Navigation

Inhaltsbereich

Sessiun: 19.10.2022

Cun la guerra en l'Ucraina è il Grischun vegnì confruntà cun ina nova situaziun: Il dumber da requirentas e requirents d'asil che la Confederaziun ha attribuì al chantun è sa multiplitgà cun ina giada. Pervia dal grond dumber da persunas ha la Regenza decidì la primavaira 2022, che las persunas che basegnan protecziun cun il status da dimora «S» pon vegnir alloschadas er en abitaziuns da locaziun u tar famiglias ospitantas, ultra dals alloschis collectivs chantunals. Grazia a l'avertadad ed a la solidaritad da la populaziun grischuna, han las persunas che tschertgan protecziun pudì chattar in alloschi entaifer curt temp.

Bleras famiglias ospitantas dattan ussa gia bler pli ditg che planisà alloschi a persunas che tschertgan protecziun. Intgins chantuns na sajan betg dal tut segirs, quant stabel che l'alloschament da persunas che tschertgan protecziun durant plirs mais tar persunas privatas saja, scriva la Conferenza da las directuras e dals directurs chantunals dals affars socials (CDAS) sin dumonda da la Südostschweiz (ediziun dals 15 da fanadur 2022). Quests dubis vegnan er confermads qua tar nus en il Grischun. La convivenza en alloschaments privats è savens pli difficila che spetgada. Perquai vulan persunas che tschertgan protecziun adina pli savens midar en atgnas abitaziuns.

Tenor il Departament federal da giustia e polizia (DFGP) èn ils chantuns responsabels per l'alloschament da las persunas che tschertgan protecziun. Quest fatg vegn resguardà, en quel senn che las persunas cun status da protecziun «S» che abitan en abitaziuns da locaziun u en famiglias ospitantas vegnan sustegnidas da princip dals servetschs socials regiunals en ils secturs da l'agid social persunal ed economic. Il sustegn finanzial vegn prestà directamain tras il servetsch social regiunal. Er las famiglias ospitantas pon sa drizzar punctualmain al servetsch social. Per motivs da resursas na po in accumpagnament al lieu dentant betg vegnir prestà actualmain.

Da princip para tut sco reglà, er concernent il sustegn persunal ed economic tras il servetsch social regiunal – la realitad è dentant displaschaivlamain in'autra. Suenter avair retratg ina nova abitaziun, vegn per exempel tenor las directivas vertentas bain surpigliada la finanziaziun da quella, tar la tschertga sco tala vegnan las persunas che tschertgan protecziun dentant laschadas sulettas, respectivamain èn ellas avisadas sin il sustegn da las famiglias ospitantas. Spezialmain pervia da la gronda barriera linguistica n'èsi praticamain betg pussaivel, che las persunas che tschertgan protecziun chattian sezzas in object da locaziun adattà.

Las sutsegnadras ed ils sutsegnaders tschentan en quest connex las suandantas dumondas a la Regenza:

  1. Co valitescha la Regenza la stabilitad da l'alloschament da persunas che tschertgan protecziun tar persunas privatas e tge mesiras han ins prendì e prendan ins per far frunt a las temas menziunadas?
  2. Tge mesiras ponderescha il chantun da prender, per pudair assister al lieu ed en moda effectiva las persunas pertutgadas e per uschia distgargiar las famiglias ospitantas indigenas?
  3. Co po la Regenza garantir las resursas persunalas necessarias tar ils posts da servetsch cumpetents e tar ils servetschs socials regiunals durant la durada da la crisa en l'Ucraina.

Cuira, ils 19 d'october 2022

Gansner, Epp, Müller, Altmann, Bardill, Beeli, Berther, Bettinaglio, Biert, Binkert, Bisculm Jörg, Bleuler-Jenny, Brandenburger, Brunold, Cahenzli-Philipp (Vaz Sut), Collenberg, Crameri, Danuser (Cazas), Derungs, Dietrich, Dürler, Gredig, Heini, Hoch, Hohl, Holzinger-Loretz, Kasper, Kocher, Kohler, Kreiliger, Loepfe, Maissen, Mani, Mazzetta, Messmer-Blumer, Michael (Donat), Nicolay, Preisig, Rutishauser, Said Bucher, Schutz, Stiffler, von Ballmoos, Widmer, Wieland, Zanetti (Landquart), Zanetti (Sent)

Resposta da la regenza

La guerra en l'Ucraina ha provocà il pli grond moviment da fugia en l'Europa dapi la segunda Guerra mundiala. Ils 11 da mars 2022 ha il Cussegl federal decidì, che las persunas da l'Ucraina che tschertgan protecziun survegnian il status da protecziun S. Tras quai han las fugitivas ed ils fugitivs survegnì in dretg da dimora, senza ch'ellas ed els han stuì absolver ina procedura d'asil ordinaria. Il status da protecziun S è ve­gnì applitgà per l'emprima giada. Fin la fin d'avrigl 2022 ha la Confederaziun attribuì al chantun Grischun passa 800 persunas da l'Ucraina. Quai vul dir ch'i èn vegnidas attribuidas circa 30 persunas per di al chantun. Las structuras regularas eran conce­pidas per 30 persunas per mais. Gist durant questa fasa iniziala era il chantun de­pendent da mintga alloschament pussaivel. La Regenza engrazia a las famiglias ospitantas ch'èn s'engaschadas e che s'engaschan anc adina voluntarmain a favur da las persunas che tschertgan protecziun.

La fin d'october 2022 sustegnevan ils servetschs socials regiunals var 848 persunas en 481 dossiers, las qualas abitavan en alloschis individuals. Da quellas persunas vivevan 124 (91 dossiers) ensemen cun famiglias ospitantas indigenas en ina cha­sada cuminaivla. Sch'i resultan conflicts en la convivenza, po il chantun intermediar abitaziuns che vegnan purschidas da la populaziun. Particularmain en quels cas, nua che uffants èn gia scolarisads.

Tar la dumonda 1: La lescha grischuna prevesa che persunas che tschertgan protec­ziun e ch'èn economicamain dependentas, vegnan da princip collocadas en alloschis collectivs e sustegnidas finanzialmain da l'Uffizi da migraziun (art. 35 Ordinaziun tar la Lescha introductiva tar la legislaziun davart las persunas estras e davart ils fatgs d'asil; OtLItLEA; DG 618.110). Pervia dal grond dumber da persunas che tschertgan protecziun e ch'èn vegnidas attribuidas al chantun Grischun resp. che sa chattavan gia en il Grischun, ha la Regenza decidì, che las persunas cun il status da protecziun S pon er vegnir collocadas en alloschis individuals. La Lescha introductiva tar la le­gislaziun federala davart las persunas estras e davart ils fatgs d'asil (art. 4 LItLEA; DG 618.100) avess previs, che la Regenza po obligar las vischnancas da recepir – a norma dal dumber da lur populaziun – [...] persunas cun basegn da protecziun. Cun ses agir ha la Regenza intenziunadamain evità quai, perquai ch'ella na vuleva betg engrevgiar las vischnancas cun incumbensas supplementaras. A medem temp ha questa decisiun chaschunà ina tscherta inegualitad giuridica tranter las persunas dal sectur d'asil. In accumpagnament ed in'assistenza da persunas che tschertgan pro­tecziun, che surpassa la purschida da l'ulteriura populaziun, n'è per quest motiv betg stà inditgà d'emprim ennà. La Regenza è er da l'avis, che l'alloschament e la convi­venza en la medema chasada pon esser ina sfida per persunas che n'enconuschan betg ina l'autra. L'Uffizi da migraziun e da dretg civil ha perquai svelt prendì en func­ziun alloschis collectivs supplementars, per ch'il chantun possia alloschar las persu­nas cun status da protecziun S che vegnan attribuidas ad el. Plinavant han ins sup­plitgà gia baud l'Agid svizzer als fugitivs, da desister d'intermediar famiglias ospitan­tas directamain davent dal Center federal d'asil. L'intermediaziun han ils posts chan­tunals surpiglià sezs. Sche pussaivel han els adina dà adatg, che las localitads na stuevan betg vegnir utilisadas cuminaivlamain cun la famiglia ospitanta.

Tar la dumonda 2: Il chantun tgira las persunas che tschertgan protecziun en moda cumparegliabla a las ulteriuras persunas che basegnan sustegn. Particularmain en il senn da garantir l'egualitad giuridica da las persunas dal sectur d'asil na planise­scha la Regenza perquai betg d'extender las capacitads d'assistenza per las persu­nas cun status da protecziun S resp. per lur famiglias ospitantas. Actualmain dispona il chantun d'avunda plazzas en alloschis collectivs per persunas cun il status da pro­tecziun S. Sche persunas cun il status da protecziun S na pon betg pli viver tar las famiglias ospitantas, èsi pussaivel da survegnir ina plazza en in alloschi collectiv.

Tar la dumonda 3: En il preventiv 2023 ha la Regenza resguardà las resursas finan­zialas ch'èn necessarias en connex cun las persunas cun status da protecziun S, e quai per tut ils posts da servetsch respectivs. Las plazzas da lavur ch'èn limitadas temporarmain pon uschia vegnir prolungadas.

15 da december 2022