Navigation

Inhaltsbereich

Incumbensa Florin-Caluori concernent l'incarica da l'Ordinaziun davart la tgira da dents en scola: stritgar «metter a quint a las instituziuns responsablas ils tractaments privats»

Sessiun: 16.02.2022

En la Lescha da scola dal 01-08-2013 ha il Cussegl grond acceptà er l'art. 51, Servetsch medical e dentistic da scola. Uschia èn las instituziuns responsablas per la scola obligadas d'organisar e da realisar las visitas da controlla tar il dentist. Questa incarica è sa cumprovada ed è raschunaivla. Ella funcziuna er fitg bain e vegn realisada en moda cumpetenta.

Ils custs da las controllas dals dents da las scolaras e dals scolars, che las dentistas da scola e ch'ils dentists da scola fan, van a donn e cust da las instituziuns responsablas. Art. 12 da l'Ordinaziun davart la tgira da dents en scola.

Ils custs da tractament van a donn e cust da las persunas cun la pussanza dals geniturs. Art. 13 da l'Ordinaziun davart la tgira da dents en scola.

Questas incumbensas èn cleras. I na dat naginas propostas da midada che s'opponan ad ellas.

Ma quai che fa smirvegliar è il fatg, che las instituziuns responsablas (vischnancas) duain procurar per l'incasso da las parts dals custs da las persunas cun la pussanza dals geniturs (guarda art. 15 da l'Ordinaziun) e ch'ils custs betg incassabels duain ir a donn e cust da las instituziuns responsablas. Las vischnancas ston elavurar l'incasso dals quints privats.

 Art. 15 da l'Ordinaziun davart la tgira da dents en scola, Facturaziun

Las dentistas da scola ed ils dentists da scola mettan a quint separadamain a las instituziuns responsablas las controllas ed ils tractaments, e quai il pli tard per la fin da l'onn da scola. Las instituziuns responsablas procuran per l'incasso da las parts dals custs da las persunas cun la pussanza dals geniturs. Custs betg incassabels van a donn e cust da las instituziuns responsablas.

Quai vul dir: Il dentist metta a quint tractaments privats dals dents a la vischnanca, cumbain che – tenor l'art. 13 da l'Ordinaziun – las persunas cun la pussanza dals geniturs ston surpigliar quests custs. La vischnanca paja il quint. Lura sto la vischnanca facturar vinavant il quint per il tractament dals dents a las persunas cun la pussanza dals geniturs. Las persunas cun la pussanza dals geniturs pajan la finala il quint dal tractament dals dents a la vischnanca. Sch'il quint na vegn betg pajà, vegn introducì il process cun admoniziun e cun scussiun tras la vischnanca – ina procedura, en la quala ils custs ed il retgav na sa pajan betg e da la quala resulta ina birocrazia. Avantatgs han mo ils dentists.

Las famiglias che na pon betg sa prestar il dentist per motivs economics, han oz la pussaivladad d'inoltrar ina dumonda a la vischnanca da surpigliar ina part dals custs u tut ils custs.

Las pazientas ed ils pazients pertutgads da povradad che retiran agid social vegnan per il solit cussegliads d'in servetsch social chantunal u d'in auter post spezialisà e survegnan sustegn per inoltrar ina dumonda a la vischnanca da survegnir prestaziuns finanzialas. Ina surpigliada dals custs dals tractaments dals dents vegn definida en las Directivas da la Conferenza svizra da l'agid social (COSAS) sut punct C.6.5 «Sanadad». Ils custs per ils tractaments dals dents pon vegnir surpigliads, sch'il tractament è necessari e vegn fatg en ina moda e maniera simpla, economica e commensurada.

Cun questa regulaziun èn garantids e reglads ils cas socials.

A noss avis vegnan las administraziuns communalas duvradas en quest senn sco catalisatur per quints privats en ina moda che generescha custs supplementars. Ultra da quai è il tractament dals dents ina chaussa privata.

Resultada è mo ina nova incumbensa supplementara dal chantun a las vischnancas, e quai senza in avantatg supplementar per las persunas cun la pussanza dals geniturs e per las vischnancas. Grazia a l'incarica chantunala als dentists da scola obtegnan ils dentists da scola pia er lur clientella ulteriura e futura. Quai è en lur interess.

En quest senn vegn la Regenza incumbensada da midar l'art. 15 al. 1 da l'Ordinaziun, Facturaziun, e da stritgar il supplement da la facturaziun sur las instituziuns responsablas sco er lur incumbensas d'incasso. Da nov duai l'art. 15 al. 1 da l'Ordinaziun davart la tgira da dents en scola, Facturaziun, vegnir adattà sco suonda:

Las dentistas da scola ed ils dentists da scola mettan a quint a las instituziuns responsablas las controllas il pli tard per la fin da l'onn da scola. (stritgar – ed ils tractaments)

Cuira, ils 16 da favrer 2022

Florin-Caluori, Jochum, Dürler, Berther, Bettinaglio, Buchli-Mannhart, Cahenzli-Philipp, Caluori, Casty, Casutt-Derungs, Censi, Clalüna, Crameri, Danuser, Della Cà, Deplazes (Rabius), Derungs, Ellemunter, Epp, Fasani, Favre Accola, Flütsch, Föhn, Hardegger, Hefti, Holzinger-Loretz, Hug, Kasper, Kienz, Koch, Kohler, Kuoni, Loepfe, Loi, Maissen, Märchy-Caduff, Müller (Susch), Natter, Niggli-Mathis (Grüsch), Papa, Rüegg, Schmid, Schneider, Schutz, Stiffler, Tanner, Thomann-Frank, Ulber, Valär, von Ballmoos, Wellig, Widmer (Favugn), Widmer-Spreiter (Cuira), Wieland, Zanetti (Landquart), Bisaz, Bürgi-Büchel, Collenberg, Gujan-Dönier, Heini

Resposta da la regenza

L'incumbensa pretenda che las dentistas ed ils dentists da scola possian metter a quint a las instituziuns responsablas mo las controllas e betg pli ils tractaments per la fin d'in onn da scola. Ultra da quai duain las instituziuns responsablas vegnir liberàdas da l'incassament da las parts dals custs da las persunas cun la pussanza dals geniturs, uschia che la ristga d'incasso duai vegnir transferida a las dentistas ed als dentists da scola.

La tgira da dents en scola ha l'intent da garantir la sanadad da la bucca (profilaxa) dals uffants e giuvenils en la scola populara tras ina controlla annuala dals dents (visita da controlla) sco er cun exequir eventuals tractaments. En il rom da la registraziun tempriva en l'entir chantun pon vegnir prendidas mesiras profilacticas che spargnan custs a lunga vista e ch'èn ina preziusa contribuziun a la sanadad publica.

Ils custs da la controlla da dents tras las dentistas ed ils dentists da scola van a donn e cust da las instituziuns responsablas (cf. art. 12 al. 2 Ordinaziun davart la tgira da dents en scola: DG 421.850). Ils custs da tractament van da princip a donn e cust da las persunas cun la pussanza dals geniturs (cf. art. 13 Ordinaziun davart la tgira da dents en scola). Las prestaziuns da las dentistas e dals dentists en il rom dal servetsch dentistic da scola vegnan indemnisadas tenor la Tariffa per la tgira da dents en scola da la Societad svizra da las dentistas e dals dentists. Medemamain las parts dals custs da las persunas cun la pussanza dals geniturs (art. 14 Ordinaziun davart la tgira da dents en scola). Questa tariffa è pli bassa che la tariffa per pazientas e pazients privats. Sut quest aspect na resulta per las dentistas ed ils dentists nagin avantatg economic cun ademplir il servetsch dentistic da scola. Medemamain n'obtegnan las dentistas ed ils dentists tras lur incarica nagina nova clientella, perquai che la gronda part da las persunas cun la pussanza dals geniturs ha per regla gia ina dentista privata u in dentist privat. Da la tariffa sociala da las dentistas e dals dentists da scola profitan ils uffants e giuvenils che dovran in tractament cleramain pli intensiv sco er las famiglias che n'han – per motivs finanzials – nagina dentista privata u nagin dentist privat e la finala er la vischnanca, perquai che uschia na sto ella betg surpigliar ils custs per sanar cun retard ed en moda pretensiusa ils dents da las persunas che retiran agid social.

Scleriments tar la Societad grischuna da dentists han mussà, che las dentistas ed ils dentists da scola èn cuntents cun il sistem vertent e conscients da la responsabladad sociala ch'ellas ed els han envers la societad cun porscher il servetsch dentistic da scola. Però han las dentistas ed ils dentists da scola l'intenziun da remetter lur mandat u almain d'al reponderar seriusamain, sch'ellas ed els duessan – ultra d'applitgar la tariffa bassa – er anc surpigliar la ristga d'incasso.

Tut en tut s'oppona in'adattaziun da l'art. 15 da l'Ordinaziun davart la tgira da dents en scola a l'incarica da basa da la tgira da dents en scola, numnadamain da mantegnair la sanadad da la bucca dals uffants e giuvenils e dal medem access a mesiras per mantegnair la sanadad da la bucca, ed ella chaschuna a lunga vista in augment considerabel dals custs da tractament. Quai engrevgiass la finala las persunas ch'èn tuttavia socialmain pli deblas e las famiglias cun dischavantatgs socials ed augmentass er ils custs da l'agid social da las vischnancas.

Sa basond sin questas explicaziuns propona la Regenza al Cussegl grond da refusar questa incumbensa.

8 d'avrigl 2022