Il zercladur 2020 ha il Cussegl grond dal chantun Grischun acceptà unanimamain – en il senn da la Regenza – la «Incumbensa Hohl concernent ina meglra integraziun da las persunas che possedan abitaziuns secundaras en il Grischun».
La finamira da l'incumbensa eri spezialmain, da colliar ils segundindigens meglier cun il Grischun e d'als far daventar – en il cas ideal – indigens. Omaduas mesiras han la finamira da generar dapli valurisaziun per il Grischun.
Ultra da las attractivas cundiziuns generalas en il Grischun gia menziunadas en l'incumbensa ed ultra da las schanzas anc pli grondas che resultan da la pandemia da COVID (dapli libertads, lavurar en il homeoffice e.u.v.) ha il Cussegl grond – en la legislatura actuala – stgaffì plirs impuls fiscals per che persunas segundindigenas prendian domicil en il Grischun:
- en il rom da la realisaziun chantunala da la RFFA è vegnida decidida ina furma attractiva – en cumparegliaziun interchantunala – per l'imposiziun da la taglia sin dividendas;
- en il rom da la revisiun chantunala da la taglia sin la part d'ierta èn la taglia sin l'ierta e la taglia sin donaziuns vegnidas concepidas en moda pli attractiva che fin ussa;
- medemamain è vegnida reducida l'imposiziun da la taglia sin pajaments da chapital ord il provediment da vegliadetgna – quai sin in nivel attractiv en cumparegliaziun cun ils ulteriurs chantuns svizzers.
Er sch'ils effects da las diversas revisiuns da la lescha da taglia na pon anc betg vegnir giuditgads, saja quai a curta, a media u a lunga vista, ed er sche la realisaziun da l'incumbensa Hohl è vegnida retardada tras la pandemia, sa mussan segiramain gia tendenzas en il barat tranter persunas segundindigenas e vischnancas.
Las sutsegnadras ed ils sutsegnaders tschentan perquai las suandantas dumondas:
- Co guarda ora il stadi actual da la realisaziun da la «Incumbensa Hohl concernent ina meglra integraziun da las persunas che possedan abitaziuns secundaras en il Grischun» e tge è planisà sin l'axa cronologica?
- Èn ils avantatgs da la cumpetitivitad fiscala ch'è vegnida stgaffida da nov vegnids communitgads spezialmain a las persunas segundindigenas e co als han ellas recepids?
- Datti dapi la surdada da l'incumbensa Hohl novas tendenzas areguard las persunas segundindigenas, èn talas eventualmain vegnidas acceleradas da la pandemia?
Cuira, ils 20 d'october 2021
Hohl, Engler, Berweger, Claus, Felix, Flütsch, Hartmann-Conrad, Hitz-Rusch, Holzinger-Loretz, Jochum, Kasper, Kuoni, Loi, Michael (Castasegna), Mittner, Natter, Nicolay, Niggli (Samedan), Papa, Pfäffli, Rüegg, Stiffler, Thomann-Frank, Weidmann, Wellig, Wieland, Bonderer, Lunghi