La realisaziun da la transfurmaziun digitala en l'administraziun chantunala sa basa principalmain sin la Strategia d'informatica da l'onn 2015 e sin la Strategia dad e-government 2019–2023 da l'onn 2018. Per realisar la Strategia dad e-government dal Grischun en l'administraziun chantunala è responsabel il «Post spezialisà per il e-government». Quest post è domicilià tar la Chanzlia chantunala e fa part là dal sectur «Sustegn da la direcziun».
En il preventiv 2020 ha il Cussegl grond deliberà in credit d'impegn da 9 miu. francs per pudair realisar la Strategia dad e-government durant ils onns 2020 fin 2023. En il center da l'adempliment da las finamiras stattan dapi lura – tenor il program annual – cunzunt la realisaziun da prestaziuns digitalas priorisadas per la populaziun e per l'economia (l'onn 2022 ils projects «Barat da datas cun schefexpertas e schefexperts» ed «eDecleraziunGR – taglia a la funtauna»), la midada da cultura ed il svilup specific da l'administraziun chantunala tar la digitalisaziun sco er la creaziun da las basas tecnicas per il e-government.
Ord vista da las sutsegnadras e dals sutsegnaders è anc avant maun in potenzial da svilup considerabel tar il tempo da la realisaziun e cunzunt tar l'ulteriur svilup cumplessiv da la transfurmaziun digitala entaifer l'administraziun chantunala. Il document da la Strategia dad e-government da l'onn 2018 na para – ord vista actuala – ni fitg modern ni detaglià avunda. Cumbain ch'il document vegn adina puspè designà sco «Strategia dad e-government 2019–2023», mussa gia il suttitel («Sectur transacziuns») ch'i sa tracta mo d'ina strategia parziala. Differents secturs – sco l'introducziun d'in management da process (digitals), in'eventuala applicaziun d'intelligenza artifiziala en l'administraziun u las pretensiuns da la Strategia dad e-government envers la Strategia dad ICT dal chantun – vegnan menziunads mo a l'ur u n'èn insumma betg cuntegnids en la strategia. Plinavant mancan aspects a vista pli lunga cun ina relevanza per la midada da cultura en l'entira administraziun, sco visiun, missiun u model directiv per la transfurmaziun digitala entaifer l'administraziun.
In grond manco para plinavant la «structura da departaments e da posts da servetsch» ch'è manifestada ed exprimida entaifer l'administraziun chantunala e ch'impedescha – per motivs dal sistem – considerablamain ina midada da cultura necessaria en connex cun la transfurmaziun digitala. La dumonda è, sch'il Post actual spezialisà per il e-government ha avunda cumpetenzas e sch'el è – areguard l'integraziun entaifer l'administraziun – posiziunà er organisatoricamain en il dretg lieu u sch'i duvrass ina reorganisaziun.
A partir da l'onn 2022 duai vegnir elavurada la «Strategia dad e-government 2024–2028». Quella duai vegnir deliberada l'onn 2023.
En vista a la revisiun da la strategia vulessan las sutsegnadras ed ils sutsegnaders dumandar la Regenza, sch'ella è pronta d'accelerar la transfurmaziun digitala en l'administraziun chantunala, tge mesiras ch'ella planisescha per quest intent e sche las cumpetenzas, l'organisaziun e l'integraziun dal Post spezialisà per il e-government en l'administraziun correspundan anc al temp.
Cuira, ils 16 da favrer 2022
Hohl, Koch, Derungs, Berther, Berweger, Bettinaglio, Brandenburger, Caluori, Cantieni, Caviezel (Cuira), Censi, Della Cà, Deplazes (Rabius), Dürler, Engler, Felix, Flütsch, Föhn, Grass, Hardegger, Hartmann-Conrad, Hitz-Rusch, Horrer, Jochum, Kasper, Kienz, Kuoni, Loepfe, Loi, Marti, Michael (Castasegna), Mittner, Natter, Niggli (Samedan), Niggli-Mathis (Grüsch), Papa, Pfäffli, Preisig, Rüegg, Schutz, Stiffler, Tanner, Thomann-Frank, Thür-Suter, von Ballmoos, Waidacher, Weidmann, Wellig, Wieland, Pajic