La cumpart dal chantun al gudogn net da la Lottaria naziunala interchantunala (Swisslos) vegn repartida sin duas finanziaziuns spezialas (FS). Tenor l'art. 38 al. 1 da la Lescha davart las finanzas dal chantun Grischun (Lescha da finanzas, LFC; DG 710.100) va ina part fixa da 30 pertschient da la cumpart chantunala en la FS Sport (rubrica dal quint 4273). Ils ulteriurs 70 pertschient da la cumpart chantunala annuala vegnan attribuids a la FS Lottaria naziunala (rubrica dal quint 4271). En la FS Lottaria naziunala vegn mess a disposiziun en cas da basegn mintgamai 30 pertschient per la promoziun da la cultura sco er per la protecziun da la natira e da la patria (ils per­tschients sa refereschan a l'entira cumpart chantunala da Swisslos). Davart l'autezza da questas duas cumparts sco er davart l'import restant resp. 10 pertschient da l'en­tira cumpart chantunala sco er davart l'utilisaziun dals meds finanzials or da la FS Sport po la Regenza decider definitivamain. Questa repartiziun dals meds finanzials era vegnida concludida dal Cussegl grond il december 2012 tras la revisiun parziala da la LFC. En quest connex era en spezial la cumpart fixa per la FS Sport vegnida auzada da 27 sin 30 pertschient. D'adattar danovamain la repartiziun resp. d'assimi­lar la distribuziun, sco quai ch'i vegn pretendì en l'incumbensa, n'è ni necessari ni in­ditgà ord vista da la Regenza. Pervia dals gudogns annuals da Swisslos ch'èn s'aug­mentads marcantamain ils ultims onns, èn er ils meds disponibels da la FS Sport s'augmentads. Quai sa mussa er a maun da l'import da la FS Sport che s'augmenta cuntinuadamain. Per la fin dal 2022 importa la FS Sport 10,1 milliuns francs, quai tar garanzias avertas da 2,4 milliuns francs. Las contribuziuns da 7 860 278 francs a la cultura, che vegnan menziunadas en l'incumbensa, correspundan a las garanzias fatgas il 2022 tenor categorias da Swisslos. En las garanzias a la cultura èn tranter auter cuntegnids er 2 milliuns francs dal conto «Contribuziuns en cumpetenza da la Regenza» per il project «500 onns Stadi liber da las Trais Lias 1524/2024». En il quint annual 2022 vegnan mussads ils imports pajads durant l'onn da rapport. Sin basa da l'art. 6 lit. a da la Lescha davart la promoziun dal sport e dal moviment (Le­scha da promoziun dal sport; DG 470.000) vegn pajada a las federaziuns chantuna­las da sport ina summa pauschala annuala per la lavur da federaziun e d'uniun gene­rala, per curs da scolaziun e da sport da tuts geners per promover il sport da massa ed il sport da prestaziun sco er per promover la giuventetgna. La summa totala da questas contribuziuns pauschalas è vegnida auzada per il 2010 dad 800 000 francs sin 1 milliun francs ed è dapi lura constanta. Dapi il 2010 è la cumpart chantunala dal gudogn net da Swisslos ch'è destinada per la promoziun dal sport, s'augmentada per 43 pertschient da 2,988 milliuns sin 4,271 milliuns francs. A medem temp èn las con­tribuziuns concedidas dapi lura s'augmentadas per stgars 35 pertschient. Durant quest temp è er vegnì vitiers in sustegn per il sport da prestaziun d'annualmain 750 000 francs a las federaziuns resp. a lur centers da prestaziun. Durant la perioda numnada è er s'augmentà il dumber da dumondas d'annualmain 580 sin 852. Quai procura per in sustegn actualmain pli vast e pli direct per las uniuns, cumpareglià cun ina cumpart pauschala pli auta dal sustegn precedent per las federaziuns. En il Con­cept chantunal per promover il sport dal 2021 èsi menziunà, ch'il chantun ha l'inten­ziun da sustegnair las federaziuns en lur ulteriur svilup e d'examinar il basegn e la realisabladad da l'utilisaziun cuminaivla da las resursas. Per quest intent èn las fe­de­raziuns grischunas da sport gia vegnidas envidadas ad in workshop. Resguardond ils resultats da questas lavurs è la Regenza pronta da realisar – ensemen cun las fede­raziuns da sport – in augment da las contribuziuns pauschalas a las federaziuns chantunalas da sport en il senn da l'incumbensa. En vista al fatg, che bleras grondas federaziuns impundan ina part essenziala da las contribuziuns pauschalas per il sport da prestaziun e ch'il sustegn respectiv è vegnì augmentà signifitgantamain ils ultims onns, fiss in eventual augment da las contribuziuns collià cun l'aspectativa, che ora­vant tut il sport da massa profitass pli fitg da quel.

Sin basa da questas explicaziuns propona la Regenza al Cussegl grond da refusar l'incumbensa qua avant maun concernent l'assimilaziun da la distribuziun dals gu­dogns da la Lottaria naziunala al sport, analogamain a las contribuziuns per la cul­tura, e d'acceptar l'incumbensa concernent l'augment da las contribuziuns annualas a las federaziuns grischunas da sport.

31 d'avust 2023