Navigation

Inhaltsbereich

Dumonda Rettich concernent in local per consumar drogas

Sessiun: 08.12.2021

Dapi onns è la creaziun d'in local per consumar drogas cun in post da contact e da consultaziun in basegn da las persunas a l'ur da la societad sco er da las persunas spezialisadas en noss chantun. Il Cussegl grond ha medemamain surdà ils 30 d'avust 2019 a la Regenza grischuna ina incumbensa correspundenta cun 99 cunter 0 vuschs. Fin ussa na vegn questa mesira dentant betg persequitada vinavant da vart dal departament d'economia responsabel. E quai schebain che la stabilisaziun d'in local per consumar drogas è resortida dals scleriments dal chantun sco recumandaziun d'agir.

L'urgenza vegn betg sco ultim cumprovada tras il fatg ch'il Cussegl communal da Cuira ha surdà ils 18 da november 2021 unanimamain ina incumbensa parlamentara al Cussegl da la citad cun la supplica d'examinar da stgaffir in local per consumar drogas ed ulteriuras mesiras, er sche quai sa chatta en la cumpetenza dal chantun. Gist la citad da Cuira patescha spezialmain dal svilup da la scena da drogas pervia da sia funcziun da center. Il commerzi ed il consum sa concentreschan en la chapitala, er sche bleras persunas participadas e pertutgadas derivan da vitgs e da valladas dal chantun e da la Val dal Rain. La problematica è s'engrevgiada ils ultims onns. La prostituziun d'acquisiziun e dapli persunas giuvnas grevamain dependentas èn oz la dira realitad. Che la citad da Cuira fa ussa frunt activamain a quest problem, è in impurtant pass. Tuttina fiss quai l'incumbensa dal chantun. Il chantun ha planisà e per part gia realisà pass impurtants cun la midada da la chasa da l'Uniun per l'agid da survivenza en infrastructuras pli centralas sco er cun la surpigliada dal streetwork. Ma tenor l'avis da las persunas spezialisadas na tanschan quels pass betg per survegnir sut controlla sveltamain il problem.

Per tut las persunas spezialisadas èsi cler che mesiras per franar la scena da drogas èn oravant tut alura efficazias, sch'ellas èn accordadas ina cun l'autra uschè bain sco pussaivel. Quai vala en spezial per il post da contact e da consultaziun, per il streetwork e per in local accumpagnà per consumar drogas (cun drug checking e cun commerzi pitschen al lieu). Las sutsegnadras ed ils sutsegnaders tschentan las suandantas dumondas a la Regenza:

  1. Tge mesiras ha il chantun planisà concretamain e co guarda ora l'urari da las mesiras planisadas dal chantun?
  2. Co funcziuna la coordinaziun da las differentas mesiras da chantun e da la citad? Ston ins far quint che las duas parts collavurian stretgamain e coordineschian lur mesiras ina cun l'autra, sche per exempel il chantun maina il post da contact e da consultaziun sco er il streetwork e la citad vul avrir in local per consumar drogas en il senn d'ina prestaziun preliminara?
  3. Sustegna il chantun la citad da Cuira, sche quella planisescha per exempel in local accumpagnà per consumar drogas cun drug checking e sch'ella vul permetter il commerzi pitschen en quest local?
  4. Gida il chantun las acturas ed ils acturs participads (posts spezialisads e citad) tar la tschertga d'immobiglias adattadas per in local accumpagnà per consumar drogas cun in post da contact e da consultaziun?

Cuira, ils 8 da december 2021

Rettich, Rutishauser, Pajic, Atanes, Baselgia-Brunner, Brandenburger, Cahenzli-Philipp, Caviezel (Cuira), Degiacomi, Gartmann-Albin, Hofmann, Hohl, Holzinger-Loretz, Horrer, Marti, Niggli-Mathis (Grüsch), Perl, Preisig, Thomann-Frank, Wilhelm, Conrad-Roner, Fetz, Spadarotto, Stocker, Tomaschett (Cuira)

Resposta da la regenza

En la sessiun d'avust 2019 ha il Cussegl grond acceptà l'incumbensa concernent posts da contact e da consultaziun per persunas dependentas da drogas en il senn da la proposta da midada da la Regenza cun 99 cunter 0 vuschs. Quella sa clamava: «Integrond ils acturs relevants e las persunas decisivas (…) elavura la Regenza en­taifer ils proxims 12 mais in rapport davart la situaziun vertenta e davart il basegn d'agir pussaivel cun recumandaziun e cun lur custs.»

Per incumbensa da la Regenza ha Infodrog retschertgà tranter il november 2019 ed il matg 2020 la situaziun ed il basegn en il sectur da l'agid per persunas dependentas en il chantun Grischun. Tras la realisaziun dal rapport per la fin da zercladur 2020 ha la Regenza ademplì en furma modifitgada l'incumbensa acceptada dal Cussegl grond. Il rapport formulescha set recumandaziuns d'agir al chantun Grischun ch'èn en lur totalitad fitg cumplessivas. Areguard l'urgenza politica ha la Regenza anticipà las recumandaziuns d'Infodrog per stgaffir ina purschida da la lavur sociala extra muros (streetwork) e per stgaffir in post da contact e da consultaziun cun in local per consumar drogas ed ha controllà la purschida correspundenta per persunas pertu­tga­das da dependenza en il chantun cun sustegn extern, ha discutà tala cun persu­nas spezialisadas ed ha elavurà propostas da soluziun. Ultra dal basegn èn er ve­gnids giuditgads ils custs stimads sco er la realisabladad da las mesiras. Il rapport dal lavuratori da management da Dieter P. Wirth mussa latiers differentas variantas da proceder cun stimaziun dals custs.

Il zercladur 2021 ha la Regenza concludì la varianta «meglieraziun successiva». En la sessiun da december 2021 ha il Cussegl grond approvà ils meds finanzials previs per quest intent en la dimensiun da 400 000 francs per l'onn 2022 sco er da 500 000 fin 600 000 francs per ils onns dal plan da finanzas 2023 fin 2025 ed ha confermà il proceder preschentà da la Regenza.

Tar la dumonda 1: La meglieraziun successiva da las purschidas simplas prevesa la cuntinuaziun da la lavur sociala extra muros (streetwork), la constituziun d'in nov post da contact e da consultaziun pli grond en in lieu central sco er la meglieraziun da las purschidas d'abitar cun accumpagnament. Sco emprim pass ha la Regenza approvà il schaner 2022 l'incarica da prestaziun «Streetwork Cuira» per ils onns 2022 fin 2025 a l'Uniun per l'agid da survivenza dal Grischun e cun quai garantì la cuntinuaziun da la lavur sociala extra muros. Las ulteriuras mesiras vegnan concepidas e realisadas – communablamain cun l'Uniun per l'agid da survivenza dal Grischun sco purtadra da las purschidas – en il decurs dals onns 2022 e 2023. Nua che quai è necessari, ve­gnan integradas ulteriuras organisaziuns.

Tar la dumonda 2: La Regenza ha incumbensà l'Uffizi dal servetsch social cun la coordinaziun da la realisaziun da las mesiras concludidas. La coordinaziun vegn fatga cun tut ils acturs relevants, en spezial cun l'Uniun per l'agid da survivenza dal Grischun, ma er cun la citad da Cuira. Il chantun, la citad e l'Uniun per l'agid da sur­vivenza dal Grischun planiseschan d'accordar in cun l'auter ils process e las solu­ziuns. Per quest intent èn previsas scuntradas regularas.

Tar la dumonda 3: Sche la citad da Cuira vul realisar in local accumpagnà per con­sumar drogas, ha ella la responsabladad per sclerir las cundiziuns generalas neces­sarias (p.ex. concept, planisaziun, realisaziun, finanziaziun, basa legala).  Il chantun è pront da sustegnair la citad en moda subsidiara. En spezial po el sclerir dumondas giuridicas concretas, sche quellas tutgan tar il champ da cumpetenza da la Polizia chan­tunala, da la Procura publica u d'autras autoritads chantunalas.

Tar la dumonda 4: En connex cun la tschertga d'ina infrastructura adattada per rea­lisar in post da contact e da consultaziun central discurra il chantun regularmain cun l'Uniun per l'agid da survivenza dal Grischun e cun la citad da Cuira. Eventuals po­tenzials da sinergia areguard l'utilisaziun d'ina infrastructura adattada vegnan res­guar­dads en quest connex. 

16 da favrer 2022