La situaziun critica dal provediment d'energia per l'enviern 2022/23 mussa, che nus stuain spargnar mintga ura kilowatt che nus pudain. Igl exista bain avunda potenzial per proveder la Svizra a lunga vista cun energias regenerablas. Ma l'energia sto vegnir duvrada en tut ils secturs en moda effizienta e mintga tecnologia sto vegnir impundida tenor sias fermezzas.
En il sectur da l'electricitad exista in fitg grond potenzial d'effizienza pertutgant ils stgaudaments electrics. L'Uffizi per economia e turissem dal Grischun ha communitgà l'october, ch'ina gronda part dals edifizis dal Grischun vegnia stgaudada cun ieli da stgaudar, cun laina e cun electricitad. Las datas resortan dal Register federal dals edifizis e da las abitaziuns. Quels edifizis che vegnan stgaudads cun stgaudaments electrics èn responsabels per ina part considerabla dal consum d'electricitad da 1215 Gwh per onn en il sectur da las chasadas, dal mastergn e da l'industria sco er dals servetschs (Statistica d'energia dal chantun Grischun 2018).
En cumparegliaziun cun las pumpas a chalur èn ils stgaudaments electrics fitg ineffizients. Gia la midada d'in stgaudament electric central ad ina pumpa da stgaudar aria/aua po effectuar respargns da 60 pertschient e dapli. Autras tecnologias sco laina, chalur a distanza u chalur solara pon substituir cumplettamain il diever da la preziusa energia electrica. Ils stgaudaments electrics ston pia vegnir remplazzads tras tecnologias pli effizientas che schanegian il clima.
En il rom da la Lescha d'energia e da la «Lescha federala davart las finamiras pertutgant la protecziun dal clima, l'innovaziun ed il rinforzament da la segirezza energetica» (cuntraproposta indirecta a l'Iniziativa da glatschers) prevesa la Confederaziun in program d'impuls da 200 milliuns francs per onn per remplazzar stabiliments che produceschan chalur. Il program d'impuls ch'è limità a 10 onns, è previs tant per remplazzar stgaudaments fossils, sco er per stgaudaments electrics da resistenza fixs e per mesiras d'effizienza.
Las sutsegnadras ed ils sutsegnaders incumbenseschan perquai la Regenza da prender las mesiras necessarias, per che la quota da sanaziun dals stgaudaments electrics possia vegnir augmentada, uschia che la cumpart dals stgaudaments electrics en il Grischun vegn a sa sbassar sin 0 fin l'onn 2030. Per accelerar questa procedura duain vegnir stgaffids ulteriurs impuls, per ch'ils patruns da construcziun remplazzian voluntarmain ils stgaudaments electrics. Quests impuls duain vegnir limitads fin l'onn 2030 e las possessuras ed ils possessurs da las immobiglias pertutgadas duain vegnir infurmads activamain.
Cuira, ils 7 da december 2022
Mazzetta, Danuser (Cuira), Hartmann, Altmann, Atanes, Bardill, Baselgia, Berther, Biert, Bischof, Bisculm Jörg, Bleuler-Jenny, Cahenzli-Philipp (Vaz Sut), Degiacomi, Della Cà, Gansner, Gartmann-Albin, Gredig, Hofmann, Hohl, Kappeler, Kohler, Kreiliger, Müller, Nicolay, Pajic, Perl, Preisig, Rageth, Rettich, Rusch Nigg, Rutishauser, Saratz Cazin, von Ballmoos, Walser, Wilhelm, Zindel