Navigation

Inhaltsbereich

Dumonda Tomaschett (Cuira) concernent ils temps da spetga en connex cun il tractament psicologic e psichiatric d'uffants e da giuvenils

Sessiun: 16.06.2021

Per uffants e per giuvenils cun malsognas psichicas e cun problems psicosocials stattan a disposiziun en il Grischun las purschidas ambulantas e staziunaras da la psichiatria d'uffants e da giuvenils (PUG) sco er psicologs e psichiatras che lavuran ambulantamain cun uffants e cun giuvenils. Las purschidas terapeuticas da la PUG e dal post da tractament ambulant èn stadas occupadas gia fitg ferm ils onns passads. En il fratemp èsi propi regularmain il cas, che uffants e giuvenils sco er lur famiglias ston spetgar per part plirs mais, fin ch'els survegnan in termin tar ina terapeuta u tar in terapeut.

Gist uffants e giuvenils en situaziuns problematicas e cumplexas da sanadad e socialas dovran in sustegn svelt e professiunal. Ils geniturs, las persunas d'instrucziun u las purschidas simplas sco la lavur sociala da scola u la lavur cun giuvenils pon bain constatar problems, ma betg tractar quels en moda adattada. Gist per uffants e per giuvenils èn temps da spetga d'ina durada uschè lunga problematics, perquai ch'in mais è fitg lung en il mund real dals uffants e dals giuvenils. Durant quest temp da spetga daventan ils problems avant maun savens pli acuts. En blers cas permettess in tractament terapeutic a temp da preservar uffants e giuvenils da problems da sanadad anc pli gronds sco er d'evitar escalaziuns che han savens ulteriuras consequenzas.

Il chantun Grischun è obligà da procurar ch'il provediment da la sanadad en il chantun Grischun saja garantì per tut las gruppas en mira. La situaziun actuala en il sectur da la psichiatria e da la psicologia d'uffants e da giuvenils na satisfa dentant ni per la terapeuta u il terapeut ni per las persunas pertutgadas u il post interdisciplinar assegnant sco la scola, la lavur sociala da scola u la lavur cun giuvenils. Per meglierar la situaziun actuala ston pia vegnir fatgs scleriments detagliads da la situaziun mumentana cun ils partenaris da contact involvids sco er fixads pass d'agid concrets respectivs.

Perquai vulessan las sutsegnadras ed ils sutsegnaders savair da la Regenza:

  1. Co valitescha la Regenza ils temps da spetga tar la PUG sco er tar las psichiatras ed ils psichiaters independents che lavuran ambulantamain cun uffants e cun giuvenils?
  2. Co pudessan quests temps da spetga menziunads vegnir scursanids e tge contribuziun pudess il chantun prestar en chaussa?
  3. Tge motivs/svilups èn tenor la Regenza responsabels per ils temps da spetga actuals?

Tavau, ils 16 da zercladur 2021

Tomaschett (Cuira), Hitz-Rusch, Gugelmann, Atanes, Baselgia-Brunner, Bettinaglio, Buchli-Mannhart, Cantieni, Caviezel (Cuira), Clalüna, Degiacomi, Deplazes (Rabius), Derungs, Dürler, Ellemunter, Florin-Caluori, Hardegger, Hartmann-Conrad, Hofmann, Holzinger-Loretz, Märchy-Caduff, Müller (Favugn), Müller (Susch), Niggli-Mathis (Grüsch), Noi-Togni, Perl, Preisig, Rettich, Ruckstuhl, Rutishauser, Schwärzel, Stiffler, Thomann-Frank, Tomaschett-Berther (Trun), von Ballmoos, Weber, Widmer-Spreiter (Cuira), Wilhelm, Bürgi-Büchel, Spadarotto, Stieger

Resposta da la regenza

L'augment considerabel d'annunzias respectivamain d'attribuziuns d'uffants e da giuvenils en la dimensiun da 20 fin 30 pertschient (cifras exactas en chaussa na datti betg) dapi l'erupziun da la pandemia dal coronavirus chaschunan grondas sfidas per la psichiatria d'uffants e da giuvenils dals Servetschs psichiatrics dal Grischun (SPGR), ma er per las persunas spezialisadas che lavuran independentamain en il sectur da la psicologia, da la psicoterapia sco er da la psichiatria d'uffants e da giuvenils.

Il temp da spetga per tractaments ambulants è s'augmentà l'enviern passà – betg sco ultim pervia da l'augment dramatic dals dumbers da cas – da circa 6 fin 8 ad 8 fin 12 emnas. Cas d'urgenza, en spezial tals da la psichiatria d'uffants e da giuvenils dals SPGR, vegnan però envidads anc il medem di ad ina consultaziun. L'Associa­ziun grischuna da psicoterapia renviescha al fatg che d'ina vart s'augmenta la du­monda e da l'autra vart resta constant il dumber da persunas spezialisadas che lavu­ran independentamain en il sectur da la psicologia, da la psicoterapia sco er da la psichiatria d'uffants e da giuvenils. Ina part da quellas terminescha l'activitad profes­siunala pervia da la vegliadetgna ed igl è en vista mo in dumber limità da successu­ras e successurs. Tenor l'Associaziun grischuna da psicoterapia èn las persunas spezialisadas che lavuran independentamain en il sectur da la psicologia, da la psi­coterapia sco er da la psichiatria d'uffants e da giuvenils savens sfurzadas – perquai ch'ellas n'han betg avunda capacitads – d'attribuir uffants e giuvenils a la psichiatria d'uffants e da giuvenils dals SPGR. Sco motiv per la mancanza da la generaziun giuvna da persunas spezialisadas che lavuran independentamain en il sectur da la psicologia, da la psicoterapia sco er da la psichiatria d'uffants e da giuvenils vesa l'Associaziun grischuna da psicoterapia en spezial la tariffaziun da lur prestaziuns cleramain sut la media.

S'augmentà è er il temp da spetga per tractaments staziunars, dentant betg uschè ferm sco en il sectur ambulant. Actualmain po el importar 1 emna fin 2 mais. El de­penda er dal lieu dal tractament. Uffants e giuvenils che basegnan in tractament en in rom serrà, vegnan attribuids a la clinica Littenheid. Uffants e giuvenils che pon vegnir tractads sin ina staziun averta, pon da princip restar en il chantun: giuvenils a partir da 12 onns en la staziun da giuvenils dals SPGR, uffants fin 12 onns tut tenor la diagnosa en la clinica d'uffants da l'Ospital chantunal dal Grischun, nua ch'els vegnan assistids en moda consiliara da la psichiatria d'uffants e da giuvenils dals SPGR, uschiglio medemamain en la clinica Littenheid. Cas d'urgenza da giuvenils, quai vul dir cas, nua ch'igl exista ina periclitaziun da sasez u d'autras persunas, vegnan tractads – sche pussaivel ord vista medicinala – en la staziun d'urgenza da la psichiatria da persunas creschidas en il Waldhaus.

Il problem cun il temp da spetga en la psichiatria d'uffants e da giuvenils exista en tut la Svizra e betg pir dapi l'erupziun da la pandemia dal coronavirus, mabain è s'ac­centuà gia ils onns avant la pandemia. Tras la pandemia dal coronavirus vegn il pro­blem ch'è enconuschent en ils circuls spezialisads tematisà pli savens en la publici­tad.

Tar la dumonda 1: Temps da spetga èn da princip nauschs per il tractament da mal­sognas psichicas, perquai che la sintomatica progredescha savens uschia. Pli baud e pli svelt ch'il tractament ha lieu, e pli curt ch'il process da guariziun è e dapli suc­cess ch'el ha. Tut tenor l'indicaziun èn dentant differents temps da spetga giustifitga­bels per in tractament terapeutic ambulant u staziunar. Las annunzias che entran ve­gnan zavradas correspundentamain d'expertas ed experts da la psichiatria d'uffants e da giuvenils tenor ils scenaris da partenza, che defineschan l'urgenza d'in tracta­ment.

Tar la dumonda 2: Per reducir ils temps da spetga per giuvenils en il sectur staziunar han ils SPGR decidì d'installar ina staziun serrada cun tschintg letgs per giuvenils en la chasa da persunal da la clinica Waldhaus, fin che l'edifizi nov da la clinica per psichiatria d'uffants e da giuvenils dals SPGR vegn avert (previsiblamain il segund quartal da l'onn 2025). Uschia po il tractament da cas d'urgenza da giuvenils vegnir separà spazialmain dal sectur da persunas creschidas. Sco ulteriura mesira per re­ducir ils temps da spetga per tractaments ambulants han ils SPGR adattà ils process a las relaziuns actualas. Tant sco giustifitgabel è la durada da terapias currentas vegnida reducida per pudair cumenzar tractaments da novs cas annunziads. Ultra da quai èn vegnidas stgaffidas mintgamai duas novas plazzas per psicologas e psico­logs sco er per psichiatras e psichiaters d'uffants e da giuvenils.

Sco contribuziun per dumagnar la dumonda han las persunas spezialisadas che lavuran independentamain en il sectur da la psicologia, da la psicoterapia sco er da la psichiatria d'uffants e da giuvenils augmentà per part lur pensums da lavur.

L'onn current paja il chantun als SPGR ina contribuziun da 3,1 milliuns francs per prestaziuns d'utilitad publica, da quels èn 1,35 milliuns francs per la psichiatria d'uffants e da giuvenils. La Regenza è pronta d'examinar l'augment da questa contribuziun, sche quest import na bastass betg per cuvrir ils custs dals SPGR per las prestaziuns d'utilitad publica ch'èn necessarias en la psichiatria d'uffants e da giuvenils.

Tar la dumonda 3: Per ils temps da spetga actuals dastgassan esser responsablas essenzialmain las grevezzas psichicas dals uffants e dals giuvenils, che resultan da las restricziuns pervia da la pandemia dal coronavirus che dura anc vinavant. En quest connex na datti dentant anc nagins studis expressivs. 

1. da settember 2021