Enquistas da las collavuraturas e dals collavuraturs èn in instrument impurtant per vegnir a savair la vista dal persunal. Ellas furneschan infurmaziuns fundadas davart ils basegns da las collavuraturas e dals collavuraturs sco er davart las fermezzas e da­vart ils potenzials da meglieraziun dal patrun. Plinavant registreschan las persunas directivas responsablas ils interess dal persunal areguard la relaziun da lavur sin tut ils stgalims, quai per exempel tras ils discurs annuals per il giudicament da las colla­vuraturas e dals collavuraturs (MAB). Gist quests MAB, che han lieu periodicamain e che vegnan documentads, èn sa cumprovads en il passà.

Ultra d'ina enquista tar il Departament da giustia, segirezza e sanadad èn tut las col­lavuraturas ed ils collavuraturs vegnids interrogads l'onn 2021 a chaschun dal project «egual21 – Plan d'acziun per l'egualitad» e quai per part cun agid da questiunaris on­line, d'intervistas respectivamain da lavuratoris. Là han ins eruì las cundiziuns gene­ra­las, ils process, il punct da vista da la direcziun sco er ils basegns da las collavura­tu­ras e dals collavuraturs areguard ils temas egualitad e cumpatibilitad da la profes­siun cun la vita privata. Cun 57 pertschient è la procentuala da respostas allegraivla, ed ella mussa che las collavuraturas ed ils collavuraturs han in interess d'exprimer lur opiniun. Plinavant èn previsas l'onn 2022 enquistas sistematicas tar singuls posts da servetsch. L'Uffizi da persunal è stà ed è involvì tar tut las enquistas. Per la direcziun, per l'Uffizi da persunal e per il Post da stab per l'egualitad da las schanzas èn ils resultats ina basa impurtanta per sviluppar mesiras intenziunadas.

Enquistas sveglian ina tscherta tenuta d'aspectativas tar las participantas ed ils parti­ci­pants. Tenor l'avis da la Regenza èsi impurtant ch'i vegnian fatgas enquistas mo da­­vart temas, nua ch'i dat er in spazi ed ina voluntad d'agir e nua che quest spazi e questa voluntad vegnan fixads gia ordavant. Las enquistas duain vegnir preparadas ed evaluadas en moda professiunala, uschia ch'igl è pussaivel da deducir e da reali­sar mesiras concretas sin basa da las enquistas. Il success duai vegnir controllà a maun da repetiziuns. Per tegnair la frequenza da las enquistas sin in nivel commen­su­rà vegnan coordinadas – tenor il basegn – enquistas sistematicas tras l'Uffizi da persunal. Qua tras s'empermetta la Regenza ch'il dumber d'enquistas restia surve­sai­vel, che la procentuala da respostas saja auta e che l'elavuraziun posteriura pos­sia vegnir coordinada.

La Regenza è conscienta dal niz ch'enquistas dal persunal portan per l'entira admini­st­ra­ziun chantunala, en cumplettaziun da las enquistas specificas u dals discurs an­nu­als cun las collavuraturas ed ils collavuraturs. Da vegnir a savair l'opiniun da las col­­lavuraturas e dals collavuraturs è fitg impurtant. Uschia duai il potenzial da meglie­raziun vegnir exaurì uschè bain sco pussaivel, quai che rinforza a medem temp l'at­trac­ti­vitad sco patrun. D'applitgar quest instrument cun cleras finamiras e tenor il ba­segn è en la responsabladad directiva ed en la cumpetenza da la Regenza. La Re­gen­za vul cunzunt sa resalvar da mintgamai definir libramain il circul da las partici­pan­tas e dals participants. Malgrà l'appreziaziun positiva da la chaussa dovri – sco quai ch'i resulta er d'ina cumparegliaziun interchantunala concernent quest instru­ment – ina flexibilitad correspundenta areguard la concepziun ed areguard la realisa­ziun. Questa flexibilitad n'è betg pussaivla tras l'incumbensa, perquai ch'ella fa pre­scrip­ziuns areguard il circul da participantas e participants ed areguard la cadenza.

Sa basond sin questas explicaziuns propona la Regenza al Cussegl grond da refusar questa incumbensa.

4 da mars 2022