Giavischs da professiun e manaschis d'emprendissadi vegnan savens eruids ordavant u prendids en mira cun dis da fufragnadi u cun praticums curts. Ins sto partir dal fatg che quests dis da fufragnadi e quests praticums curts na vegnian betg purschids sco per il solit pervia da la pandemia dal coronavirus. Pervia da quai na pon els er betg vegnir pratitgads cumplainamain. Quai ha la finala consequenzas per ils contracts d'emprendissadi.

En quest connex vegn la Regenza supplitgada da respunder las suandantas dumondas:

  1. Co èn sa midads ils dis da fufragnadi/ils praticums curts areguard la frequentaziun, areguard la realisaziun ed areguard il cuntegn en ils onns 2020 e 2021 cumpareglià cun ils onns precedents?
  2. È il dumber dals emprendissadis che vegnan purschids sa midà durant quests onns e sche gea, en tge branschas?
  3. È la Regenza da l'avis ch'il pass en il mund da lavur pudess – pervia da la situaziun actuala – esser pli difficil per ils giuvenils che han terminà la scola e sche gea, tge mesiras da sustegn concretas èn planisadas per las persunas pertutgadas?
  4. È la Regenza pronta da prolungar fin l'october 2021 il termin per concluder ils contracts d'emprendissadi ed uschia il cumenzament da l'emprendissadi, sco che quai è gia stà il cas l'onn precedent?
  5. Tge mesiras supplementaras per giuvenils che han terminà la scola e che han difficultads d'emprender planisescha la Regenza en vista a la situaziun economica ch'è actualmain difficila, per ch'els possian vegnir accumpagnads optimalmain sin lur via en la vita professiunala?

Tavau, ils 21 d'avrigl 2021

Gartmann-Albin, Widmer-Spreiter (Cuira), Waidacher, Atanes, Baselgia-Brunner, Bondolfi, Brandenburger, Cahenzli-Philipp, Caviezel (Cuira), Danuser, Degiacomi, Della Vedova, Deplazes (Rabius), Ellemunter, Favre Accola, Felix, Föhn, Gugelmann, Hartmann-Conrad, Hofmann, Holzinger-Loretz, Horrer, Loepfe, Marti, Müller (Favugn), Perl, Preisig, Rutishauser, Schutz, Schwärzel, Thomann-Frank, Ulber, von Ballmoos, Widmer (Favugn), Wilhelm, Costa, Decurtins-Jermann, Pajic, Stieger, Tomaschett (Cuira), van Kleef

Resposta da la regenza

La furmaziun fundamentala professiunala è ina incumbensa cuminaivla che vegn ademplida communablamain da la Confederaziun, dal chantun e da las organisaziuns dal mund da la lavur (OdML). Ils trais lieus d'emprender – manaschis d'emprendissadi, scolas professiunalas spezialisadas e curs intermanaschials – intermedieschan ils cuntegns da la furmaziun tenor las ordinaziuns da furmaziun.

Tar la dumonda 1: Las OdML èn responsablas ch'ils manaschis affiliads mettian a disposiziun plazzas d'emprendissadi en la furmaziun professiunala. Als manaschis servan ils fufragnadis tranter auter er per chattar la generaziun giuvna da professiunistas e professiunists la pli adattada. En il chantun Grischun n'existan naginas infurmaziuns davart la dumonda, quants fufragnadis che vegnan purschids ed en tge furma. Dapi il 1. da mars 2020 po però vegnir consultà online il Register grischun da las firmas d'emprendissadi. Uschia èsi pli simpel per ils giuvenils da tschertgar in fufragnadi.

Tar la dumonda 2: Il dumber dals contracts d'emprendissadi suttascrits sco er il dumber da las plazzas d'emprendissadi publitgadas dals onns 2020 e 2021 (mintgamai stadi da la fin d'avrigl) na divergeschan betg cleramain da la media dals onns precedents (2017–2019). Infurmaziuns davart las branschas na pon vegnir dadas naginas, perquai ch'i vegn eruì mo il dumber total, ma betg quel da las singulas branschas.

Mais / onn

Contracts d'emprendissadi suttascrits

Plazzas d'emprendissadi publitgadas

fin d'avrigl 2021

1121

928

fin d'avrigl 2020

1226

982

fin d'avrigl 2019

1187

941

fin d'avrigl 2018

1242

775

fin d'avrigl 2017

1322

867

 

Tar la dumonda 3: La Regenza è conscienta che la situaziun influenzada da COVID-19 po render pli difficil il pass en il mund da lavur en singulas branschas. Ma las pussaivladads da far quest pass e da far carriera èn però intactas e tut las furmaziuns fundamentalas professiunalas pon vegnir frequentadas. La task force naziunala "Perspectiva emprendissadi" s'engascha per che uschè blers giuvenils sco pussaivel chattian ina plazza d'emprendissadi e ch'ils manaschis d'emprendissadi occupian lur plazzas d'emprendissadi vacantas e mantegnian lur plazzas d'emprendissadi per pudair cuvrir uschia lur basegn da futuras spezialistas qualifitgadas e da futurs spezialists qualifitgads. La campagna naziunala #PROLEHRSTELLEN sensibilisescha p.ex. da cuntinuar cun l'engaschament per la tscherna da professiun. La Cussegliaziun chantunala da professiun, da studi e da carriera (CPSC) cusseglia giuvenils concernent la tscherna da professiun e metta a disposiziun infurmaziuns e documentaziuns. Sin berufsberatung.ch (portal d'infurmaziun uffizial da la Svizra) vegnan preschentadas las professiuns e publitgadas las plazzas d'emprendissadi libras. Il Management da cas Furmaziun professiunala (MCFP) sco part da la CPSC sustegna giuvenils che n'han nagina soluziun da cuntinuaziun, cura ch'els sortan da la scola populara u d'ina soluziun transitorica u suenter ch'els han interrut in emprendissadi. Per il 1. da mars 2021 è il MCFP vegnì restructurà ed extendì per 20 pertschient grazia a spustaments interns da plazzas, uschia che la cussegliaziun en las regiuns po vegnir garantida meglier. Ulteriuras mesiras n'èn betg planisadas.

Tar la dumonda 4: Gea.

Tar la dumonda 5: Cun l'introducziun dal Plan d'instrucziun 21 è er vegnì introducì il plan d'instrucziun dal modul "Orientaziun professiunala" che vegn instruì prioritarmain sin il stgalim secundar I. En quest connex elavuran ils giuvenils las premissas per tscherner lur finamira futura concernent la furmaziun e la professiun e preparan parallelamain en scola la transiziun en ina scolaziun postobligatorica. Per la 3. classa dal stgalim secundar I èn vegnidas stgaffidas en il chantun Grischun supplementarmain las structuras da temp "Individualisaziun" cun la finamira da meglierar la midada da las scolaras e dals scolars en in avegnir professiunal u scolastic (p.ex. promoziun individuala da las cumpetenzas dal rom e da las cumpetenzas transversalas, optimaziun da la tscherna da la professiun, rinforzament da l'atgna responsabladad per il process da midada). Giuvenils che sortan da la scola e che na cumenzan betg directamain cun ina furmaziun fundamentala professiunala u scolastica han la pussaivladad da frequentar ina soluziun transitorica u il program da giuventetgna Funtauna (mesira per il martgà da lavur da l'Uffizi chantunal per industria, mastergn e lavur). Ultra da quai datti il MCFP (guardar resposta 3). Ulteriuras mesiras n'èn betg planisadas.

4 da zercladur 2021