Navigation

Inhaltsbereich

Dumonda Rettich concernent la perdita dal suttetg

Sessiun: 20.10.2021

En Svizra è il dumber da persunas senza tetg creschì ils ultims onns. Er en il Grischun datti puspè persunas senza tetg. A Cuira datti bain in alloschi d'urgenza, tschertas persunas crodan dentant er tras il raster da quel. Tar quellas tutgan per exempel famiglias, generalmain persunas senza problematica da dependenza, persunas che duain vegnir reintegradas suenter ina dimora en praschun e.u.v. Bleras persunas chattavan suttetg tar amias ed amis u tar parents en il passà. Quai na para dentant, en vista a la situaziun che persunas senza tetg vivan puspè en il Grischun, cleramain betg pli dad esser pussaivel.

Il rapport dad Infodrog ha mussà ch'il Grischun ha in basegn d'agir en il sectur da las purschidas d'abitaziuns assistidas socialpedagogicas. Ils proxims mais sa sbassan las temperaturas e la situaziun per las persunas senza tetg daventa pli critica. Turitg fa frunt a questa sfida cun la purschida da l'ambulanza sociala. A Berna s'occupa la gruppa d'intervenziun ambulanta Pinto da las persunas senza tetg.

Cun il streetwork ch'il chantun ha surpiglià da la citad, vegn la clientella da las persunas dependentas da drogas tractada ambulantamain. Per persunas che na sa movan dentant betg en quests circuls, mancan percunter ina purschida d'agid adattada sco er furmas d'abitar adequatas. Ultra da quai è la purschida limitada a curta fin a maximalmain media vista e na preschenta nagina soluziun da lunga durada per persunas senza tetg. La problematica da la perdita dal suttetg è in stadi insupportabel e sto vegnir prendida per mauns cun gronda prioritad per evitar in ulteriur svilup negativ. Per quest intent dovri in scleriment da la situaziun sco er in proceder structurà cleramain.

Per quests motivs tschentan las sutsegnadras ed ils sutsegnaders las suandantas dumondas a la Regenza:

  1. Co è sa sviluppà il fenomen perdita dal suttetg en il Grischun ils ultims onns?
  2. Co planisescha la Regenza da far frunt a quest svilup, sch'ina tendenza negativa vegn constatada?
  3. En tge furma è gia vegnida e vegn integrada la recumandaziun d'agir dal rapport d'Infodrog pertutgant las furmas d'abitar socialpedagogicas en il chantun?

Cuira, ils 20 d'october 2021

Rettich, Hardegger, Della Vedova, Atanes, Baselgia-Brunner, Cahenzli-Philipp, Cantieni, Caviezel (Cuira), Degiacomi, Gartmann-Albin, Hofmann, Holzinger-Loretz, Horrer, Müller (Favugn), Noi-Togni, Perl, Preisig, Rutishauser, Schwärzel, von Ballmoos, Wilhelm, Bürgi-Büchel, Pajic, Stieger, Tomaschett (Cuira)

Resposta da la regenza

"La perdita dal suttetg è […] la pli gravanta da pliras situaziuns d'abitar precaras. Ul­tra da la perdita dal suttetg […] datti dasperas las dimensiuns da l'abitar betg segirà sco er da l'abitar insuffizient. [La perdita dal suttetg] stat adina en connex cun l'exclu­siun dal martgà d'abitaziuns" (Drilling, M., Mühlethaler, E. & Iyadurai, G. [2020] Ob­dachlosigkeit. Erster Länderbericht Schweiz. Muttenz: ISOS / SAS-NV.)

Il spazi d'abitar vegn stgaffì en Svizra ed er en il Grischun per la gronda part tras persunas privatas. La locaziun da spazi d'abitar è suttamessa al dretg privat. La lo­catura u il locatur po per il solit selecziunar a tgi ch'ella u el dat en locaziun l'abita­ziun. Quai ha per consequenza ch'intginas gruppas da persunas han – pervia da lur situaziun da vita actuala – difficultads da chattar e da tegnair in'abitaziun al lieu gia­vischà e confurm a lur pussaivladads finanzialas. Latiers tutgan en il Grischun per part persunas ch'èn en in center da transit, en ina chasa da dunnas, en in stabiliment giudizial u en ina clinica. Ellas vegnan en general sustegnidas tras questas institu­ziuns tar la soluziun transitorica ed uschia tar la tschertga d'abitaziuns. In'ulteriura gruppa èn persunas che retiran agid social e che vegnan sustegnidas en questa situaziun tras l'Uffizi chantunal dal servetsch social per tschertgar in'abitaziun. Plina­vant pon persunas cun ina dependenza da drogas esser pertutgadas da la perdita dal suttetg. L'Uniun per l'agid da survivenza porscha ad ellas plazzas d'alloschi d'ur­genza e sustegn per tschertgar in'abitaziun. Il chantun è cuntinuadamain en il barat cun l'Uniun per l'agid da survivenza e procura che avunda plazzas d'alloschi d'urgen­za stettian a disposiziun. Uschia èn per exempel vegnidas stgaffidas ed er finanzia­das chombras da durmir supplementaras durant la pandemia da COVID-19, per che las mesiras da protecziun da la Confederaziun possian vegnir resguardadas. Qua tras n'ha nagin stuì vegnir refusà en l'alloschi d'urgenza durant l'onn current pervia d'ina chombra da durmir mancanta.

Per l'accumpagnament intensiv da fugitivas e fugitivs tar la tschertga d'abitaziuns ha il chantun fatg dapi l'onn 2013 ina incarica da prestaziun cun la Caritas dal Grischun. La purschida è vegnida extendida en il fratemp sin ulteriuras gruppas da persunas. La premissa è che l'organisaziun assegnanta surpiglia ils custs d'ina incumbensa da tschertga e che las persunas che tschertgan in'abitaziun vulan trair a niz questa pur­schida. A mintga persuna che tschertgava in'abitaziun ha la Caritas dal Grischun pudì porscher fin ussa in'abitaziun adequata e pajabla en il chantun.

La Regenza renconuscha en general il basegn da spazi d'abitar adequat en spezial per persunas dependentas da drogas senza suttetg. En quest connex na stat dentant savens betg la tschertga d'abitaziuns en il center, mabain la segirada dal spazi d'ab­itar. La Regenza ha perquai dumandà il Cussegl grond meds finanzials dal preventiv per promover l'abitar assistì per questas persunas ils proxims onns.

Tar la dumonda 1: La Polizia chantunala, l'Autoritad per la protecziun d'uffants e da creschids sco er l'Uffizi chantunal dal servetsch social n'han registrà ils ultims onns nagin augment da persunas senza tetg. L'Uniun per l'agid da survivenza cun l'allo­schi d'urgenza ha observà ils ultims dus onns in augment da las pernottaziuns en l'alloschi d'urgenza.

Tar la dumonda 2: Per persunas dependentas da drogas prevesa la Regenza tenor il conclus dals 29 da zercladur 2021 (prot. nr. 629/2021) tranter auter da sviluppar vi­navant e d'engrondir la purschida da l'abitar assistì ils proxims onns. Il Cussegl grond ha mess a disposiziun ils meds finanzials necessaris en la sessiun da december 2021.

Tar la dumonda 3: Il rapport d'Infodrog furma ina da las basas dal conclus da la Re­genza menziunà ed uschia er da la dumonda al Cussegl grond. La dumonda da la Regenza cumpiglia meds finanzials dal preventiv per l'abitar assistì per persunas de­pendentas da drogas, per la lavur sociala extra muros (streetwork a Cuira), per l'ex­tensiun dal post da contact e da consultaziun sco er il rinforzament e la coordinaziun dals differents acturs.

17 da december 2021