Navigation

Inhaltsbereich

Dumonda Collenberg concernent la rait da telefonia mobila en la Ruinaulta

Sessiun: 03.09.2022

La Ruinaulta er enconuschenta sco «Swiss Grand Canyon» è enconuschenta er ordaifer il chantun Grischun sco cuntrada natirala incumparabla. Ils passagiers da la Viafier retica pon contemplar la natira magnifica directamain or dals trens da la Viafier retica. Ils turists apprezieschan fitg il traject da tren che vegn dentant er frequentà mintga di da numerus pendularis da la Surselva. En paucs onns duain ils trens circular en il tact da mes'ura tranter Glion e Cuira tras la Ruinaulta. Cun l'introducziun dal tact da mes'ura daventa la Surselva pli attractiva sco lieu d'abitar. Per ch'ils pendularis possian trair a niz il viadi cun tren optimalmain er per la lavur, è ina colliaziun d'internet fitg impurtanta. Deplorablamain na datti però nagina rait da telefonia mobila sin in tschancun dal traject tranter Glion e Cuira en la Ruinaulta. Quai è malempernaivel per ils pendularis e betg pli confurm al temp. La pussaivladad da lavurar durant il viadi a la lavur è in grond avantatg dal viadi cun tren cumpareglià cun il viadi cun auto. Sche quest avantatg n'exista dentant betg propi, manca la motivaziun per desister dal viadi cun auto e prender il tren. Ord vista ecologica stuess ins perquai far tut il pussaivel per augmentar l'attractivitad dal traject da viafier.

Sut quest aspect vulan las sutsegnadras ed ils sutsegnaders savair il suandant da la Regenza:

  1. È la Regenza er da l'avis, ch'ina vasta rait da telefonia mobila respectivamain ina colliaziun d'internet è – ord vista dals pendularis – impurtanta per render attractiv il viadi cun tren sin il traject menziunà?
  2. Tge mesiras fissan necessarias da vart dal chantun per meglierar la rait da telefonia mobila en la Ruinaulta?
  3. È la Regenza pronta da pretender immediatamain da la Viafier retica respectivamain dals purschiders da telefonia mobila in meglierament da la situaziun?
  4. Pudess il chantun sustegnair finanzialmain la Viafier retica respectivamain ils purschiders da telefonia mobila per schliar il problem (per exempel sur GRdigital)?

Cuira, ils 3 da settember 2022

Collenberg, Derungs, Tomaschett, Beeli, Berther, Brandenburger, Brunold, Cortesi, Crameri (Surava), Degiacomi, Della Cà, Dietrich, Epp, Furger, Gartmann-Albin, Hohl, Kreiliger, Luzio, Maissen, Messmer-Blumer, Righetti, Sax, Sgier, Widmer, Wieland

Resposta da la regenza

Ina rait da telefonia mobila effizienta sin las axas da traffic principalas dal chantun – latiers tutga er il traject da viafier tranter Cuira e Glion cun la Ruinaulta – è ina pre­missa fundamentala per l'attractivitad dal chantun Grischun. Ina infrastructura a bin­del ultralad cun cabel u però er senza cabel e che correspunda al standard actual per lung da las vias da traffic e da las rutas da pendularis, è impurtanta per ina gron­da attractivitad d'abitar e da lavurar.                  

Tar la dumonda 1: Ina rait da telefonia mobila effizienta vegn giavischada resp. Pre­tendida pli e pli savens da pendularis, turists e da lavurants. Cun ina rait da telefonia mobila adequata pon gestiunarias da viafiers e d'infrastructuras sco la Viafier retica plinavant pussibilitar a lur clientella l'access a purschidas digitalas ed uschia realisar marschas bruttas, communitgar cun la clientella p.ex. en cas da problems da collia­ziun u da retards. Areguard l'infrastructura pon ellas però er survegliar en temp real il stadi dals binaris, da las stgomias u dals indrizs digitals.

Tar la dumonda 2: La Viafier retica ha terminà in studi da project per meglierar la rait da telefonia mobila sin il traject da la Surselva. Tenor quest studi èn previs 50 fin 60 lieus sin l'entir traject. Ils blers da quests lieus èn previs per cuvrir la rait en la Ruin­aulta, nua che la qualitad da la telefonia mobila è oz nauscha u nua ch'i n'ha per part insumma nagina rait. Tenor il studi importa il volumen d'investiziun per quest traject ina summa da plirs diesch milliuns francs. Per meglierar la communicaziun mobila èn da princip cumpetentas las gestiunarias d'infrastructuras, perquai che mo ellas han las concessiuns da la Confederaziun per metter a disposiziun raits da telefonia mo­bila publicas.

Tar la dumonda 3: Guardar resposta a la dumonda 2. Sin il traject da la Surselva vegn utilisà en l'avegnir supplementarmain material rullant cun WLAN, quai che gida medemamain a meglierar la situaziun.

Tar la dumonda 4: Cun il concept da promoziun «Bindel ultralad dal Grischun» che la Regenza ha approvà il november 2018, ha il chantun Grischun mess a disposiziun in instrument per promover la cumplettaziun da las infrastructuras a bindel ultralad cun contribuziuns chantunalas. La finamira è d'ina vart da colliar il chantun cun infrastruc­turas da communicaziun a bindel lad cun cabel, ma er da crear premissas idealas per ina concurrenza a favur d'ina concepziun dals pretschs cumparegliabla cun terri­toris urbans.

La promoziun da la construcziun d'indrizs per la telefonia mobila cun meds finanzials dal chantun Grischun n'è betg previsa. Per quai mancan las basas giuridicas. Il me­dem vala er per in sustegn finanzial sur la Lescha davart la promoziun da la transfur­maziun digitala en il Grischun (LTD; DG 960.100).

27 d'october 2022