Navigation

Inhaltsbereich

Incumbensa da la fracziun da la PPS concernent la Strategia d'energia 2050 (emprim sutsegnader Gort)

Sessiun: 08.12.2021

Sco preschentà en l'incumbensa da la fracziun da la PPS concernent ina infrastructura intelligenta da chargiar vehichels electrics per garantir ina rait electrica stabila, ma er en la dumonda Deplazes (Rabius) concernent la segirezza dal provediment cun energia electrica en il chantun Grischun, exista in privel latent areguard la segirezza energetica. Sin la pagina d'internet da la Confederaziun pon ins leger il suandant: Interrupziuns da l'electricitad e dal provediment durant plirs dis en tut il pajais vegnan a tutgar fermamain blers secturs da l'economia e da la societad. Il dossier da las periclitaziuns 2015 mussa in nausch maletg dals eveniments: caos da traffic, communicaziun restrenschida, persunas malsaunas e blessadas che na survegnan betg agid, return plaun e gronds donns. Quai èn ils titels che resultan d'ina interrupziun naziunala da l'electricitad.

Sco quai che la Regenza ha gia menziunà diversas giadas, è la segirezza energetica chaussa da las gestiunarias da las raits. Tenor il fegl d'infurmaziun da l'Uffizi federal d'energia han la Confederaziun ed ils chantuns dentant la rolla subsidiara da fixar cun­diziuns generalas correspundentas, per che la branscha possia ademplir sias obligaziuns e sias incumbensas.

La producziun d'energia electrica, cunzunt da las novas energias regenerablas, ha duas curvas da sinus ambivalentas (di / notg) ed (enviern / stad) areguard il consum. L'acceptaziun da la missiva Green Deal, che ha la finamira da decarbonisar la societad, rinforza anc questa disproporziun. Cun mintga implant solar – che na serva betg a la producziun d'enviern e che na consumescha betg directamain l'energia u che na po betg arcunar l'energia en in accumulatur – vegn rinforzada questa disproporziun.

La fracziun da la PPS suttametta la suandanta incumbensa a la Regenza:

  1. La Regenza elavura in studi cun il suandant cuntegn:


    a.     Cun tge consum respectivamain cun tge augment d'energia quinta il chantun fin l'onn 2050?

    b.     Tge influenza ha il Green Deal sin la segirezza energetica?

    c.     Il chantun mussa, cun tge mesiras che la mancanza d'energia d'enviern po vegnir eliminada.

    d.     Il chantun elavura e favurisescha las cundiziuns generalas che cumbattan la mancanza d'energia d'enviern.

    Mesiras immediatas:

  2.  Il chantun sustegna implants solars d'energia d'enviern. Tals implants duain pudair vegnir permess sin plaun communal en ina simpla procedura d'annunzia er ordaifer la zona da construcziun – nagina procedura EOZ per implants d'energia d'enviern.
  3. Il chantun na sustegna nagins implants solars u eroelectrics ch'engrevgeschan supplementarmain las raits d'electricitad e che reduceschan la segirezza energetica.

Cuira, ils 8 da december 2021

Gort, Favre Accola, Della Cà, Brandenburger, Grass, Hefti, Hug, Koch, Salis, Renkel, Stocker

Resposta da la regenza

La segirezza dal provediment d'electricitad è essenziala. Ina stgarsezza d'electricitad ha consequenzas gravantas e sto vegnir impedida cun emprima prioritad. Il privel d'ina stgarsezza d'electricitad exista cunzunt durant il mez onn d'enviern, nua che la Svizra è gia oz dependenta d'imports. En cas d'ina gronda stgarsezza d'electricitad sto l'Associaziun da las interpresas electricas svizras (AES) prender las mesiras preparatoricas necessarias en ils secturs producziun, acquisiziun, transport, distri­buziun e consum d'electricitad (art. 1 da l'Ordinaziun davart l'organisaziun dal sectur da l'economia d'electricitad per garantir il provediment economic dal pajais [OESE; CS 531.35]). Per quest intent collavura la AES cun l'Uffizi federal d'energia (UFE), cun la Cumissiun federala per l'electricitad (ElCom), cun la societad naziunala da raits d'electricitad Swissgrid, cun l'armada, cun la protecziun da la populaziun e cun ils chantuns.

Tar il punct 1 a: Davart l'augment dal consum d'electricitad fin l'onn 2050 existan studis da la Confederaziun. Tenor las Perspectivas energeticas 2050+ importa il consum d'electricitad actual da l'entira Svizra circa 60 TWh. Fin l'onn 2050 partan ellas d'in augment da stgars 14 TWh tar l'electromobilitad e da 2 TWh tar ils stgauda­ments. Per il Grischun correspunda quai ad in augment da var 0,4 TWh resp. da var 20 pertschient l'onn 2050.

Tar il punct 1 b: En il Plan d'acziun Green Deal (AGD) èsi tranter auter previs da promover pli fitg mesiras da l'effizienza energetica en il sectur dals edifizis sco er da substituir ils purtaders d'energia fossils. Mesiras da l'effizienza energetica reduce­schan il basegn d'energia e d'electricitad cunzunt durant il mez onn critic d'enviern. Il niz da la substituziun da stgaudaments convenziunals tras apparats pli effizients, sco per exempel pumpas a chalur, vegn percunter annullà tras il basegn d'electricitad pli grond. Uschia ha il AGD mo ina influenza indirecta sin la segirezza dal provedi­ment.

Tar ils puncts 1 c e d: Las cundiziuns generalas per producir electricitad en moda op­timada durant l'enviern vegnan fixadas sin plaun federal. Cun agid da novas mesiras da promoziun vul la Confederaziun cuntanscher la finamira da 2 TWh forza idraulica d'accumulaziun supplementara. Tras la revisiun da la Lescha federala davart il pro­vediment d'electricitad (Lescha davart il provediment d'electricitad, LPrEl; CS 734.7) vegn plinavant definida la finamira d'ina capacitad d'autonomia electrica da 22 dis. Plinavant duai vegnir previsa ina reserva d'accumulaziun per situaziuns extra­ordi­na­rias extremas. Uschia pudessan vegnir superadas periodas cun ina situaziun da pro­vediment critica. Il chantun da sia vart vegn a s'engaschar sin plaun federal cunzunt per garantir l'existenza da las ovras idraulicas en il rom da l'utilisaziun actuala. Sup­plementarmain a la promoziun federala promova il chantun ultra da quai gia implants solars ch'èn optimads per producir electricitad durant l'enviern (art. 23a da la Lescha d'energia dal chantun Grischun [LEG; DG 820.200]). En il plan directiv d'energia vegn il chantun a metter ina gronda prioritad sin la finamira d'arcunar electricitad durant l'enviern. Las cundiziuns generalas èn pia gia avant maun u èn en plani­sa­ziun.

Tar il punct 2: Il rom giuridic per implants solars che na dovran nagina permissiun è fixà en l'art. 18a al. 1 da la Lescha federala davart la planisaziun dal territori (Lescha davart la planisaziun dal territori, LPT; CS 700). La libertad concepziunala dal chan­tun per implants solars che na dovran nagina permissiun e che vegnan montads sin fatschadas è gia exaurida (cf. art. 40 al. 1 cifra 16 da l'Ordinaziun davart la pla­ni­sa­ziun dal territori per il chantun Grischun [OPTGR; DG 801.110]).

Tar il punct 3: La promoziun da la producziun d'electricitad cun implants solars ed eroelectrics è reglada sin plaun federal (art. 19 ed art. 24 s. da la Lescha d'energia [LEn; CS 730.0]). Qua mussa il svilup en la direcziun che l'electricitad vegn promo­vi­da cun prioritad, sch'ella serva a la rait. Cun excepziun da l'art. 23a LEG na promova il chantun finanzialmain ni implants solars ni implants eroelectrics.

Sa basond sin questas explicaziuns propona la Regenza al Cussegl grond da refusar questa incumbensa.

24 da favrer 2022