Navigation

Inhaltsbereich

Dumonda Horrer concernent l'areal Sennhof Cuira

Sessiun: 21.04.2021

L'areal Sennhof ha survegnì ina nova utilisaziun en il rom da la realisaziun dal stabiliment giudizial Cazas Tignez. Ina concurrenza d'investiders ha decidì, tgi che survegn il dretg da construcziun. Sco enconuschent ha il project «Continuum» gudagnà la concurrenza d'investiders, ed ha survegnì l'agiudicaziun per il dretg da construcziun. En il rapport dal gremi da giudicament explitgescha la gruppa dals investiders dal project «Continuum» – en la descripziun e documentaziun dal studi da project – tranter auter::

«La part nova da l'edifizi porscha abitaziuns favuraivlas d'ina societad cooperativa, cunzunt per famiglias, però er per il spazi d'abitar ch'è oz urgentamain necessari per la vegliadetgna. In Sennhof public ed animà per tut las classas da vegliadetgna è pia grantì» («Bericht des Beurteilungsgremiums – Investorenwettbewerb Areal Sennhof», p. 43. Online: https://www.gr.ch/DE/institutionen/%20verwaltung/diem/hba/planen-bauen/wettbewerbe/Juryberichte/WEB_Bericht_Investorenwettbewerb_Sennhof.pdf).

Sco ch'igl è vegnì enconuschent publicamain en il fratemp (guardar contribuziun en il schurnal regiunal Grischun dad SRF dals 15 d'avrigl 2021), na vegnan realisadas naginas abitaziuns favuraivlas d'ina societad cooperativa, malgrà l'empermischun oriunda en il studi da pilot ch'era vegnì inoltrà durant la concurrenza d'investiders. Anzi, i vegnan realisadas abitaziuns d'atgna proprietad dal segment da pretschs superiur. Uschia hai num sin la pagina da vendita respectiva:

«En l'edifizi nov vegnan construidas 29 abitaziuns d'atgna proprietad sin tschintg plauns en il dretg da construcziun. Las abitaziuns da 2,5 fin 5,5 stanzas èn munidas cun lautgas patgificas. En il plaunterren èn previsas abitaziuns attractivas sin dus plauns» (pagina d'internet da vendita da la «Societad simpla Sennhof», online:https://sennhof.info/der-sennhof/nutzungen).

Quest tradiment da vart dal chantun sco donatur dal dretg da construcziun sco er da vart da la gruppa d'investiders provochescha dumondas. Perquai sto la Regenza respunder las suandantas dumondas da las sutsegnadras e dals sutsegnaders:

  1. Cura è la Regenza vegnida a savair per l'emprima giada ch'i na vegnan realisadas naginas abitaziuns favuraivlas d'ina societad cooperativa sin l'areal Sennhof?
  2. Tge mesiras ha la Regenza examinà per far valair l'empermischun oriunda da construir abitaziuns favuraivlas d'ina societad cooperativa?
  3. Tgenina da las mesiras examinadas ha la Regenza realisà effectivamain?
  4. Tge è stà il motiv ch'i n'èn vegnidas realisadas naginas abitaziuns d'ina societad cooperativa sin l'areal Sennhof resp. tge mecanissems da controlla han disditg?

Tavau, ils 21 d'avrigl 2021

Horrer, Gartmann-Albin, Perl, Atanes, Baselgia-Brunner, Cahenzli-Philipp, Cantieni, Caviezel (Cuira), Hofmann, Müller (Favugn), Preisig, Rettich, Rutishauser, Widmer-Spreiter (Cuira), Wilhelm, Pajic, Spadarotto, Stieger, Tomaschett (Cuira), van Kleef

Resposta da la regenza

Cur ch'il stabiliment giudizial serrà Cazas Tignez ha cumenzà cun ses manaschi, è vegnida terminada l'execuziun giudiziala en il Sennhof. Fin la fin da l'onn 2021 ve­gnan ils biros da la Procura publica a Cuira unids da nov en localitads cuminaivlas a la Rohanstrasse 5. Ils locals concepids aposta per l'execuziun giudiziala en l'areal Sennhof na pon betg vegnir duvrads per autras activitads administrativas, uschia ch'els èn vegnids transferids en la facultad finanziala dal chantun e surdads en il fratemp a terzas persunas sin basa d'in dretg da construcziun. Tenor il dretg da finanzas ston immobiglias chantunalas vegnir consegnadas per valurs che cor­respun­dan al martgà.

La situaziun da l'areal cumplet a l'ur ost da la citad veglia da Cuira è pretensiusa e caracterisada d'in cumplex d'edifizis d'impurtanza istorica. Per satisfar il meglier als interess dal chantun, da la citad da Cuira e da la publicitad ha l'Uffizi chantunal da construcziun auta lantschà l'onn 2018 ina concurrenza d'investiders averta. La fina­mira da la procedura è stada quella da survegnir offertas per surdar in dretg da con­strucziun mintgamai en cumbinaziun cun in studi da project. Per giuditgar ils projects inoltrads èn stads decisivs – ultra dals criteris economics relevants sin fundament da las prescripziuns chantunalas dal dretg da finanzas – cunzunt criteris qualitativs sco l'enritgiment da la citad veglia, ina maschaida multifara da l'utilisaziun, la qualitad pratica sco er aspects dal spazi liber. En il rom da las respostas a duas intervenziuns parlamentaras aveva la Regenza orientà il Cussegl grond gia ordavant davart la con­currenza d'investiders previsa per l'areal Sennhof e davart las prescripziuns dal dretg da finanzas che ston vegnir observadas (resposta da la Regenza dals 13 da mars 2013 a la dumonda Michel concernent ina midada d'utilisaziun dal Sennhof: Ina pra­schun che pussibilitescha libertad d'agir; resposta da la Regenza dals 23 d'avust 2017 a la dumonda Widmer-Spreiter concernent il futur dal Sennhof).

En il rom da la concurrenza d'investiders publica ch'il chantun ha organisà l'onn 2018 ha il team d'investiders grischun enturn la "Societad simpla Sennhof" inoltrà l'offerta la pli persvadenta cun il project "Continuum". Il project maina vinavant la structura existenta dals edifizis en ina moda persvadenta cun in nov edifizi e s'integrescha armonicamain e ponderadamain en la citad veglia. L'idea generala vegn sustegnida da la cumbinaziun multifara e bain structurada da l'utilisaziun cun restaurant, mastergn, differentas furmas d'abitar, cultura e spazi per studentas e students e correspunda uschia als criteris da giudicament.

En in sectur parzial da la zona d'abitar han ils investiders proponì da construir abita­ziuns da societads cooperativas, quai ch'il chantun ha beneventà. Quai n'è dentant ni stà ina pretensiun dal program da concurrenza ni in criteri decisiv dal gremi da giudi­cament ni ina part da las cundiziuns dal contract da dretg da construcziun ch'è vegnì concludì l'onn 2019.

Tar la dumonda 1: Durant l'emprima mesadad da l'onn 2019 han ils investiders infur­mà il chantun che las abitaziuns da societads cooperativas na sajan finanzialmain betg supportablas e ch'i stoppian vegnir tschertgadas autras furmas da finanziaziun.

Tar las dumondas 2 e 3: Cunquai ch'ils investiders n'han betg violà las prescripziuns (criteris da giudicament) da la concurrenza e las regulaziuns contractualas (contract da dretg da construcziun) cun lur decisiun, n'è ina intervenziun resp. n'èn mesiras dal chantun stadas ni adequatas ni giuridicamain pussaivlas.

Tar la dumonda 4: Il chantun n'ha betg ina basa legala per promover abitaziuns favuraivlas da societads cooperativas. Perquai n'han er betg disditg mecanissems da controlla.

29 da zercladur 2021