La politica svizra da drogas sa basa sin quatter pitgas, numnadamain la prevenziun, che duai gidar a prevegnir a problems, la terapia, che duai gidar las persunas a schliar problems, la repressiun, cun la quala fauss cumportaments vegnan chastiads, sco er la diminuziun da donns, che duai gidar ad impedir suffrientschas. Ils ultims onns è la scena da drogas a Cuira sa sviluppada cleramain en moda negativa, ed il dumber da persunas senza tetg è creschì. Las relaziuns n'èn acceptablas ni per las persunas pertutgadas ni per la populaziun.
Housing first è in concept che vul cumbatter la perdita dal suttetg. Cuntrari als concepts da sustegn actuals usitads metta Housing First a disposiziun spazi d'abitar a persunas vulnerablas che han pers lur suttetg, e quai senza far cundiziuns. La concessiun da spazi d'abitar n'è pia betg liada vi da la premissa d'ina participaziun a purschidas d'assistenza, da terapia u da structuras dal di. La concessiun da spazi d'abitar n'è per exempel er betg liada vi da la cundiziun da s'abstegnair da drogas. Il concept da Housing First parta dal fatg, ch'in dachasa segir è la basa per che umans arrivian en la situaziun da pudair prender per mauns auters problems, e per che la situaziun da vita possia uschia sa stabilisar tut en tut a lunga vista. En Finlanda è Housing First per exempel vegnì introducì vastamain dapi l'onn 2008. Cuntrari ad auters pajais europeics èsi uschia reussì a la Finlanda da reducir cuntinuadamain il dumber da persunas senza tetg. Quatter da tschintg persunas senza tetg han pudì salvar lur abitaziun durant in lung temp ed han chattà la via en in vita stabila. Plinavant ha Housing First er purtà avantatgs finanzials per la publicitad: Ins ha stuì investir damain daners per persunas che han pers lur suttetg (tranter auter polizia, sanadad e giustia) e per las consequenzas respectivas. En Svizra vegn il concept da Housing First gia realisà en diversas citads (p.ex. Basilea-Citad, Soloturn). Autras citads han acceptà intervenziuns politicas tar quest tema (p.ex. Turitg e Berna).
En il Grischun è la situaziun oz displaschaivlamain savens uschia, che persunas, che han per exempel commess delicts liads a l'acquisiziun da drogas, vegnan messas en praschun, nua ch'ellas vegnan suttamessas automaticamain ad ina dischintoxicaziun. Suenter la dimora en praschun na chattan las persunas pertutgadas (pervia da l'attestat da conduita) strusch in'abitaziun. Quai difficultescha l'entrada en il mund da lavur e maina savens enavos las persunas pertutgadas en l'ambient engrevgià. Uschia fineschan las persunas per regla puspè en la dependenza da drogas. Ins po quasi observar in effect da porta girabla, che pudess vegnir surmuntà grazia al concept da Housing First.
En ils rapports ch'il chantun Grischun ha laschà elavurar dad Infodrog sco er dal Lavuratori da management davart la politica da dependenzas, èsi vegnì renvià al Housing First. La Regenza ha medemamain confermà l'onn passà en il Cussegl grond, ch'ella fetschia ponderaziuns en direcziun dal concept da Housing First.
Per prender per mauns en moda cumplessiva la situaziun problematica da las persunas fermamain dependentas en il chantun, ch'è vegnida tematisada gia pliras giadas en il parlament, supplitgeschan las sutsegnadras ed ils sutsegnaders la Regenza d'examinar il concept da Housing First en il chantun Grischun e da suttametter al Cussegl grond ina preschentaziun generala per realisar il concept.
Cuira, ils 2 da settember 2023
Rettich, Danuser (Cuira), Holzinger-Loretz, Atanes, Bachmann, Bardill, Baselgia, Bergamin, Biert, Bischof, Bisculm Jörg, Bleuler-Jenny, Cahenzli-Philipp, Degiacomi, Dietrich, Gartmann-Albin, Gredig, Hoch, Kaiser, Kreiliger, Luzio, Mazzetta, Müller, Nicolay, Perl, Preisig, Rageth, Rusch Nigg, Rutishauser, Said Bucher, Saratz Cazin, Thür-Suter, von Ballmoos, Walser, Wilhelm