Navigation

Inhaltsbereich

Dumonda Rauch concernent la candidatura per ils FIS Games

Sessiun: 15.06.2023

La Federaziun internaziunala da skis (FIS) ha annunzià da vulair organisar l'onn 2028 per l'emprima giada ils FIS Games. I sa tracta qua d'in event cun 16 disciplinas da sport da naiv sco ski alpin, freestyle, ski nordic, snowboard, telemark e.u.v. Suenter il 2028 duain ils FIS Games avair lieu mintga 4 onns, cura ch'i na vegnan betg organisadas occurrenzas grondas (campiunadis mundials u gieus olimpics).

Per ils FIS Games vegnan ussa tschertgads pajais ospitants. Per inoltrar candidaturas ha la FIS fixà in termin extrem curt, numnadamain fin il 1. da november 2023.

Il Grischun è la destinaziun da sport da naiv per excellenza. Gia pliras giadas ha noss chantun sco ospitant d'events da sport mussà a l'entir mund, ch'igl è pussaivel d'organisar occurrenzas grondas en il Grischun. Percunter ha il pievel refusà la realisaziun da gieus olimpics d'enviern. Quest project è vegnì giuditgà sco memia grond.

Per exact quellas disciplinas ch'ils FIS Games prevesan ha il chantun gia cumprovà, ch'el ha fitg grondas cumpetenzas ed i stattan er gia a disposiziun bleras infrastructuras per talas. Ultra da quai pon ins partir dal fatg, che l'emprima ediziun dals FIS Games vegn a survegnir ina fitg gronda attenziun en l'entir mund. Plinavant pudess l'emprima ediziun er definir ils standards per ils futurs FIS Games ed igl exista pia la schanza d'organisar da bel principi meglier quels puncts ch'eran vegnids crititgads tar ina candidatura per ils gieus olimpics. Uschia per exempel il gigantissem e la mancanza da persistenza.

Nus supplitgain la Regenza d'infurmar davart las suandantas dumondas:

  1. È la Regenza pronta d'examinar ensemen cun las destinaziuns da sport d'enviern ina candidatura per ils FIS Games 2028?
  2. È la Regenza pronta d'entrar en contact en quest connex cun auters chantuns u cun Swiss-Ski ubain cun Swiss Olympic?
  3. È la Regenza er da l'avis, che la realisaziun fiss ina gronda schanza da preschentar il Grischun sco destinaziun da sport da naiv per excellenza a l'entir mund?

Claustra, ils 15 da zercladur 2023

Rauch, Mani, Rüegg, Adank, Altmann, Bardill, Bärtsch, Bavier, Berweger, Bischof, Bisculm Jörg, Brandenburger, Brunold, Bundi, Cahenzli-Philipp (Vaz Sut), Candrian, Casutt, Censi, Cola Casaulta, Collenberg, Cortesi, Danuser (Cazas), Degiacomi, Della Cà, Derungs, Dietrich, Dürler, Epp, Favre Accola, Föhn, Furger, Gansner, Gort, Grass, Hartmann, Hoch, Hug, Jochum, Kappeler, Kienz, Koch, Kocher, Kohler, Krättli, Lamprecht, Lehner, Loepfe, Loi, Luzio, Menghini-Inauen, Metzger, Michael Beni (Donat), Morf, Preisig, Rageth, Righetti, Roffler, Salis, Saratz Cazin, Sax, Schutz, Sgier, Spagnolatti, Tomaschett, von Tscharner, Wieland, Zanetti (Sent)

Resposta da la regenza

Ils campiunadis mundials da skis alpin da la FIS han gì lieu il 2003 ed il 2017 a San Murezzan. Grazia a la cumpetenza d'organisar occurrenzas ch'è avant maun e cun il sustegn finanzial da la Confederaziun, dal chantun e da las vischnancas ha l'uniun Campiunadis mundials da skis alpin pudì organisar cun success quests campiunadis mundials. En il Grischun han lieu regularmain differentas cursas da la cuppa mundia­la da la FIS (Arosa, Cuira, Tavau, Laax, Lai, Scuol, San Murezzan). L'onn 2025 han lieu en l'Engiadin'Ota ils FIS Freestyle World Championships 2025 Engiadina / San Murezzan. Er l'onn 2025 vegnan realisads a Lai ils campiunadis mundials da biatlon da la International Biathlon Union (IBU). Ultra da quai han lieu l'onn 2029 ils Special Olympic World Winter Games a Cuira, Arosa e Lai. Sco emprova generala vegnan gia in onn avant manads tras ils Special Olympic National Winter Games 2028 en las medemas trais vischnancas.

Per realisar occurrenzas grondas internaziunalas sco campiunadis mundials u er ils FIS Games dovri ina instituziun purtadra locala u regiunala che surpiglia – ensemen cun las vischnancas, cun la federaziun da sport naziunala e cun las societads da pendicularas – la responsabladad organisatorica e finanziala. La Confederaziun ed il chantun pon pajar contribuziuns per la realisaziun d'occurrenzas grondas sco er per la construcziun da las infrastructuras permanentas ch'èn necessarias. Il chantun n'agescha betg sco organisatur.

Tar la dumonda 1: La destinaziun Engiadina San Murezzan examinescha actualmain – ensemen cun Swiss Ski – ina tala candidatura. Il chantun po sustegnair ina candi­datura per ils FIS Games 2028, sch'i vegnan ademplids ils criteris sin basa da la Lescha per promover il svilup economic en il chantun Grischun (LSE; DG 932.100) sco er la directiva da promoziun dal Departament d'economia publica e fatgs socials concernent contribuziuns ad occurrenzas (UET 43/21).

Tar la dumonda 2: Ils iniziants da la destinaziun Engiadina San Murezzan èn – ense­men cun Swiss Ski – gia entrads en contact cun l'Uffizi federal da sport (UFSPO) e cun Swiss Olympic. En cas da basegn è il chantun pront da stabilir ulteriurs contacts necessaris.

Tar la dumonda 3: Il sustegn da candidaturas sco er da la realisaziun d'occurrenzas grondas d'impurtanza internaziunala fa part dal Program da la Regenza 2021–2024. La Regenza renconuscha il potenzial da talas occurrenzas areguard la promoziun da l'economia locala sco er areguard il svilup dal turissem. Quai en spezial, sche l'occur­renza da sport vegn organisada per gronda part sin infrastructuras existentas ch'èn gia vegnidas utilisadas pli baud per occurrenzas (campiunadis mundials da skis u campiunadis mundials da freestyle). Er en l'avegnir vegn la Regenza a sustegnair occurrenzas grondas en il rom da las prescripziuns legalas e da las pussaivladads finanzialas.

9 d'avust 2023