Dumonda Marti concernent l'unda d'intervenziuns en il Cussegl grond

Sessiun: 21.04.2021

Ils ultims onns – uschia constateschan las sutsegnadras ed ils sutsegnaders – è il dumber d'intervenziuns creschì fermamain. Fitg bain sentan ins las intervenziuns avant las elecziuns. Ma er singulas deputadas e singuls deputads dattan en egl tras in'accumulaziun d'intervenziuns e da dumondas. En quest connex n'èsi betg exnum automaticamain uschia, che tgi che inoltrescha dapli intervenziuns, presta er dapli en il Cussegl grond.

Il dretg sin intervenziuns è in instrument impurtant per las parlamentarias ed ils parlamentaris. Tuttina – uschia l'avis da las sutsegnadras e dals sutsegnaders – na duess ina tscherta mesira betg vegnir surpassada areguard la frequenza d'incumbensas, da dumondas e da questiuns durant l'ura da dumondas e duess vegnir observada ina relevanza surordinada. Igl è numnadamain generalmain enconuschent che intervenziuns chaschunan blera lavur a l'administraziun ed èn qua e là memia operativas, quai che pleda cunter la separaziun da las pussanzas.

Perquai vegnan tschentadas a la Regenza las suandantas dumondas, las qualas en spezial er il Cussegl grond pudess trair a niz en il senn d'ina autoreflexiun.

Quantas intervenziuns (incumbensas, dumondas, ura da dumondas) èn vegnidas inoltradas ils ultims 4 onns mintga onn?
Quantas da questas intervenziuns avessan pudì vegnir liquidadas – tenor l'avis da la Regenza – er a maun d'in simpel telefonat al commember da la Regenza cumpetent u a l'uffizi cumpetent?
Quantas uras lavur chaschuna ina intervenziun en media?
Quantas intervenziuns (mo incumbensas) èn vegnidas acceptadas procentualmain?
Tar quantas dumondas è l'emprima sutsegnadra u l'emprim sutsegnader stà cuntent cun la resposta?

Tavau, ils 21 d'avrigl 2021

Marti, Pfäffli, Aebli, Berweger, Bettinaglio, Bigliel, Brandenburger, Brunold, Buchli-Mannhart, Caluori, Casutt-Derungs, Caviezel (Tavau Clavadel), Censi, Della Cà, Deplazes (Rabius), Dürler, Engler, Epp, Felix, Flütsch (Spleia), Föhn, Gugelmann, Hardegger, Hartmann-Conrad, Hefti, Holzinger-Loretz, Jochum, Kienz, Koch, Kunfermann, Kuoni, Loepfe, Maissen, Märchy-Caduff, Michael (Donat), Mittner, Müller (Susch), Natter, Paterlini, Salis, Sax, Schneider, Stiffler, Tanner, Thomann-Frank, Thür-Suter, Ulber, von Ballmoos, Waidacher, Weidmann, Wellig, Widmer (Favugn), Zanetti (Landquart), Adank-Arioli, Costa, Decurtins-Jermann, Flütsch (St. Antönien), Heini, Maurizio, Tomaschett (Cuira)

Resposta da la regenza

Intervenziuns èn instruments d'agir parlamentars impurtants, cun ils quals las deputadas ed ils deputads, las fracziuns e las cumissiuns pon pretender mesiras, sbozs per novas disposiziuns giuridicas, infurmaziuns u rapports da la Regenza. Las intervenziuns èn in instrument indispensabel per exequir il mandat parlamentar. Ils art. 46 ss. da la Lescha davart il Cussegl grond (LCG; DG 170.100) reglan las differentas intervenziuns parlamentaras pussaivlas en il Cussegl grond. L'art. 65 da l'Urden da gestiun dal Cussegl grond (UGCG; DG 170.140) regla unicamain in'examinaziun formala tras la Conferenza da las presidentas e dals presidents. Ulteriuras pussaivladads da restricziun n'èn previsas ni en la Lescha davart il Cussegl grond ni en l'Urden da gestiun ni en il Manual per las tractativas en il Cussegl grond. Uschia èsi la finala chaussa da las commembras e dals commembers dal Cussegl grond da considerar tge ch'è indispensabel per exequir il mandat parlamentar resp. tge ch'è necessari per liquidar en moda speditiva las fatschentas.

Tar la dumonda 1: La suandanta tabella mussa il dumber d'intervenziuns durant ils onns 2017–2020:

Onn	Incumbensas	Dumondas	Ura da dumondas
2017	24	42	66
2018	24	28	91
2019	38	52	72
2020	28	33	93

Tar la dumonda 2: La Regenza na po betg respunder questa dumonda. Igl è la natira da la chaussa che las incumbensas na pon betg vegnir liquidadas per telefon. Cuntrari a las infurmaziuns che commembers da la Regenza u l'administraziun dattan al telefon (l'administraziun po infurmar mo davart dumondas tecnicas), permettan las dumondas parlamentaras ina debatta publica en il Cussegl grond e las dumondas durant l'ura da dumondas almain ina tscherta publicitad per in tema.

Tar la dumonda 3: Questas datas na vegnan betg eruidas resp. en quest connex na vegn fatga nagina statistica. En general poi dentant vegnir ditg ch'il temp che sto vegnir impundì per respunder ina intervenziun parlamentara dependa da differents facturs, sco la cumplexitad, la dimensiun, il dumber da posts da servetsch e da departaments involvids, e che la resposta chaschuna in pèr uras (cunzunt dumondas da l'ura da dumondas) fin plirs dis lavur.

Tar la dumonda 4: La suandanta tabella mussa il dumber d'incumbensas liquidadas ed acceptadas durant ils onns 2017–2020. En la colonna "Incumbensas acceptadas" èn resguardadas tut las incumbensas ch'èn vegnidas acceptadas, saja quai dal tuttafatg, per part u cun midadas (art. 67 al. 2 e 3 UGCG):

Onn	Incumbensas liquidadas	Incumbensas acceptadas	En pertschient
2017	31	20	64,5 %
2018	26	12	46,1 %
2019	35	21	60,0 %
2020	27	20	74,1 %

Tar la dumonda 5: La suandanta tabella mussa la "cuntentientscha da la persuna che ha fatg la dumonda" (emprima sutsegnadra u emprim sutsegnader) en il senn da l'art. 70 al. 2 UGCG areguard las dumondas dals onns 2017–2020. En la colonna "Cuntent(a) cun la resposta" n'èn las decleraziuns "parzialmain cuntentada" resp. "parzialmain cuntentà" betg resguardadas.

Onn	Dumondas liquidadas	Cuntent(a) cun la resposta	En pertschient
2017	41	13	31,7 %
2018	32	13	40,6 %
2019	46	12	26,1 %
2020	45	12	26,7 %

30 da zercladur 2021

Navigation

Suche

Inhaltsbereich

Dumonda Marti concernent l'unda d'intervenziuns en il Cussegl grond

Resposta da la regenza