Navigation

Inhaltsbereich

Dumonda Spagnolatti concernent in concept general per sanar la via da la Val Calanca

Sessiun: 15.02.2023

Sin il territori da la vischnanca da Castaneda è vegnida giu ils 4 da december da l'onn passà l'ultima bova d'ina entira retscha da bovas sin la via chantunala. Pervia da la bova è la part da la val tranter Buseno e Rossa stada isolada durant plirs dis. Plinavant ha la crudada d'enormas massas da material destruì ils vials da la via chantunala.

Actualmain po il traffic circular mo sin in vial e proximamain èsi previs da cumenzar cun las lavurs da reparaziun e da sanaziun.

Deplorablamain n'è questa bova betg in cas singul. En il medem lieu sco er sin ulteriurs trajects da la via èn gia pli baud vegnids giu plirs sbuvaditschs.

Nus menziunain qua ils eveniments ils pli gronds: Val del Infern, territori Pont dal Ram, territori chavas da crappa dad Arvigo, territori spartavias a Buseno.

Sco ch'ins po leger en las statisticas, na vegn la midada dal clima dals ultims onns betg ad esser in grond agid per il futur e deplorablamain stuain nus esser conscients, che tals eveniments vegnan a capitar adina pli savens.

Fin ussa n'hai per fortuna dà naginas victimas, ma nus na pudain betg adina provocar il destin. Perquai stuain nus chattar ina soluziun per pudair garantir en emprima lingia la segirezza sin l'entira via da la Val Calanca.

Ins senta la tema da la glieud da charrar sin questa via, cunzunt da malaura. Perquai èsi impurtant da garantir la segirezza là, nua che quai è pussaivel.

La segirezza è in element central per la decisiun d'ina famiglia da sa domiciliar en la val.

Ils ultims onns ha il chantun investì blers daners en la via da la Val Calanca e per quai essan nus engraziaivels. Ma ussa na sa tracti betg da sanar u da reparar ina via, mabain igl è indispensabel da segirar l'entira via da la Val Calanca.

Sin fundament da questas explicaziuns tschentain nus las suandantas dumondas a la Regenza:

  1. Ha la Regenza enconuschientscha dal privel real ch'exista sin la via da la Val Calanca?
  2. Sche gea, ha la Regenza prendì en consideraziun da far in concept general d'intervenziun per tut la via da la val; in concept che ha la finamira da garantir uschè baud sco pussaivel dapli segirezza per tut ils utilisaders da la via?
  3. Ha la Regenza l'intenziun d'examinar la pussaivladad da construir ina u pliras gallarias sin ils trajects da via spezialmain privlus?

Cuira, ils 15 da favrer 2023

Spagnolatti, Atanes, Censi, Bachmann, Bardill, Bergamin, Berther, Berweger, Biert, Binkert, Bischof, Bisculm Jörg, Cortesi, Crameri, Degiacomi, Della Cà, Derungs, Dietrich, Epp, Feuerstein, Föhn, Furger, Gansner, Gartmann-Albin, Hoch, Hofmann, Jochum, Kohler, Kreiliger, Lamprecht, Loepfe, Luzio, Maissen, Mani, Menghini-Inauen, Messmer-Blumer, Michael (Donat), Michael (Castasegna), Nicolay, Oesch, Pajic, Preisig, Righetti, Rusch Nigg, Rutishauser, Saratz Cazin, Sax, Schneider, Schutz, Tanner, Ulber, Wieland, Zanetti (Sent)

Resposta da la regenza

Ina gronda part da la rait da vias chantunalas traversa territoris ch'èn exposts a lavinas, a crudadas da crappa e da blocca, a bovas ed ad ulteriurs process da gravitaziun. Vias da traffic segiras èn pia da gronda impurtanza per il Grischun sco chantun da muntogna cun ses abitadis decentrals e cun ses vitgs per part periferics. Las stentas da segirar las vias chantunalas cunter privels da la natira cun agid da mesiras architectonicas ston dentant sa focussar sin ils secturs fermamain periclitads, perquai ch'i na fiss betg pussaivel u fiss sproporziunà da construir stabiliments da protecziun e/u da prender mesiras da protecziun sin l'entira rait da vias.

En il rom dal project «Management integral da las ristgas sin via» (MIR-V) vegn actualmain fatg in nov giudicament da tut las ristgas relevantas per lung da tut las vias chantunalas. Ina basa impurtanta da quest giudicament èn las enconuschientschas che l'Uffizi da guaud e privels da la natira (UGP) elavura sin basa dals art. 7 fin 11 da l'Ordinaziun davart il management integral da las ristgas tar privels da la natira (OMIR; DG 920.150). En quest giudicament valitescha il UGP las ristgas ed eruescha il basegn d'agir a maun da matrizas da finamiras da protecziun. Sa basond sin questas basas da privels e da ristgas elavura il UGP ina survista per etablir cumbinaziuns pussaivlas da mesiras planisatoricas, biologicas e selviculturalas (tenor la Lescha dal guaud).

Tar la dumonda 1: La Regenza è conscienta dal privel d'eveniments da la natira en la Val Calanca che pon avair consequenzas per la via da la Val Calanca e pia er per la segirezza dal traffic. Che quest privel pregiuditgescha il sentiment da segirezza da las abitantas e dals abitants da la Val Calanca, è chapaivel. La sfida d'identifitgar a temp ils privels da la natira e da prender a temp las mesiras da protecziun adequatas è creschida durant ils ultims onns, quai betg sco ultim sut l'aspect da la midada dal clima. Ella vegn ad occupar il chantun er en l'avegnir.

Tar la dumonda 2: Da princip stoi vegnir menziunà, ch'i vegnan registrads tut ils eveniments da crudadas da blocca e da grippa en il cataster dals eveniments da la natira (StorMe). Quai permetta d'identifitgar midadas, per exempel in augment dals eveniments chaschunads da privels da la natira.

Partind dal giudicament da las ristgas da l'onn 2008/2009 concernent crudadas da blocca e da crappa sin il traject tranter la punt artgada sur la Calancasca fin la gallaria Segheria Buseno, vegn la ristga actuala giuditgada da nov en consequenza da la crudada da grippa en il sectur Revetell. I vegn analisà, sch'ils lieus da privel enconuschents èn sa midads e sche novs lieus da privel èn sa furmads. Ultra da quai vegni eruì, sch'i ha dà ina midada da las ristgas, per exempel pervia d'in augment da la frequenza dals eveniments. En connex cun il giudicament da las ristgas vegnan resguardadas er las limitas che l'Uffizi federal d'ambient (UFAM) prescriva per la ristga individuala da mort. Las analisas vegnan ad esser terminadas la stad 2023. Sche la limita da ristga duess vegnir surpassada, vegnan examinadas mesiras.

I sto anc vegnir rendì attent, ch'il territori cumpiglià da las eventualas crudadas da grippa en la Val Calanca è vast, e ch'igl è nunpussaivel d'identifitgar ordavant tut ils lieus da privel, malgrà las analisas accuratas e voluminusas.

Tar la dumonda 3: Là, nua ch'i existan ristgas pli grondas, vegnan consideradas differentas mesiras. Ultra da la surveglianza periodica dal lieu da privel po vegnir fatga ina intervenziun cun purtar davent u cun siglientar las massas da grippa instabilas. Tut tenor la situaziun poi vegnir prendì en consideraziun da construir ovras da protecziun (raits cunter crudadas da crappa, rempars da protecziun, gallarias u tunnels). Eventualmain poi er daventar necessari da spustar la via chantunala, sco che quai è vegnì fatg al sidvest da Selma. Pervia da las analisas currentas na pon anc vegnir fatgas naginas explicaziuns pertutgant projects concrets per augmentar la segirezza dal traffic. 

26 d'avrigl 2023