Navigation

Inhaltsbereich

Dumonda Lamprecht concernent biogas da l'agricultura

Sessiun: 15.02.2023

En noss chantun vegnan tegnids var 40 000 unitads da muvel grond che produceschan mintga di cun lur secreziuns ina biomassa che po vegnir utilisada per far biogas. In'unitad da muvel grond producescha circa 5–15 kW per di, tut tenor quant frestg ch'i vegn fermentà e tge tecnologia ch'ins dovra. Sch'ins resguarda e deducescha il temp da pasculada e d'alpegiada obtegnan ins ca. 250 dis da producziun. Uschia resulta ina quantitad da gas da 50–150 milliuns kW. La gronda part dal gas vegn producida durant ils mais d'enviern. Il pavel ch'ils purs han magasinà la stad (fain, silo, pulenta e.u.v.) che vegn pavlà l'enviern, vala quasi sco «accumulatur d'energia». Supplementarmain absorbescha la producziun d'energia ord la biomassa ils gas nungiavischads sco metan ed amoniac ed ha uschia l'effect che l'agricultura è pli favuraivla a l'ambient. Biogas pon ins utilisar fitg bain per stgaudar ubain er per far ir motors. Fin oz vegn utilisada mo ina pitschna part (sut 5 pertschient en l'entira Svizra, en Grischun anc pli pauc).

Sut quest aspect vulan las sutsegnadras ed ils sutsegnaders savair da la Regenza:

  1. Vesa la Regenza la pussaivladad da nizzegiar dapli biogas da l'agricultura?
  2. Datti pussaivladads da producir biogas en moda decentrala, d'al rimnar, d'al nettegiar e d'al utilisar en moda centrala?
  3. Fiss il biogas en tscherts secturs in remplazzament real per gas natiral?
  4. Fiss la Regenza pronta da sustegnair finanzialmain in pli grond project da pilot che giess en questa direcziun?

Cuira, ils 15 da favrer 2023

Lamprecht, Sgier, Hohl, Altmann, Bachmann, Bardill, Baselgia, Beeli, Berther, Biert, Binkert, Bischof, Bisculm Jörg, Bleuler-Jenny, Brunold, Cahenzli-Philipp (Vaz Sut), Casutt, Censi, Collenberg, Crameri, Degiacomi, Della Cà, Derungs, Dietrich, Epp, Feuerstein, Föhn, Furger, Gansner, Gredig, Hartmann, Heim, Hoch, Jochum, Kappeler, Kienz, Kohler, Kreiliger, Laim, Loi, Luzio, Maissen, Mani, Mazzetta, Messmer-Blumer, Michael (Donat), Nicolay, Pajic, Pfäffli, Rageth, Rettich, Righetti, Roffler, Rusch Nigg, Saratz Cazin, Sax, Schutz, Sgier, Spagnolatti, Tanner, Ulber, von Ballmoos, von Tscharner, Wieland, Zanetti (Sent)

Resposta da la regenza

La Confederaziun promova implants da biogas dapi l'october 2021 cun maximalmain 60 % dals custs d'investiziun imputabels (art. 27 da la Lescha d'energia [LEn; CS 730.0]). En quest connex è la contribuziun d'investiziun dependenta dal tip d'implant. Ultra d'ina contribuziun d'investiziun èsi er pussaivel da dumandar ina contribuziun als custs da manaschi (art. 33a LEn). Il potenzial d'electricitad realistic ord rument verd, ruments da victualias e ladim natiral importa tenor in'analisa dal potenzial 12 uras da gigawatt en il chantun Grischun (missiva tar il Rapport d'electricitad carnet nr. 6/2012–2013, p. 350). Da quellas vegnan tratgas a niz oz var 4 GWh. Las cifras che vegnan menziunadas en la dumonda èn stimadas – mo gia areguard il ladim na­tiral – per in factur essenzialmain pli aut (fin in factur 12). En quest connex sa tracti d'ina ponderaziun teoretica che na resguarda betg la repartiziun dal ladim natiral sin l'entir chantun.

Tar la dumonda 1: En il rom dal project Agricultura neutrala al clima en il Grischun sustegna il chantun Grischun gia oz projects ch'elavuran soluziuns e respostas pratitgablas sin las dumondas urgentas da la protecziun dal clima en l'agricultura grischuna. Quai cumpiglia er projects en il sectur implants da biogas.

Tar las dumondas 2 e 3:Las tecnologias èn enconuschentas. Sche biogas vegn alimentà en la rait da gas, alura sto quel vegnir nettegià ordavant cun agid d'in stabiliment tecnic, per ch'el possia ademplir las pretensiuns da qualitad. La rait da gas è liberalisada. Ina cumpradra u in cumprader da biogas stuess ins sco emprim anc chattar. Quant raschunaivel ch'ina collecziun decentrala ed in nettegiament decentral sco er in'alimentaziun centrala da biogas è, stuess vegnir examinà pli pro­fundamain. Igl è fitg probabel ch'ina collecziun resp. in nettegiament decentral na pudess betg vegnir gestiunà ensemen cun in'alimentaziun centrala, uschia ch'ils custs vegnissan cuvrids. Quai vala probablamain er schizunt cun in nettegiament central. Il potenzial da biogas ch'è teoreticamain avant maun correspunda ad in dieschavel dal gas natiral che vegn actualmain duvrà en il chantun. Perquai n'è biogas betg in remplazzament real per gas natiral.

Tar la dumonda 4: En il rom d'implants da pilot e da demonstraziun pon implants da biogas vegnir promovids en il chantun Grischun, sche quests implants servan a la per­scrutaziun ed a l'examinaziun d'energias regenerablas u da sistems che spar­gnan energia (art. 23 da la Lescha d'energia dal chantun Grischun [LEG; DG 820.200]). Ina garanzia da promoziun generala per in project betg concretisà na po betg vegnir fatga en il rom da questa dumonda. Ina dumonda da promoziun respectiva po vegnir inoltrada tar il chantun u eventualmain tar la Confederaziun. Ina tala dumonda sto vegnir examinada areguard ils criteris da promoziun, avant ch'ina eventuala contri­buziun po vegnir garantida.

26 d'avrigl 2023