Navigation

Inhaltsbereich

Dumonda Ruckstuhl concernent la spitex d'uffants

Sessiun: 16.02.2022

Uffants che dovran tgira speziala signifitgan grondas sfidas fisicas e psichicas per ils geniturs, per ils fragliuns e per lur ambient social. Sche la qualitad da viver vegn meglierada, perquai che la tgira ambulanta sustegna poppins, uffants e giuvenils, po l'uffant crescher si en la famiglia, quai che ha effects positivs per ses process da guariziun e da svilup. La spitex d'uffants furnescha questa prestaziun per famiglias cun uffants che dovran tgira a chasa. Ils custs da tgira resultants vegnan per part quintads giu sur l'assicuranza sociala, sur la cassa da malsauns u sur l'assicuranza d'invaliditad. Perquai che las tariffas per la spitex d'uffants na cuvran betg ils custs, ston la spitex d'uffants u las famiglias pertutgadas surpigliar ils custs betg cuvrids.

La topografia dal chantun Grischun è in factur engrevgiant supplementar per insumma pudair furnir las prestaziuns. Vitiers vegn che tgirunzas e tgirunzs professiunals na stattan strusch a disposiziun. A geniturs che vulan tgirar lur uffant a chasa na resta savens nagut auter che dad ir a star en ina regiun pli urbana.

Las sutsegnadras ed ils sutsegnaders dumondan perquai la Regenza:

  1. Co valitescha il chantun Grischun il provediment da la sanadad ambulant per uffants e per giuvenils che dovran ina tgira pli intensiva a chasa?
  2. Co è la collavuraziun cun la spitex d'uffants da la Svizra orientala?
  3. Datti ina collavuraziun tranter las organisaziuns existentas da la spitex per persunas creschidas e las organisaziuns da la spitex d'uffants?
  4. Exista in contract da prestaziun resp. ina cunvegna da prestaziun cun organisaziuns ch'èn activas en la spitex d'uffants?
  5. Sche na: Fiss il chantun Grischun pront da far in contract da prestaziun resp. ina cunvegna da prestaziun cun organisaziuns ch'èn activas en la tgira ambulanta d'uffants e da giuvenils?

Cuira, ils 16 da favrer 2022

Ruckstuhl, Thomann-Frank, Holzinger-Loretz, Atanes, Baselgia-Brunner, Berther, Bettinaglio, Brandenburger, Buchli-Mannhart, Cahenzli-Philipp, Cantieni, Casutt-Derungs, Caviezel (Cuira), Crameri, Danuser, Degiacomi, Deplazes (Rabius), Derungs, Ellemunter, Florin-Caluori, Hardegger, Hartmann-Conrad, Kasper, Kohler, Kunfermann, Loepfe, Maissen, Märchy-Caduff, Michael (Donat), Niggli-Mathis (Grüsch), Noi-Togni, Preisig, Rettich, Rutishauser, Schmid, Tanner, Ulber, Widmer (Favugn), Widmer-Spreiter (Cuira), Zanetti (Landquart), Bürgi-Büchel, Gujan-Dönier, Pajic, Spadarotto, Tomaschett (Cuira)

Resposta da la regenza

En il chantun Grischun han actualmain trais organisaziuns da la spitex d'uffants ina permissiun da manaschi, numnadamain la Spitex d'uffants Svizra Orientala (secziun da la Spitex d'uffants Svizra), Horn, la fundaziun Kifa Svizra, Zofingen, e la fundaziun Joël Spitex d'uffants, Aarau. Tenor las infurmaziuns dals servetschs da la spitex d'uf­fants vegnan ils uffants ed ils giuvenils attribuids per il solit tras ils ospitals d'uffants da Turitg e da Son Gagl. Cunzunt uffants novnaschids, poppins u uffants pitschens ch'èn vegnids tractads en quests ospitals pervia d'ina greva malsogna. Ils trais ser­vetschs da la spitex d'uffants èn activs en tut il chantun, danor en l'Engiadina ed en las Vals dal sid. Per tgirar in uffant grevamain malsaun ha la Spitex ACAM (Asso­cia­zione per la cura e l'assistenza a domicilio nel Moesano), Cama, fatg ina cunvegna da collavuraziun cun il GIIPSI (Gruppo Interegionale Infermiere Pediatriche della Svizzera Italiana), Bellinzona. Il GIIPSI è medemamain ina secziun da la Spitex d'uffants Svizra. En il Grischun han tut ils servetschs da la spitex d'uffants in tschert dumber da collavuraturas e collavuraturs permanents che stattan a disposiziun sin dumonda. Il team da tgira vegn per regla furmà suenter il scleriment dal basegn, respectivamain i vegnan tschertgadas ulteriuras tgirunzas e tgirunzs diplomads. La tschertga è difficila, perquai ch'i dat en il chantun Grischun bler main tgirunzas e tgirunzs cun l'accent da scolaziun «uffant» (pli baud tgirunzas e tgirunzs d'uffants) che tgirunzas e tgirunzs per la tgira somatica da persunas creschidas.

Tar la dumonda 1: Tenor l'Ordinaziun tar la Lescha per promover la tgira da per­su­nas malsaunas e l'assistenza da persunas attempadas e da persunas che basegnan tgira (Ordinaziun tar la Lescha per promover la tgira da persunas malsaunas, OLTM [DG 506.060]) han persunas malsaunas, disgraziadas, reconvalescentas, impedidas, attempadas e muribundas il dretg da survegnir prestaziuns d'in servetsch da la tgira ed assistenza a chasa (spitex), e quai independentamain da la vegliadetgna. Ils uf­fants e giuvenils vegnan tgirads ed assistids dals servetschs da spitex che han ina incarica da prestaziun communala, sch'els n'han betg in basegn da tgira e da trac­tament spezialisà. Sch'il basegn da tgira e da tractament spezialisà è dà, vegnan ils uffants e giuvenils en il Grischun tgirads ed assistids da servetschs spezialisads da la spitex d'uffants. A l'Uffizi da sanadad èn enconuschentas singulas situaziuns, nua che la tgira intensiva a chasa n'ha betg pudì vegnir garantida per mancanza da persunal spezialisà.

Tar la dumonda 2: La Spitex d'uffants Svizra Orientala, Horn, è activa dapi intgins onns en il chantun Grischun. Sia permissiun da manaschi è vegnida prolungada l'ultima giada ils 16 da december 2019 per ulteriurs 4 onns. La collavuraziun cun l'Uffizi da sanadad sa restrenscha a dumondas administrativas.

Tar la dumonda 3: Sco gia menziunà vegn la gronda part dals uffants attribuida tras ils ospitals d'uffants directamain a la spitex d'uffants. Ina collavuraziun directa en la tgira tranter la spitex cun ina incarica da prestaziun communala ed ina spitex d'uffants è fitg rara. Per distgargiar ils geniturs po la spitex cun ina incarica da prestaziun com­munala vegnir dumandada per prestaziuns da tegnairchasa e d'assistenza, p.ex. a favur d'ulteriurs uffants. Tenor la valitaziun dal post spezialisà è quai darar il cas.

Tar la dumonda 4: Cun ils servetschs da la spitex d'uffants ch'èn activs en il chantun Grischun n'existan naginas cunvegnas da prestaziun. Els disponan tuts d'ina permis­siun da manaschi en il chantun Grischun ed han – tenor las reglas da la finanziaziun da la tgira – il dretg da contribuziuns da prestaziun dal chantun e da la vischnanca da domicil da las clientas e dals clients. Las prestaziuns da tgira dals servetschs da la spitex d'uffants vegnan finanziadas tras contribuziuns da prestaziun dal chantun e da la vischnanca da domicil, analogamain als servetschs cun ina incarica da prestaziun communala.

Tar la dumonda 5: Sin basa da las explicaziuns na vesa il chantun nagin basegn da far incaricas da prestaziun cun organisaziuns da la tgira ambulanta d'uffants e da giuvenils. 

8 d'avrigl 2022