Dapi ils 11 d'october 2021 n'èn ils tests da corona da princip betg gratuits. Ils tests da corona vegnan duvrads per survegnir in certificat COVID. Exceptads da questa regulaziun èn persunas sintomaticas (na survegnan nagin certificat), giuvenils sut 16 onns (na dovran nagin certificat) e persunas che na pon betg sa laschar vaccinar.
Questa regulaziun chaschuna actualmain – gist en vista a l'obligaziun da disponer d'in certificat, ch'è vegnida introducida tenor l'uschenumnada regla 3G (geimpft, getestet, genesen – vaccinà, testà, guarì) – dischavantatgs per persunas betg vaccinadas, sco en spezial persunas giuvnas creschidas che n'èn anc adina strusch periclitadas, ma ch'eran e ch'èn tuttina pertutgadas fermamain da las mesiras. Cun stuair pajar ils tests vegnan ellas intimadas da sa laschar vaccinar. Ma questa decisiun persunala na duess betg vegnir prendida per motivs finanzials, perquai che las persunas giuvnas creschidas en scolaziun na pon e na vulan strusch pajar tests per sa participar a la vita publica.
Uschè ditg che l'obligaziun da disponer d'in certificat vegn applitgada tenor la regla 3G, duai il maun public pussibilitar tant il vaccinar sco er il testar en moda gratuita. Gist per persunas giuvnas – che na sa participeschan betg als tests en ils manaschis u che n'èn betg gia vaccinadas – fiss quai ina tscherta normalisaziun. Ellas avessan lura puspè la pussaivladad da sa laschar testar gratuitamain per pudair profitar da las purschidas, per las qualas vala in'obligaziun da disponer d'in certificat.
En vista a quests fatgs supplitgescha il Cussegl grond la Regenza:
- Ils tests che n'èn actualmain betg gratuits per survegnir in certificat COVID ston vegnir finanziads dal chantun per giuvenils fin 25 onns.
- Questa regulaziun vala fin che l'obligaziun da disponer d'in certificat vegn abolida.
Cuira, ils 19 d'october 2021
Stocker, Favre Accola, Koch, Alig, Brandenburger, Casty, Della Cà, Della Vedova, Felix, Dürler, Giacomelli, Grass, Hefti, Holzinger-Loretz, Hug, Kasper, Natter, Pfäffli, Ruckstuhl, Salis, Weber, Widmer (Favugn), Adank-Arioli, Hunger, Nespolo, Renkel