Navigation

Inhaltsbereich

Sessiun: 16.02.2022

Las emnas passadas èsi vegnì public (tranter auter tras in schurnalist grischun dal format srf.rec) che uschenumnadas mesiras da conversiun vegnian realisadas en differentas baselgias independentas en Svizra ed en l'exteriur vischin da spirituals, da psicoterapeutas e psicoterapeuts, da medias e medis u da coaches. Questas mesiras han la finamira da transferir la disposiziun omosexuala d'in uman en ina disposiziun eterosexuala. La basa per questas mesiras è che l'omosexualitad vegn considerada en las cuminanzas correspundentas sco «malsogna» e «sintom» che chaschuna suffrientschas e che n'è betg giavischabel. Per part vegni schizunt ditg che l'omosexualitad saja «cunter la voluntad da Dieu» ed uschia «in putgà». Per quest motiv duain «persunas pertutgadas» far ina terapia tras ina «cussegliaziun sexuala» en uschenumnads tractaments reparativs.

I sa chapescha da sez ch'ina tala interpretaziun da tschertas preferenzas sexualas n'ha insumma nagina basa medicinala e scientifica e cuntegna ultra da quai in aut potenzial da discriminaziun e d'omofobia che expona las persunas pertutgadas ad in'auta pressiun sociala e psichica. En noss pajais vischin Germania è vegnì decretà gia l'onn 2019 in scumond da terapias da conversiun per persunas minorennas. Er auters chantuns en Svizra enconuschan questa debatta, uschia è ina moziun correspundenta vegnida surdada a la Regenza a Basilea l'onn 2021.

Jau supplitgesch perquai la Regenza da respunder las suandantas dumondas:

  1. Ha la Regenza enconuschientscha da mesiras da cas da conversiun en il chantun Grischun?
  2. Tge basas legalas datti areguard l'execuziun da tals «tractaments» e tge basas legalas datti per lur scumond?
  3. Tge tenuta ha la Regenza envers la tematica da las mesiras da conversiun (en spezial areguard il project lètg per tuts ch'è vegnì acceptà l'onn 2021)? È la Regenza pronta da far adattaziuns da la lescha per scumandar talas mesiras u da s'engaschar a Berna per ina midada da la lescha?

Cuira, ils 16 da favrer 2022

Pajic, Widmer (Favugn), Bigliel, Atanes, Baselgia-Brunner, Cahenzli-Philipp, Cantieni, Caviezel (Cuira), Degiacomi, Gartmann-Albin, Hofmann, Horrer, Niggli-Mathis (Grüsch), Perl, Preisig, Rettich, Rutishauser, von Ballmoos, Wilhelm, Spadarotto, Tomaschett (Cuira)

 

Resposta da la regenza

Confurm a l'art. 3 da la Lescha davart la protecziun da la sanadad en il chantun Gri­schun (Lescha da sanadad; DG 500.000) ston la visita medicinala ed il tractament da pazientas e pazients sa drizzar tenor ils princips renconuschids da la scienza, da l'etica, da la rentabilitad e dal tractament egual.

Tar la dumonda 1: La Regenza n'enconuscha fin ussa ni cas concrets dal chantun Grischun, nua ch'i èn vegnidas realisadas mesiras da conversiun, ni organisaziuns grischunas che porschan talas mesiras. Durant ils ultims onns n'èn er betg vegnids inoltrads recurs respectivs.

Tar la dumonda 2: Ina basa legala specifica che regla l'execuziun da mesiras da con­versiun na datti betg. Dentant èn las persunas che pratitgeschan ina professiun dal sectur da sanadad e che dovran per quai ina permissiun, suttamessas a las dispo­siziuns menziunadas qua survart. En la Lescha federala davart las professiuns me­dicalas universitaras (Lescha davart las professiuns medicalas, LPMed; CS 811.11), en la Lescha federala davart las professiuns psicologicas (Lescha davart las profes­siuns psicologicas, LPsi; CS 935.81) ed en la Lescha federala davart las professiuns da sanadad (Lescha davart las professiuns da sanadad, LPSan; CS 811.21) èn er statuidas las obligaziuns professiunalas da las professiuns ch'èn normadas en questas leschas. Per cuntravenziuns cunter las obligaziuns professiunalas cunte­gnan las leschas federalas menziunadas mesiras disciplinaras correspundentas che pon chaschunar la finala la retratga da la permissiun per pratitgar la professiun. Questas regulaziuns dal dretg federal èn definitivas, q.v.d. il chantun na po betg statuir ulteriuras obligaziuns professiunalas. Sch'ina persuna che pratitgescha ina professiun che dovra ina permissiun, exequescha ina mesira da conversiun, cuntrafa ella tant a las disposiziuns federalas sco er chantunalas da la polizia da sanadad. L'autoritad da surveglianza da la polizia da sanadad ch'è cumpetenta en il chantun è l'Uffizi da sanadad.

Las persunas che pratitgeschan in'activitad che n'è betg suttamessa a la surveglian­za da la polizia da sanadad, na pon betg vegnir chastiadas da l'Uffizi da sanadad. Tut tenor las circumstanzas concretas pon dentant singulas acziuns entaifer ina me­sira da conversiun esser acts chastiabels en il senn dal Cudesch penal, en spezial, sch'ellas pericliteschan l'integritad corporala, la facultad u er la libertad persunala da las persunas pertutgadas.

Tar la dumonda 3: Il Cussegl federal ha exprimì sia opiniun gia l'onn 2019, pia avant ch'il project da la lètg per tuts è vegnì acceptà l'onn 2021. La Regenza è dal medem avis sco il Cussegl federal, che tut las mesiras da conversiun che han la finamira da midar l'orientaziun omosexuala, ston vegnir refusadas ord vista umana, professiunala e giuridica. L'omosexualitad n'è betg ina malsogna e na sto perquai betg vegnir trac­tada. Suttametter umans ed en spezial persunas minorennas ad in tal tractament, n'è betg mo ina discriminaziun, mabain po avair disturbis psichics gravants per las persunas pertutgadas. En blers chantuns sco Turitg, Genevra, Basilea-Citad, Basilea-Champagna, Soloturn, Sviz e Vad èn vegnidas inoltradas l'ultim temp inter­venziuns parlamentaras per scumandar mesiras da conversiun. Sin plaun federal èn vegnids inoltrads l'atun 2021 trais iniziativas parlamentaras per scumandar e per chastiar mesiras da conversiun sco er in postulat per examinar la derasaziun da mesiras da conversiun en Svizra e la necessitad d'ina regulaziun legala. La Regenza vegn a persequitar attentamain ils resultats da las intervenziuns naziunalas e chan­tunalas. Per il mument n'èn inditgadas naginas ulteriuras mesiras. La Regenza appellescha a la populaziun da denunziar praticas che van en questa direcziun a las autoritads cumpetentas.

6 d'avrigl 2022