Perquai ch'il traffic è s'augmentà fermamain ils ultims onns durant ils temps da gronda frequenza pervia dal traffic turistic, arriva l'autostrada A13 regularmain al cunfin da sias capacitads. Colonnas e temps da spetga pli lungs sin l'autostrada èn las consequenzas. Parallelamain a l'autostrada A13 passa la via principala da Maiavilla sur Landquart e Zizers fin Cuira sco er en direcziun da Domat e Razén fin Tusaun. Oravant tut en cas da colonnas sin l'autostrada vegn questa via duvrada sco ruta da guntgida. En blers vitgs maina la via principala amez tras il center. Pervia dals abitadis spess e pervia da las vias stretgas n'è quel betg concepì per talas quantitads da traffic. Il volumen da traffic è memia grond. Durant ils temps da gronda frequenza resultan perquai perditas da la capacitad sco er deficits da segirezza. Ils deficits da segirezza sin las vias chantunalas, ma cunzunt er sin las vias da quartier vischinas èn insupportabels. L'onn 2022 ha pir gist cumenzà, ma gia durant pliras fins d'emna è il traffic da guntgida stà bloccà en blers vitgs, tant sin las vias chantunalas sco er sin las vias communalas.
A la dumonda Hefti durant l'ura da dumondas da la sessiun d'avust 2021, sche mesiras sveltas sajan pussaivlas, ha la Regenza respundì ch'i duai vegnir endrizzà fin l'onn 2025/26 in sistem per armonisar la sveltezza. Quai po esser ina moda e maniera per meglierar la situaziun. I n'è dentant betg la soluziun definitiva ed i dura memia ditg. Dacurt èn s'unidas diversas regiuns per far ulteriur squitsch sin il chantun sco er sin l'Uffizi federal da vias UVIAS. Ina scuntrada cuminaivla ha lieu ils 29 da mars 2022. Quest proceder vegn beneventà cleramain. La remartga dal cusseglier guvernativ Peyer a chaschun da la debatta dal program annual 2022 durant l'ultima sessiun da december, ch'ins na dastgia betg spetgar memia bler da questa scuntrada, mussa – ord vista da las incumbensadras e dals incumbensaders – che la Regenza na dat er vinavant betg in'attenziun adequata al problem.
Perquai vegn la Regenza incumbensada:
- d'elavurar in management cumplessiv dal traffic e da las colonnas per soluziuns regiunalas e surregiunalas;
- da preschentar singulas mesiras (tecnicas ed organisatoricas, temporaras u installadas fixamain) per singulas regiuns e vischnancas cun l'intent d'impedir il traffic da guntgida sin las vias chantunalas sco er sin las vias communalas;
- da mussar, tge meds auxiliars legals che stattan a disposiziun a las singulas vischnancas per impedir il traffic da guntgida;
- da preschentar in proceder nunbirocratic e facil areguard las permissiuns per mesiras che ston vegnir permessas da l'Uffizi da construcziun bassa u da la Polizia chantunala;
- da surpigliar tant pli svelt la direcziun da la schliaziun da la problematica tranter las regiuns, las vischnancas ed il UVIAS, per impedir il traffic da guntgida;
- da procurar che quests giavischs vegnian elavurads cun gronda prioritad e ch'i vegnian preschentadas soluziuns per la realisaziun.
Cuira, ils 16 da favrer 2022
Hefti, Loepfe, Hardegger, Berther, Berweger, Bettinaglio, Brandenburger, Brunold, Buchli-Mannhart, Cahenzli-Philipp, Caluori, Casty, Clalüna, Crameri, Danuser, Della Cà, Della Vedova, Dürler, Ellemunter, Engler, Fasani, Favre Accola, Florin-Caluori, Gort, Grass, Hohl, Hug, Jochum, Koch, Kohler, Kunfermann, Kunz (Fläsch), Lamprecht, Loi, Maissen, Michael (Donat), Müller (Susch), Niggli (Samedan), Niggli-Mathis (Grüsch), Papa, Ruckstuhl, Salis, Sax, Tanner, Ulber, Weber, Wellig, Widmer (Favugn), Widmer-Spreiter (Cuira), Wieland, Zanetti (Landquart), Bürgi-Büchel, Gujan-Dönier