Navigation

Inhaltsbereich

Dumonda Krättli concernent il daner contant sco med da pajament primar en il chantun Grischun

Sessiun: 15.02.2023

Lescha federala davart l'unitad monetara ed ils meds da pajament (LUMMP: CS 941.10) prescriva en l'art. 3 al. 2 cler e net: «Mintga persuna sto acceptar las bancnotas svizras sco pajament, e quai senza limita da la summa.» Il daner contant è anc adina il med da pajament primar, er sche blers consuments prefereschan entant – per motivs da bonitad u pratics – da far transacziuns senza daner contant.

La pandemia da corona e la cumadaivladad han accelerà las midadas d'utilisar ils meds da pajament ed en tscherts secturs èsi in'alternativa pratica da pajar senza daner contant. Deplorablamain datti dentant adina dapli rapports che persunas privatas na possian bleras giadas betg pli pajar servetschs en contant. Uschia pon ins per exempel observar sco las bancas allontaneschan adina pli savens singuls bancomats e renoveschan ils spurtegls ad in servetsch senza daner contant, ubain sco firmas – per il solit grondas u internaziunalas – en il chantun n'acceptan betg pli pajaments en contant.

Ils pli blers manaschis commerzials reglan cun lur clientella ina gronda part da lur transacziuns en contant. Er noss conburgais pli vegls vulan u pon bleras giadas betg pajar senza daner contant, e quest basegn duess vegnir respectà. Il pajar cumadaivlamain senza daner contant cumpiglia ultra da quai differentas ristgas, per exempel sche la crisa d'energia actuala chaschuna ina interrupziun dal current electric, sche l'internet è ord funcziun, sche l'apparat da leger las cartas na funcziuna betg correctamain, sche l'accu dal telefonin è vid u sche la colliaziun è schletta. Il mender è dentant ch'i vegnan incassadas taxas per mintga transacziun digitala. Questas taxas paja mintga singul utilisader. Quai signifitga ina restricziun massiva da nossa libertad e da nossa sfera privata.

Gugent supplitgesch jau la Regenza da respunder a las sutsegnadras ed als sutsegnaders las suandantas dumondas:

  1. En Svizra ed en il chantun Grischun ha il daner contant ina gronda impurtanza, cumpareglià internaziunalmain. Tge fa la Regenza, per che quai restia uschia e per ch'i na vegnia betg restrenschì u refusà a persunas da pajar en contant?
  2. Tge fa la Regenza, per che la Banca Chantunala Grischuna na reduceschia betg ulteriuramain las prestaziuns, e per ch'i saja pussaivel da far pajaments e retratgas en daner contant als spurtegls da tut las filialas?
  3. Tge fa la Regenza, sch'i vegn cuntrafatg a l'art. 3 al. 2 da la LUMMP e sche bancnotas svizras na vegnan betg acceptadas per pajaments senza limita da la summa?

Cuira, ils 15 da favrer 2023

Krättli, Metzger, Gort, Adank, Bachmann, Brandenburger, Bundi, Butzerin, Candrian, Casutt, Cortesi, Della Cà, Dürler, Favre Accola, Furger, Grass, Hartmann, Heim, Kasper, Menghini-Inauen, Morf, Rauch, Roffler, Schutz, Sgier, Städler, Weber

Resposta da la regenza

Ils fatgs monetars èn chaussa da la Confederaziun (art. 99 al. 1 da la Constituziun federala [Cst.; CS 101]). En quest sectur n'han ils chantuns nagina cumpetenza.

En ses rapport dals 9 da december 2022 per ademplir il postulat Birrer-Heimo, 18.4399, «Garantir er en il futur la vasta acceptanza dal daner contant» è il Cussegl federal s'occupà en moda cumplessiva cun il tema da questa dumonda. La Regenza renviescha perquai a las explicaziuns dal Cussegl federal. Particularmain vegn quel a la conclusiun, ch'il diever dal daner contant è vinavant grond en Svizra, che l'access al daner contant è per gronda part garantì e che l'acceptanza dal daner contant è re­ducida mo punctualmain.

Ils 9 da mars 2023 è reussida l'Iniziativa federala dal pievel «Gea ad ina valuta svizra libra ed independenta cun munaida u bancnotas (Il daner contant è libertad)». Ella pretenda tranter auter che la Confederaziun garanteschia, «che munaida e bancno­tas stettian adina a disposiziun en ina quantitad suffizienta». Il Cussegl federal, l'As­samblea federala e las votantas ed ils votants vegnan pia a pudair s'exprimer proxi­mamain davart quest tema.

La finala renviescha la Regenza a sia resposta da pli baud a la dumonda Pfäffli con­cernent il tractament da deposits da munaida tar la Banca Chantunala Grischuna (BCG) (sessiun da favrer 2019, protocol dal Cussegl grond, 4/2018–2019, p. 719).

Tar la dumonda 1: En il rapport menziunà inditgescha il Cussegl federal mesiras ima­ginablas per mantegnair l'access e l'acceptanza dal daner contant: stgaffir in'obliga­ziun lianta d'acceptar daner contant, intermediar ils avantatgs dal daner contant, ga­rantir las pussaivladads da retrair daner contant (p.ex. als bancomats) u reducir ils custs per la gestiun dal daner contant. Perquai ch'il diever dal daner contant è anc adina frequent en Svizra, vul il Cussegl federal surlaschar la tscherna dals meds da pajament vinavant da princip a las chasadas privatas ed a las interpresas. In'obliga­ziun lianta d'acceptar daner contant refusescha el. En vista a la significaziun dal daner contant ha il Cussegl federal incumbensà il Departament federal da finanzas da persequitar ils svilups ed en cas da basegn da preschentar opziuns d'agir.

Tar la dumonda 2: Il provediment cun daner contant è bun, quai malgrà la grondezza dal chantun Grischun e las bleras vals: L'onn 2021 eran ils servetschs dals paja­ments cun daner contant cuntanschibels per 99 pertschient da la populaziun perma­nenta a pe u cun il traffic public entaifer 20 minutas (Uffizi federal da communicaziun UFCOM, Erfüllung des Grundversorgungsauftrags 2021 dals 9 da zercladur 2022). Cumpetenta per ademplir l'uschenumnada incumbensa dal provediment da basa cun servetschs da pajament è la Posta (artitgel 32 da la Lescha da posta [CS 783.0]).

Tenor l'artitgel 2 alinea 1 da la Lescha davart la Banca Chantunala Grischuna por­scha la BCG ils servetschs usitads per ina banca e resguarda en sia activitad com­merziala sco banca universala ils basegns da tut ils circuls da la populaziun, da l'economia privata e dal maun public. Igl è chaussa da la banca da definir sia pur­schida da servetschs en quest rom. La BCG gestiunescha en il Grischun 42 filialas e var 100 bancomats. Pajar en u retrair daner contant è pussaivel en tut ils lieus da la BCG. Plinavant pon las clientas ed ils clients sa laschar trametter a chasa gratuita­main fin 1000 francs en daner contant per posta A.

Tar la dumonda 3: La regla tenor l'artitgel 3 da la Lescha federala davart l'unitad mo­netara ed ils meds da pajament (LUMMP; CS 941.10), ch'i stoppian vegnir accepta­das sco med da pajament fin 100 munaidas svizras ed in dumber illimità da banc­notas, vala mo, sche las partidas n'èn betg sa cunvegnidas ad insatge auter («dretg dispositiv»). En concordanza cun la libertad economica constituziunala (art. 27 Cst.) dastga ina butia per exempel montar in avis, ch'i vegnian acceptads mo meds da pajament senza daner contant, entant ch'ina cumpradra u in cumprader è liber da far cumissiuns en questa butia u en in'autra. D'exequir la LUMMP è chaussa da la Confederaziun.

19 d'avrigl 2023