Tar la dumonda 1: Ina part impurtanta ed iniziala da CTC (Communities That Care) è l'interrogaziun da la giuventetgna. Il matg 2023 ha la citad da Cuira publitgà ils resul­tats da questa interrogaziun. L'interrogaziun da la giuventetgna è in'enquista cum­plessiva scientifica en ina vischnanca. La qualitad da las datas è perquai fitg buna. A maun da l'interrogaziun vegnan identifitgads d'ina vart ils facturs da ristga critics e da l'autra vart ils facturs da protecziun en tut ils munds da viver dals uffants e dals giu­venils. Ils munds da viver èn la famiglia, la scola, ils conturns d'abitar e la peer-group. CTC gida las vischnancas a tscherner ed a realisar programs e mesiras da preven­ziun cumprovadas ed efficazias. CTC gida er a rinforzar programs che funcziunan gia.

Cun fastidi constatescha la Regenza ch'ils basegns en il sectur da la psicologia d'uf­fants e da giuvenils s'augmentan. Sch'ins resguarda tut ils puncts cuminaivels sco er las differenzas en cumparegliaziun cun las autras vischnancas da CTC, mussan ils resultats da la citad da Cuira in cler basegn d'agir. Quai vala tant areguard ils cum­portaments problematics respectivs sco er areguard las constellaziuns dals facturs da ristga e dals facturs da protecziun, che correleschan cun quests cumportaments problematics. Impurtant èsi – en il senn da la strategia CTC – che las datas vegnian duvradas per formular strategias per minimar ils facturs da ristga resp. per rinforzar ils facturs da protecziun.

Tar la dumonda 2: La sanadad dals uffants e dals giuvenils vegn influenzada ferma­main da lur conturns, da la famiglia, da la scola, dals conturns d'abitar e da la peer-group. La pli gronda part dals uffants e dals giuvenils ha ina buna sanadad psichica. Var 10 fin 20 pertschient èn dentant confruntads cun problems psichics.

Las suandantas mesiras da prevenziun èn efficazias:

• rinforzar las famiglias per pussibilitar a tut ils uffants – en spezial gia en la veglia­detgna prescolara – da crescher si bain e per prender en mira l'egualitad da las schanzas areguard la sanadad;
• rinforzar las persunas da referiment per ils uffants ed ils giuvenils ordaifer la fami­glia cun installar e cun extender la lavur sociala da scola, la lavur cun giuvenils averta e las purschidas da cussegliaziun simplas en las vischnancas e regiuns;
• etablir en las scolas ed en las vischnancas la diagnosa tempriva e l'intervenziun a temp sco basa per s'occupar d'eventuals problems dals uffants e dals giuvenils;
• pussibilitar als uffants ed als giuvenils da cooperar en scola, en vischnanca ed en la concepziun dal spazi.

Tar la dumonda 3: La promoziun da la sanadad e la prevenziun locala èn incumben­sas da las vischnancas. Il plaun communal è adattà fitg bain per mesiras preventivas, perquai che las vischnancas enconuschan il meglier ils basegns da lur abitantas ed abitants sco er las particularitads infrastructuralas. Tras quai pon vegnir elavuradas mesiras preventivas sistematicas ed efficazias cun las persunas pertutgadas. I dat dentant grondas differenzas en connex cun la realisaziun en las vischnancas. Bleras vischnancas n'han per exempel betg ina lavur sociala da scola ed er betg ina lavur cun giuvenils averta. Plinavant han ellas memia paucs locals adattads per la giuven­tetgna ed er memia paucas pussaivladads da participaziun per ils uffants ed ils giu­venils. A favur da la sanadad dals uffants e dals giuvenils duessan star a disposiziun dapli resursas. Mesiras cunvegnentas èn per exempel la «maisa radunda da la diagnosa tempriva e da l'intervenziun a temp» sin plaun communal u il project «CTC». Las vischnancas pli pitschnas pon trair a niz sinergias regiunalas per garantir la promoziun da la sanadad e la prevenziun. Per questas incumbensas pretensiusas porscha il chantun in sustegn professiunal a las vischnancas.

Tar la dumonda 4: Las vischnancas èn cumpetentas per survegliar las mesiras. Ellas duessan garantir ch'il stadi da la populaziun giuvna vegnia eruì regularmain e siste­maticamain. Las persunas che decidan duessan manar in dialog direct cun las direc­ziuns da scola, cun ils geniturs, cun las persunas che lavuran cun giuvenils, cun il servetsch psicologic da scola e cun ils uffants ed ils giuvenils, quai per percepir ils problems che occupan tals e per alura prender las mesiras correspundentas. I dat posts spezialisads chantunals, sco jugend.gr, graubündenSport, il Post da coordina­ziun per la promoziun tempriva tar l'Uffizi dal servetsch social, il Post spezialisà per l'integraziun ed il Post spezialisà per la promoziun da la sanadad, che pon gidar las vischnancas a liquidar questa lavur. 

18 d'october 2023