Il benchmark e-government che la Cumissiun da la UE ha preschentà l'onn 2020 mussa la situaziun da la digitalisaziun dal maun public en l'Europa. Il rapport cumpareglia il progress ch'ils 28 stadis da la UE sco er l'Islanda, la Norvegia, la Serbia, il Montenegro, la Tirchia e la Svizra han fatg en la digitalisaziun da l'administraziun. Tenor la retschertga è la Svizra sin la plazza 30 da 36 e preschenta pia ina situaziun dischillusiunanta.
Las sutsegnadras ed ils sutsegnaders dubitan che la Regenza dal chantun Grischun prendia serius e saja pronta da far avanzar consequentamain, decididamain e cun gronda prioritad la transfurmaziun digitala entaifer l'administraziun chantunala. En la resposta a la «Dumonda Hohl concernent la revisiun da la strategia e da l'organisaziun per accelerar la transfurmaziun digitala en l'administraziun chantunala» na pon quests dubis betg vegnir eliminads. 4 onns suenter la publicaziun da l'uschenumnada «Strategia dad e-government» (ch'era e ch'è però plitgunsch ina strategia parziala) èn la «app per la statistica da pestga», l'endataziun electronica da dumondas al Fond da sport u la pussaivladad da retrair las patentas da pestga online en moda simpla e nuncumplitgada ils progress ils pli gronds. En vista a quai paran las decleraziuns da la Regenza mo decleraziuns vanas.
Singuls departaments, singuls posts da servetsch u singuls uffizis paran bain da vulair far avanzar la digitalisaziun er en il Grischun en moda consequenta e cun gronda prioritad (exempel: management en la pandemia da corona), en auters secturs (exempel: procedura d'annunzia da las candidatas e dals candidats per las elecziuns dal Cussegl grond en il nov sistem electoral) pari dentant ch'ins n'haja insumma anc betg chapì quai che mussa il temp. Ina strategia generala e surordinada, ina priorisaziun ambiziunada sin il stgalim da la Regenza ed il squitsch necessari sin tut l'administraziun na paran betg dad esser avant maun u èn avant maun mo insuffizientamain.
L'administraziun digitala na saja betg primarmain ina dumonda da la tecnologia, mabain da l'organisaziun, sco ch'il document actual da la Strategia naziunala dad e-government constatescha. I fa surstar che la Regenza na vesa betg in basegn d'agir en il chantun Grischun, cunzunt en quest sectur.
Las sutsegnadras ed ils sutsegnaders incumbenseschan perquai la Regenza:
- La Strategia dad e-government vegn elavurada cun gronda prioritad sco explitgà da la Regenza e – pervia da l'impurtanza da la tematica – vegn ella suttamessa al Cussegl grond per l'enconuschientscha e per la discussiun.
- A medem temp vegni mussà al Cussegl grond,
a. tge mesiras che vegnan prendidas per accelerar cleramain la transfurmaziun digitala en cumparegliaziun cun ozendi e tge meds finanzials che vegnan duvrads per quest intent;
b. tge mesiras per accelerar che vegnan prendidas en tge perioda da temp;
c. tge adattaziuns che vegnan examinadas per l'integraziun organisatorica e strategica dal Post spezialisà actual per il e‑government en l'administraziun;
d. co che la realisaziun da la nova strategia vegn controllada e rapportada al Cussegl grond per prender enconuschientscha.
Cuira, ils 16 da zercladur 2022
Hohl, Koch, Derungs, Bär, Berther, Berweger, Bettinaglio, Bigliel, Brandenburger, Cahenzli (Sagogn), Casutt-Derungs, Caviezel (Cuira), Censi, Della Cà, Deplazes (Rabius), Dürler, Ellemunter, Engler, Epp, Favre Accola, Felix, Flütsch, Föhn, Gort, Grass, Gugelmann, Hardegger, Hartmann-Conrad, Hefti, Heini, Hitz-Rusch, Holzinger-Loretz, Hug, Jochum, Kasper, Kienz, Kohler, Kunz (Fläsch), Kunz (Cuira), Kuoni, Lamprecht, Loepfe, Loi, Mittner, Natter, Niggli-Mathis (Grüsch), Papa, Pfäffli, Roner, Ruckstuhl, Rüegg, Salis, Sax, Schmid, Stiffler, Thomann-Frank, Thür-Suter, Tomaschett-Berther (Trun), Weidmann, Wellig, Widmer-Spreiter, Wieland, Zanetti (Landquart)