En il rom dal management dal luf surveglia l'Uffizi da chatscha e pestga (UCP) la populaziun da lufs en il territori chantunal. L'Uffizi federal d'ambient (UFAM) ha dentant la surveglianza suprema (art. 25 da la Lescha federala davart la chatscha e la protecziun dals mamifers e dals utschels selvadis [Lescha da chatscha; CS 922.00], cf. er il Concept Luf Svizra p. 8). Il monitoring da las populaziuns d'animals selvadis è in instrument central per garantir cumprovadamain ina populaziun ch'è abla da surviver a lunga vista. A medem temp è el ina basa impurtanta per planisar e per realisar in management cunvegnent. In dals instruments auxiliars per quest intent è quel da munir singuls animals cun emetturs. Quai è difficil en l'applicaziun e pretensius en l'execuziun. Animals munids cun emetturs pon furnir infurmaziuns impurtantas davart l'utilisaziun dal spazi, davart la cumprova da reproducziuns u davart tscherts eveniments da donn. Plinavant pon ils animals munids cun emetturs vegnir spaventads directamain, permettan da trair conclusiuns pertutgant l'efficacitad da las mesiras prendidas ed èn d'avantatg per realisar mesiras mortalas e betg mortalas. Las datas obtegnidas dals animals munids cun emetturs servan a dumagnar ina incumbensa da grond interess public.

Tar la dumonda 1: Dals almain 94 lufs ch'èn da chasa en il chantun, èn il mument munids trais cun in emettur. Ma mo in da quels emetturs è actualmain (stadi avrigl 2023) anc en funcziun. Ils ulteriurs dus emetturs èn crudads ora, perquai che la battaria è sa svidada resp. pervia d'in motiv nunenconuschent. In quart luf munì cun in emettur è emigrà la stad 2022 a l'exteriur ed è mort en il fratemp.

Tar la dumonda 2: Ils animals ch'èn actualmain munids cun emetturs vegnan publitgads sin la pagina d'internet da l'Uffizi da chatscha e pestga (UCP) u en ils rapports periodics dal UCP. Il dumber total dals animals munids cun emetturs vegn integrà en il rapport annual che stat er a disposiziun sin la pagina d'internet dal UCP.

Tar la dumonda 3: Las datas ch'ins ha obtegnì dals animals munids cun emetturs dovra la surveglianza da chatscha. Per la surveglianza da chatscha èn ellas ina facilitaziun da la lavur impurtanta tant per il monitoring sco er per exequir reducziuns d'animals. Sut tschertas cundiziuns pon las datas registradas plinavant vegnir messas a disposiziun per projects scientifics. Sch'ins publitgass mintga quartal las datas dals lufs munids cun emetturs, pudessan il management dal luf resp. la lavur da la surveglianza da chatscha vegnir influenzads considerablamain en moda negativa, perquai ch'ils quartiers dals animals vegnissan communitgads. Quai attirass «turists per vesair il luf» e promovess er il fraud. Quai sto vegnir evità. Perquai predominescha l'interess public d'in monitoring dal luf senza disturbis envers l'interess da la populaziun d'avair access a las datas. Las enconuschientschas ch'èn resultadas da las datas e ch'èn d'interess per la publicitad, vegnan percunter integradas en ils rapports da quartal dal UCP.

Tar la dumonda 4: Da communitgar las datas da telemetria actualas a la populaziun pertutgada scusseglian experts urgentamain per ils medems motivs sco explitgà en la resposta a la dumonda 3. Il fatg da tegnair enavos correspundentamain las datas, sa lascha giustifitgar tras l'interess public predominant ch'i vegnia furnì in monitoring dal luf senza disturbis tras la surveglianza da chatscha.

3 da matg 2023