Navigation

Inhaltsbereich

Sessiun: 21.04.2021

Bleras vischnancas en il Grischun han gia u èn londervi d'equipar lur vischnanca cun defibrillaturs (curt AED). Er la vischnanca da Küblis ha gia dapi onns in defibrillatur che sa chatta tar la chasa da scola. Ultra da quai è nossa vischnanca en la situaziun fortunada d'avair ina pratica cuminaivla en il center dal vitg. Quest avantatg n'han natiralmain per bler betg tut las vischnancas. Prendain il vitg da St. Antönien sco exempel. La proxima pratica da medi è per St. Antönien er quella da Küblis. Er sche la via n'è betg serrada pervia da la naiv e po vegnir charrada bain, dura quai in tschert temp, fin ch'ins è en il center dal vitg. En ina situaziun d'urgenza quinta dentant savens mintga minuta. I na gida nagut, sche las vischnancas cumpran defibrillaturs e nagin na sa, nua che quels sa chattan. Ed er sch'ins sa quai, n'è l'infurmaziun ch'il defibrillatur sa chattia, sco a Küblis, tar la chasa da scola, pli probabel betg propi utila per persunas che n'enconuschan betg il vitg. 

Jau sun en la suprastanza dals pumpiers dal Partenz d'amez. Là è quai vegnì tematisà ed igl è sa mussà ch'i dat chantuns ch'èn bler pli moderns. Saja quai en la registraziun dals lieus u en la signalisaziun e.u.v. En il chantun Grischun exista qua in basegn considerabel da meglieraziun. Beneventà vegnissi fitg, sch'ins cuntanschess per telefon ina centrala da servetsch d'urgenza che pudess immediatamain dir, nua che sa chatta il proxim AED. Quai para propi dad esser in basegn.

Dunna deputada Holzinger ha tematisà quai gia durant l'ura da dumondas da la sessiun da favrer 2020. En quest connex ha la Regenza infurmà tranter auter ch'in barat da datas automatic cun l'app Momentum na saja actualmain anc betg pussaivel. A medem temp èsi dentant vegnì empermess ch'i vegnia previs en il punct central da svilup 6.1 dal program da la Regenza d'examinar ils concepts existents dals fatgs da salvament dal servetsch sanitar. En il rom da questa controlla vegnia er examinada l'introducziun d'ina app per cas d'urgenza dal cor e da la circulaziun.

Pervia da quai dumond jau la Regenza il suandant:

  1. Co sa preschenta il stadi actual areguard in'eventuala implementaziun d'ina app per cas d'urgenza dal cor e da la circulaziun?
  2. Po il chantun s'imaginar da registrar en in lieu central p.ex. il lieu, la marca ed il tip dals defibrillaturs, e da metter a disposiziun questas infurmaziuns a las organisaziuns da glisch blaua?
  3. È la Regenza er da l'avis ch'ina signalisaziun unitara concernent ils lieus dals defibrillaturs fiss raschunaivla sin plaun chantunal?
  4. Ha la Regenza ina strategia, co ch'ella tracta questa tematica en sias immobiglias?

Tavau, ils 21 d'avrigl 2021

Gort, Rutishauser, Holzinger-Loretz, Berweger, Brandenburger, Brunold, Cahenzli-Philipp Cantieni, Degiacomi, Della Cà, Dürler, Favre Accola, Felix, Flütsch (Spleia), Föhn, Gartmann-Albin, Gugelmann, Hartmann-Conrad, Hefti, Horrer, Hug, Jochum, Koch, Loepfe, Pfäffli, Preisig, Rettich, Salis, Schwärzel, Thomann-Frank, Ulber, von Ballmoos, Weber, Wellig, Costa, Flütsch (St. Antönien), Pajic, Renkel, Tomaschett (Cuira), van Kleef

 

Resposta da la regenza

Per il chantun Grischun è vegnì elavurà gia l'onn 2011 in concept "First responders en il chantun Grischun". Las gidantras ed ils gidanters d'emprim agid, er numnads first responders, duain prender las mesiras ch'èn necessarias respectivamain ade­quatas per l'emprim provediment da persunas ch'èn daventadas grevamain malsau­nas u che han gì in grev accident, fin che las forzas d'acziun professiunalas arrivan. Quest concept è resultà da l'experientscha, che las forzas d'acziun professiunalas dovran en tscherts lieus memia ditg fin ch'ellas arrivan al lieu d'acziun. Da l'autra vart na giustifitgescha la frequenza bassa da las acziuns en quests lieus betg l'installa­ziun da basas d'ambulanza supplementaras.

In provediment cumplessiv dal chantun cun first responders premetta che questa in­cumbensa vegnia surdada ad in'organisaziun ch'è activa en tut il chantun. Cun il con­clus dals 26 da matg 2020 (prot. nr. 471/2020) ha la Regenza incumbensà il Salva­ment alpin svizzer (SAS) da stabilir l'organisaziun "First responders en il chantun Grischun". La finamira da 350 first responders ch'èn repartids sin l'entir territori chan­tunal duai vegnir cuntanschida cun gruppas da mintgamai tschintg first responders. Mintga gruppa da first responders vegn equipada cun in satgados d'urgenza, cun in defibrillatur extern automatisà (AED) sco er cun il material da sanitad necessari.

En il punct central da svilup 6.1 prevesa il program da la Regenza per ils onns 2021 fin 2024 "Cun in provediment da la sanadad integrà vers l'avegnir" tranter auter, che las concepziuns existentas en il sectur dals fatgs da salvament dal servetsch sanitar duain vegnir adattadas – resguardond la finanziabladad e la necessitad – a las sfidas futuras. Las collavuraturas ed ils collavuraturs da l'Uffizi da sanadad èn occupads gia dapi circa in onn cun la superaziun da la pandemia dal coronavirus, uschia ch'igl è da far quint cun retards en connex cun la realisaziun dals puncts centrals da svilup da la politica da sanadad.

Tar la dumonda 1: Durant la fasa d'installaziun tras il SAS vegnan ils first responders clamads en servetsch a chaschun d'in eveniment tras la Centrala dal clom d'agid sanitar 144 (Centrala 144) cun agid d'in SMS. Previsiblamain a partir dal 1. da zercla­dur 2021 vegn il SAS ad applitgar ina software specifica en l'internet per administrar e per clamar en acziun ils first responders (app mobila).

Tar la dumonda 2: Il chantun na registrescha betg ils lieus dals AED publics en il chantun. La Centrala 144 n'enconuscha pia betg ils lieus correspundents. La registraziun e la tgira da questas datas n'è betg pussaivla cun il dumber da persunal actual da la Centrala 144. Persunas privatas, fundaziuns privatas ed uniuns han pu­blitgà chartas che cuntegnan lieus annunziads dals AED (per exempel: Defikarte.ch (da consultar sin: https://defikarte.ch/index.html); herzsicher.ch (https://www.herzsicher.ch/map/karte.html) ubain uMap (https://umap.osm.ch/de/search/?q=Defibrillatoren). Damai che questas chartas n'èn ni cumplettas ni verifitgadas uffizialmain, na po la Centrala 144 betg duvrar ellas. Correspundentamain pari dad esser pli cunvegnent da sa drizzar a la Confederaziun. Quella pudess stgaffir l'obligaziun ch'ils cumpraders dals AED ston annunziar ad in post central ils lieus inditgond las coordinatas e l'accessibladad dals AED.

Tar la dumonda 3: Per segns da salvament vala la norma internaziunala ISO 7010. Ils pictograms dals segns da salvament èn alvs e sa chattan sin ina tavla rectangula­ra cun in fund verd ed in ur alv. Per signalisar ils lieus dals defibrillaturs sto – tenor questa norma – vegnir duvrà il segn da salvament "E010 defibrillatur extern automa­tisà (AED)". Ina signalisaziun unitara che vala mo per il chantun Grischun n'è perquai betg raschunaivla.

Tar la dumonda 4: Cun il conclus dals 4 da matg 2021 (prot. nr. 400/2021) ha la Regenza incumbensà l'Uffizi da persunal da garantir la segirezza a la plazza da lavur, la sanadad en il manaschi ed il management da la cuntinuitad da las fatschen­tas (BCM) per tut ils posts da servetsch da l'administraziun chantunala. En il rom da questa incumbensa vegnan tranter auter tematisadas er la necessitad dals AED, la registraziun e la signalisaziun da lur lieus.

9 da zercladur