Navigation

Inhaltsbereich

Incumbensa Degiacomi concernent il servetsch da pichet da las spendreras

Sessiun: 15.06.2023

Las spendreras pon avair plaschair da lur professiun fitg bella e da gronda responsabladad. A mammas en speranza porschan ellas avant e suenter il part assistenza, gidan a tgirar optimalmain ils novnaschids e sustegnan las famiglias a dumagnar svelt lur nov mintgadi.

Gist las spendreras che pratitgeschan libramain adempleschan ina rolla centrala en la fasa impurtanta da l'emprima uffanza, perquai ch'ellas èn las persunas da confidenza da las famiglias en tut las regiuns dal Grischun e perquai ch'ellas chapeschan svelt ils problems che sa mussan, e pon intermediar in sustegn spezialisà.

Perquai che la naschientscha e la tgira durant la pagliola na pon betg vegnir planisadas temporalmain, stat la spendrera a disposiziun ad ina dunna durant var 5 emnas enturn il probabel termin da naschientscha ed è pronta a l'acziun; quai independentamain dal fatg, sche la naschientscha ha lieu a chasa, en ina chasa da parturir u en l'ospital. Suenter la naschientscha accumpogna la spendrera la famiglia a chasa fin 2 mais. Durant questa perioda è la spendrera medemamain obligada d'esser cuntanschibla da tut temp.

En il Grischun ston las famiglias pajar ina indemnisaziun per quest servetsch da pichet. En divers auters chantuns ed en diversas autras citads vegn questa indemnisaziun surpigliada da la publicitad. L'indemnisaziun ha per consequenza, che famiglias cun entradas pli bassas na pon betg sa prestar ina spendrera. Savens èn quai gist quellas famiglias che pudessan profitar il pli fitg da quest sustegn. Sche mo paucas vischnancas finanzialmain fermas pajassan ina tala indemnisaziun da pichet, chaschunass quai svelt in provediment inegual en il chantun Grischun.

La Regenza vegn incumbensada da prender mesiras adequatas per che l'access als servetschs da spendreras che pratitgeschan libramain vegnia garantì en tut las regiuns dal chantun Grischun e possia vegnir finanzià da tut las famiglias (p.ex. tras ina indemnisaziun da pichet chantunala ed unitara per il servetsch da pichet).

Claustra, ils 15 da zercladur 2023

Degiacomi, Zanetti (Landquart), Hefti, Altmann, Atanes, Bachmann, Bardill, Baselgia, Biert, Bischof, Bisculm Jörg, Bleuler-Jenny, Butzerin, Cahenzli-Philipp (Vaz Sut), Casutt, Cola Casaulta, Collenberg, Dietrich, Furger, Gartmann-Albin, Gredig, Hoch, Hofmann, Kaiser, Kocher, Mazzetta, Messmer-Blumer, Müller, Perl, Peter, Preisig, Rageth, Righetti, Roffler, Rusch Nigg, Rutishauser, Said Bucher, Spagnolatti, Walser, Wilhelm

Resposta da la regenza

Las spendreras che pratitgeschan libramain, accumpognan ed assistan dunnas durant la gravidanza, durant la naschientscha a chasa e durant la pagliola. Perquai ch'il termin, particularmain d'ina naschientscha a chasa, na po betg vegnir planisà exactamain, sto – durant l'ultima fasa da la gravidanza – la spendrera che accumpogna ed assista la dunna durant la gravidanza, star a disposiziun sin dumonda. Las prestaziuns da las spendreras che la AOMal surpiglia en cas d'ina maternitad, èn descrittas en l'art. 16 da l'Ordinaziun dal DFI davart las prestaziuns da l'assicuranza obligatorica per la tgira da malsauns (Ordinaziun davart las prestaziuns per la tgira da malsauns; OPM; CS 832.112.31). Da questas prestaziuns fan part – ultra da las visitas da controlla durant la gravidanza – particularmain in dumber normà da visitas a chasa per assister durant la pagliola e per tgirar e survegliar il stadi da sanadad da la mamma e da l'uffant sco er per sustegnair, per instruir e per cussegliar las mammas concernent la tgira ed il nutriment da l'uffant. Ils custs per il servetsch da pichet da las spendreras na vegnan dentant betg surpigliads da l'assicuranza obligatorica per la tgira da malsauns, uschia ch'ils custs respectivs ston vegnir pajads da la famiglia da la dunna che parturescha. Las spendreras che pratitgeschan libramain, assistan la mamma e ses uffant novnaschì er durant la pagliola e durant il temp da tezzar. L'assistenza durant la pagliola è per las spendreras medemamain in servetsch da pichet, quai per esser a disposiziun sin dumonda. Er quests custs dal servetsch da pichet na vegnan betg surpigliads da l'assicuranza obligatorica per la tgira da malsauns. Tut las spendreras che pratitgeschan libramain, na porschan betg – ultra da l'assistenza durant la pagliola – er la realisaziun da naschientschas a chasa.

En Svizra han lieu la gronda part da las naschientschas en l'ospital. Tenor la Plattafurma svizra d'infurmaziun davart la gravidanza, la naschientscha e l'uffant (www.swissmom.ch) sa decida mo in pertschient da las futuras mammas da planisar ina naschientscha a chasa, quai bain er perquai che, sch'i dat cumplicaziuns durant ina naschientscha a chasa, n'è in provediment medicinal – cuntrari ad en l'ospital – betg garantì immediatamain.

Las naschientschas a chasa accumpagnadas d'ina spendrera chaschunan percunter main custs che las naschientschas en l'ospital. Las naschientschas a chasa èn pia finanzialmain pli interessantas tant per l'assicuranza obligatorica per la tgira da malsauns sco er per il chantun. L'assistenza durant la pagliola tras las spendreras è ina contribuziun impurtanta a favur dal provediment da sanadad ed a favur dal provediment da la mamma e da l'uffant suenter la naschientscha.

En l'art. 2 al. 2 da la Lescha per promover la tgira da persunas malsaunas e l'assistenza da persunas attempadas e da persunas che basegnan tgira (Lescha per promover la tgira da persunas malsaunas, LTM; DG 506.000) conceda la Regenza, en cas d'in basegn cumprovà, il sustegn ad ulteriuras furnituras ed ad ulteriurs furniturs da prestaziuns che quels ch'èn menziunads en l'art. 2 al. 1 LTM.

A la Regenza pari ch'il basegn d'in sustegn finanzial da las spendreras che pratitgeschan libramain, per lur servetsch da pichet a favur da las naschientschas a chasa ed a favur da l'assistenza durant la pagliola saja cumprovà per il chantun, quai tant per motivs socials e finanzials sco er per motivs dal provediment da sanadad e dal provediment da la mamma e da l'uffant. Ils custs che vegnan a resultar vegnan stimads sin var 100 000 francs per onn. Las prestaziuns respectivas da las spendreras engaschadas en ils ospitals vegnan cuvridas gia oz sur las prestaziuns d'utilitad publica (art. 24 al. 2 lit. a LTM).

Cun acceptar l'incumbensa qua avant maun prevesa la Regenza d'integrar las spendreras ed ils gidanters da naschientscha en l'Ordinaziun tar la Lescha per promover la tgira da persunas malsaunas, quai sco furnituras e furniturs da prestaziuns cun dretg da survegnir contribuziuns.

Las premissas per l'indemnisaziun dal servetsch da pichet en cas da naschientschas a chasa ed en cas da l'assistenza durant la pagliola sco er l'autezza da l'indemnisaziun duain medemamain vegnir regladas en l'Ordinaziun tar la Lescha per promover la tgira da persunas malsaunas. Per quest intent vegn la Regenza a s'orientar a las regulaziuns d'auters chantuns che pajan medemamain questa indemnisaziun.

Sa basond sin questas explicaziuns propona la Regenza al Cussegl grond d'acceptar l'incumbensa qua avant maun.

29 d'avust 2023