En la sessiun d'october 2021 ha il Cussegl grond tractà la missiva da la Regenza tar il Plan d'acziun Green Deal (AGD). En quest connex è vegnida approvada in'emprima etappa da finanziaziun ed èn vegnidas respundidas dumondas da princip davart l'ulteriur proceder. En il AGD eran fin ussa centrals ils agids finanzials a favur d'instruments concrets per reducir ils gas nuschaivels per il clima. La dumonda da las cundiziuns economicas generalas a favur dals svilups necessaris, particularmain en il sectur da la tecnologia, è vegnida tematisada en la debatta en il Cussegl grond. Per cuntanscher las finamiras dal AGD èn las cundiziuns economicas generalas da gronda impurtanza.
Il AGD duai rinforzar – ultra da la tematica dal clima – en general er in'economia persistenta. Per l'economia da construcziun e per l'industria vegn en l'avegnir a daventar pli e pli impurtanta l'economia circulara. Il Grischun è predestinà – grazia a sias resursas natiralas, a l'economia d'energia, a las instituziuns da perscrutaziun, a l'industria, a la mastergnanza ed al turissem – da daventar la futura regiun alpina d'«economia persistenta». Il Grischun duai pia sa preschentar sco center da cumpetenza per in'economia persistenta che schanegia las resursas. La finamira è quella ch'il Grischun possia sa sviluppar ad in cluster economic concernent il tema economia persistenta e green-tec. Da quai pon profitar interpresas existentas, però er novas domiciliaziuns e start-ups.
Il chantun po sustegnair la furmaziun d'in cluster il meglier cun rinforzar las cundiziuns generalas respectivas. Perquai duai en il rom dal AGD vegnir mess in focus central sin las activitads dal chantun en il sectur da la perscrutaziun, da la furmaziun e da la promoziun da l'economia. Quai permetta da far avanzar ils svilups economics e tecnologics en il sectur da l'energia regenerabla, da l'economia circulara e da las resursas natiralas. En spezial duai la furmaziun professiunala, cunzunt la furmaziun professiunala superiura, vegnir rinforzada en quest sectur per producir suffizientamain persunas spezialisadas che gidan a realisar il AGD. D'impurtanza centrala è qua l'engaschament dals manaschis e da las branschas da l'economia privata sezza. Correspundentamain duai vegnir sviluppada ina rait da cumpetenza green-tec ed endrizzà in post da consultaziun per interpresas en il chantun. Quest post duai, sche pussaivel, vegnir organisà da l'economia sezza.
Sin basa da questas explicaziuns vegn la Regenza incumbensada da preschentar al Cussegl grond – en il rom da la segunda etappa dal Green Deal – mesiras per meglierar las cundiziuns generalas da l'economia, en connex cun las qualas l'economia persistenta duai vegnir resguardada commensuradamain. Ina part adequata dals meds finanzials da la fasa dus dal AGC duai vegnir impundida – cun ina bilantscha tecnologica neutrala – en ils secturs da la furmaziun, da la perscrutaziun applitgada, da l'innovaziun e da la colliaziun en raits, quai per far avanzar il Green-Tec-Cluster. Cunzunt duain er las IPM profitar dal transfer da savida e da tecnologia correspundent sco er da las cussegliaziuns.
Cuira, ils 21 d'avrigl 2022
Brunold, Hohl, Koch, Berther, Bettinaglio, Brandenburger, Caluori, Censi, Crameri, Danuser, Deplazes (Rabius), Derungs, Dürler, Ellemunter, Engler, Epp, Flütsch, Föhn, Hardegger, Hartmann-Conrad, Jochum, Kunfermann, Lamprecht, Loepfe, Maissen, Michael (Donat), Mittner, Müller (Susch), Niggli-Mathis (Grüsch), Papa, Ruckstuhl, Rüegg, Sax, Schmid, Schneider, Tanner, Thomann-Frank, Tomaschett (Breil), Tomaschett-Berther (Trun), Ulber, Widmer (Favugn), Widmer-Spreiter (Cuira), Wieland, Zanetti (Landquart), Bürgi-Büchel, Costa