Navigation

Inhaltsbereich

Sessiun: 20.10.2021

Ils ultims mais hai jau stuì constatar ch'i vegnan utilisadas dapertut en il chantun adina dapli dronas cun cameras e cun cameras termicas. Natiralmain pon dronas cun cameras e cun traplas fotograficas vegnir applitgadas per tschertas incumbensas. Displa­schaivlamain vegnan quests meds tecnics applitgads ed utilisads per part en moda nunprofessiunala. Tschertas persunas dovran quests meds cun respect, autras ignoreschan tut. Plinavant chattan ins er dapertut cameras da fotografar, traplas fotograficas e cameras termicas che registreschan e surveglian conscientamain u inconscientamain di e notg las persunas ed ils animals. Da la sfera privata vegni prendì resguard plitost darar.

Il svilup incontrollabel da meds tecnics che pon vegnir applitgads di e notg e dapertut per survegliar umans ed animals, sto vegnir reglà.

L'utilisaziun da tals meds tecnics duai vegnir franada. Tut tgi che vul utilisar tals meds sto far ina scolaziun da basa e reussir in examen. Uschia pudess ins render attent ils utilisaders a la problematica ed a la sfera privata.

Nus essan in chantun turistic che vul porscher als abitants ed als giasts in'atmosfera d'abitar agreabla e che sto en mintga cas proteger la sfera privata.

Per quests motivs duai la Regenza vegnir incumbensada d'adattar las leschas e las ordinaziuns chantunalas pertutgadas uschia, che la sfera privata en il chantun Grischun vegn definida sco bain d'auta valur e ch'ella vegn er protegida correspundentamain.

Cuira, ils 20 d'october 2021

Berther, Giacomelli, Schmid, Alig, Berweger, Bettinaglio, Brunold, Caluori, Cantieni, Casty, Crameri, Danuser, Della Cà, Della Vedova, Deplazes (Rabius), Derungs, Ellemunter, Engler, Epp, Flütsch, Föhn, Hardegger, Hartmann-Conrad, Holzinger-Loretz, Kasper, Kohler, Kunfermann, Loepfe, Maissen, Märchy-Caduff, Müller (Susch), Natter, Noi-Togni, Ruckstuhl, Sax, Schwärzel, Ulber, von Ballmoos, Widmer-Spreiter (Cuira), Bürgi-Büchel, Collenberg, Costa

Resposta da la regenza

En l'art. 13 da la Constituziun federala da la Confederaziun svizra (Cst.; CS 101) è francà il princip che mintga persuna ha il dretg che sia vita privata e sia vita da famiglia, sia abitaziun sco er ses traffic da brevs, da posta e da telecommunicaziun vegnian protegids sco er il dretg che las datas persunalas sajan protegidas cunter abus. Sin basa da l'urden da cumpetenzas constituziunal da l'art. 122 al. 1 Cst. vegn l'elavuraziun da datas persunalas tras persunas privatas reglada definitivamain en la Lescha federala davart la protecziun da datas (LPD; CS 235.1). Areguard la sur­ve­glianza visuala che vegn fatga da glieud privata e che sa referescha ad autras per­su­nas n'ha il chantun naginas ulteriuras cumpetenzas da reglar il dretg davart la pro­tec­ziun da datas.

Tgi che sa procura, archivescha ed elavura datas persunalas (cf. art. 3 lit. a LPD), intervegn en la sfera privata. Questa intervenziun è illegala, sch'ella n'è betg giu­sti­fitgada tras il consentiment da la persuna violada, tras in interess privat u public pre­dominant u tenor la lescha (art. 13 al. 1 LPD). En cas da traplas fotograficas na vegn il consentiment gia da bel principi betg en consideraziun. Medemamain exclus è in interess public u privat predominant en cas che talas cameras vegnan duvradas sin basa privata. Consequentamain èn traplas fotograficas da persunas privatas scu­mandadas sin terren public, uschenavant che registraziuns da persunas èn pus­sai­vlas.

Sche dronas – che vegnan equipadas cun cameras u cun auters apparats da sur­ve­glianza – vegnan duvradas commerzialmain u sin basa privata e sche persunas de­terminadas u determinablas èn da vesair sin las registraziuns, èn las prescripziuns da la LPD medemamain decisivas. En il cas «Google Street View» (DTF 138 II 346) ha il Tribunal federal subsumà il suandant sut il dretg da sfera privata: ils dretgs da la persuna pertutgada sezza sco er sias chasas, sias abitaziuns, ses ierts e ses vehi­chels fotografads, uschenavant che questas registraziuns vegnan publitgadas en l'in­ternet ed èn libramain accessiblas per mintgina e mintgin. Areguard las dronas pari essenzial che bains immobigliars pon vegnir filmads or d'ina tscherta perspectiva che n'è betg pussaivla per autras persunas senza drona. En cas d'in diever da dronas exista da princip la ristga considerabla che persunas vegnan filmadas e ch'i dat cor­respundentamain in'elavuraziun inadmissibla da datas persunalas (cf. fegl d'in­fur­ma­ziun «Videoüberwachung mit Drohnen durch Private» da l'incumbensà federal per la protecziun da datas e per la transparenza). Sche la sfera privata vegn violada en consequenza d'ina elavuraziun da datas resp. d'ina surveglianza visuala, po la per­suna pertutgada purtar plant tar ina dretgira civila sin basa da l'art. 28 dal Cudesch civil svizzer (CCS; CS 210).

La surveglianza visuala e l'elavuraziun da datas tras autoritads chantunalas u com­munalas èn regladas en la Lescha chantunala davart la protecziun da datas (LCPD; DG 171.100) ed en las legislaziuns spezialas respectivas. Per l'elavuraziun da datas persunalas ston vegnir respectads ils princips generals dal dretg davart la protecziun da datas. Ultra da quai ston ils apparats da surveglianza vegnir marcads en moda adequata. Pervia da quai èn per exempel las traplas fotograficas da l'Uffizi da cha­tscha e pestga munidas cun infurmaziuns che decleran l'intent da l'apparat. Plinavant vegnan registraziuns da persunas stizzadas immediatamain.

Las disposiziuns chantunalas numnadas èn sa cumprovadas en il passà e na duain perquai betg vegnir adattadas tenor l'avis da la Regenza. Medemamain n'ha la Re­genza actualmain er betg l'intenziun d'integrar regulaziuns concernent dronas en l'Ordinaziun chantunala davart l'aviatica (OCA; DG 875.100), perquai che la Con­fe­deraziun vegn a suttametter l'Ordinaziun dal DATEC davart eromobils da categorias spezialas (OECS; CS 748.941) ad ina revisiun totala en connex cun la surpigliada planisada da la regulaziun da dronas da la UE (guardar resposta da la Regenza dals 27 d'october 2020 a la dumonda Bigliel concernent la protecziun dal stabiliment giu­dizial Cazas Tignez e d'autras infrastructuras sensiblas cunter attatgas da dronas cun adattar l'Ordinaziun chantunala davart l'aviatica [DG 875.100]; conclus da la Regenza nr. 872/2020). Ultra d'installar per l'entira Svizra zonas unitaras cun in scumond da sgol prevesa la revisiun federala er d'introducir in'obligaziun da regi­stra­ziun sco er ina scolaziun ed in examen per pilotas e pilots da dronas.

Sa basond sin questas explicaziuns propona la Regenza al Cussegl grond da refusar questa incumbensa.

23 da december 2021