Navigation

Inhaltsbereich

Sessiun: 16.02.2022

En cas d'ina decisiun negativa en ina dumonda d'asil ston ils pertutgads partir da la Svizra, premess che las autoritads constateschan ch'igl è pussaivel da returnar e ch'il return è supportabel. Fin tar la partenza vegnan las persunas per regla alloschadas en centers da return chantunals, respectivamain en il Grischun en il center da partenza Flüeli.

En in rapport da la Cumissiun naziunala per la prevenziun da la tortura (CNPT) concernent ils centers da return en il chantun Berna pon ins leger, che la cumissiun è preoccupada e ch'ella pretenda meglieraziuns en ils centers pertutgant las cundiziuns da viver d'uffants e da lur famiglias. Tenor il giudicament da la cumissiun n'èn las relaziuns betg cumpatiblas cun la Convenziun davart ils dretgs da l'uffant da la ONU. Concretamain violeschia l'alloschament en il chantun Berna il dretg dals uffants da cundiziuns da viver adequatas ed il dretg da ruaus e da temp liber sco er da giugar. L'assistenza e l'alloschament en centers èn però er gia vegnids tematisads en auters chantuns, en spezial er l'alloschament da dunnas sulettas u en connex cun stabiliments che n'èn betg separads tenor la schlattaina.

Per quest motiv fan las sutsegnadras ed ils sutsegnaders la suandanta dumonda a la Regenza:

Co sa preschenta la situaziun en il center da partenza en noss chantun areguard il rapport da la CNPT ed èn eventualmain planisadas mesiras, er en auters centers?

Cuira, ils 16 da favrer 2022

Gartmann-Albin, Horrer, Tomaschett (Cuira), Atanes, Baselgia-Brunner, Cahenzli-Philipp, Cantieni, Caviezel (Cuira), Degiacomi, Della Vedova, Hofmann, Müller (Favugn), Noi-Togni, Perl, Preisig, Rettich, Rutishauser, von Ballmoos, Pajic, Spadarotto

Resposta da la regenza

Tenor la strategia da la Regenza per l'alloschament e l'assistenza da persunas en il sectur d'asil vegnan las requirentas ed ils requirents d'asil refusads cun vigur legala – che na bandunan betg da libra voluntad la Svizra, che na pon er betg vegnir repatriads sfurzadamain e che dumondan per agid d'urgenza – per regla alloschads en il center da partenza Flüeli a Valzeina (vischnanca da Grüsch). A las persunas pertutgadas stat a disposiziun la cussegliaziun per il return da l'Uffizi da migraziun e da dretg civil (UMDC) che discutescha regularmain la situaziun cun las persunas ch'èn obligadas da bandunar la Svizra e che sustegna las persunas ch'èn prontas da bandunar la Svizra en reguard organisatoric e finanzial. Las famiglias cun uffants che n'èn betg obligads d'ir a scola vegnan per regla medemamain alloschads en il center da partenza Flüeli a Valzeina. Quai vegn dentant avant mo darar e pertutga mo paucs uffants.

Dapi ch'il center da partenza è vegnì mess en funcziun, investescha il chantun reptidamain en l'immobiglia in pau pli veglia. Cun questas investiziuns vegn meglierada l'infrastructura e garantida la segirezza. Dals basegns dals uffants vegni adina tegnì quint commensuradamain. Famiglias resp. geniturs cun uffants obligads d'ir a scola vegnan alloschads en las instituziuns collectivas cun structuras da scola correspundentas (actualmain en las scolas dals centers a Tavau Laret ed a Trimmis). Er en questas instituziuns vegni tegnì quint commensuradamain dals basegns dals uffants. Il mument vegnan fatgas las lavurs da preparaziun per ina lavur da perscrutaziun che la Cumissiun federala da migraziun (CFM) ha surdà a l'Institut Marie Meierhofer per l'uffant da l'Universitad da Turitg. Ina finamira principala dal project da perscrutaziun è d'obtegnair ina survista ed analisa da la situaziun dals uffants e dals giuvenils en l'agid d'urgenza. In'ulteriura dumonda impurtanta per il project da perscrutaziun èsi, co che las structuras da l'agid d'urgenza pon vegnir descrittas, en las qualas uffants minorens e giuvenils èn alloschads, e tge tratgs cuminaivels e tge differenzas che sa mussan sin plaun chantunal, regiunal e dal territori linguistic. Ultra da quai èsi er d'interess, co ch'ils uffants ed ils giuvenils vivan e co ch'els concepeschan lur mintgadi. Actualmain n'èn planisadas mesiras concretas ni en il center da partenza ni en auters centers dal chantun. Il UMDC examinescha dentant regularmain ed er actualmain la situaziun (guardar er dumonda Müller (Favugn) concernent l'agid d'urgenza en il sectur d'asil dal Grischun). En cas da basegn vegn l'uffizi ad instradar mesiras da manaschi u da construcziun.

28 d'avrigl 2022