En consequenza da la pandemia dal coronavirus èn sa midads ils usits da far vacanzas da la societad. Ultra da las pernottaziuns sin campadis classics eran ed èn actualmain dumandadas adina pli savens plazzas da staziunament per dimoras curtas u per il passagi cun autos-rulotta sin manaschis agriculs.

Ina plazza da staziunament è ina pussaivladad da staziunament da curta durada per autos-rulotta, sin las qualas ins dastga pernottar en l'agen vehichel durant ina u pliras notgs. Per quest intent ha il chantun relaschà l'avrigl 2021 in fegl d'infurmaziun «Plazzas da staziunament sin manaschis agriculs» ed uschia sensibilisà ils e las mainagestiun da manaschis agriculs per la tematica plazzas da staziunament. Ils e las mainagestiun d'in manaschi agricul han la pussaivladad da porscher plazzas da staziunament sco pussaivladad da pernottar, quai en il rom d'in manaschi accessoric betg agricul (MABA) tenor l'art. 24b da la Lescha federala davart la planisaziun dal territori (LPT) en cumbinaziun cun l'art. 40 da l'Ordinaziun appartegnenta davart la planisaziun dal territori (OPT).

Per rimnar experientschas han – tenor il fegl d'infurmaziun dal chantun – las autoritads communalas permess per emprova plazzas da staziunament sin manaschis agriculs (senza mesiras architectonicas) durant ina stagiun (avrigl fin october 2021) en la procedura simplifitgada. En cas d'ina purschida che sa repeta duai – tenor il fegl d'infurmaziun – vegnir realisada ina procedura EOZ regulara.

Sin basa da questa situaziun da partenza supplitgain nus la Regenza da respunder las suandantas dumondas:

1. Quantas plazzas da staziunament da manaschis agriculs èn vegnidas permessas da las autoritads communalas en la procedura d'annunzia simplifitgada durant la fasa da test?
   
2. Quants manaschis agriculs han – sin basa d'ina experientscha positiva durant la fasa da test – inoltrà ussa ina dumonda per ina procedura da permissiun EOZ cun la finamira da pudair metter a disposiziun e gestiunar a lunga vista ina plazza da staziunament per viagiaturs?
3. Èn nossas famiglias da purs – tenor l'opiniun da la Regenza – infurmadas suffizientamain davart la cumplettaziun dal mussavia existent per l'agroturissem e davart la noziun da la plazza da staziunament sco manaschi accessoric betg agricul, u dovri in'offensiva d'infurmaziun per quest intent?

Cuira, ils 16 da zercladur 2022

Tomaschett (Breil), Grass, Engler, Berther, Bettinaglio, Brandenburger, Brunold, Buchli-Mannhart, Bürgi-Büchel, Cahenzli (Sagogn), Crameri, Degiacomi, Della Cà, Derungs, Ellemunter, Epp, Fasani, Felix, Hardegger, Jochum, Kohler, Kunfermann, Lamprecht, Natter, Niggli-Mathis (Grüsch), Padrun-Valentin, Ruckstuhl, Sax, Schmid, Thomann-Frank, Tomaschett-Berther, Ulber, von Ballmoos, Zanetti (Landquart)